Month: May 2019

Монгол, Казахстаны хооронд худалдаа, эдийн засгийн хамтын ажиллагааг өргөжүүлэх, харилцан ашигтай бизнесийн харилцааг хөгжүүлэх зорилгоор бизнес уулзалтыг МҮХАҮТ, БНКазУ-ын Аж Үйлдвэр, Дэд Бүтцийн Хөгжлийн Яам, Казахстаны Олон Улсын Худалдааны Танхим болон Казахстаны Бизнес Эрхлэгчдийн Үндэсний Танхим хамтран зохион байгуулж байна. Тус уулзалтад Казахстаны хүнс, хүнд машин механизм, техник угсралт, эмийн худалдаа, барилга, машин үйлдвэрлэлийн 11 компанийн 20 гаруй төлөөлөгч оролцох юм. Энэ удаагийн бизнес уулзалтаар хоёр талын хамтын ажиллагааны шинэ боломжуудын талаар санал солилцох ба дэд бүтэц, хөдөө аж ахуй, эрчим хүч, эм үйлдвэрлэлийн салбарт хамтран ажиллах өргөн боломжийг олгох бизнес уулзалт зохион байгуулна. Монгол, Казахстан улсын хооронд эдийн засгийн хамтын ажиллагаа жилээс жилд өргөжин тэлж байгаа юм. 2018 оны 11 сарын байдлаар хоёр улсын худалдааны эргэлт 63,7 сая ам.доллар хүрчээ. Үүнээс Казахстаны Монголд хийсэн экспорт – 65,1 сая ам.доллар, импорт – 2,6 сая ам.долларт хүрээд байгаа юм. Тус Улсаас Монгол Улсад экспортонд гаргадаг үндсэн бүтээгдэхүүнд тамхи 20.3, ариун цэвэр, эрүүл ахуйн бүтээгдэхүүн 19.1, угаалгын нунтаг, цэвэрлэгээний бодис 12.6, улаан буудай, хөх тарианы гурил 7.8, бусад хүнсний бүтээгдэхүүн болон газрын тосны бүтээгдэхүүн 4,1 хувь тус тус эзэлдэг байна. Харин манай улсаас импортлодог үндсэн бүтээгдэхүүнд ан амьтан, ургамлын гаралтай бүтээгдэхүүн, сүлжмэл хувцас эдлэл, мод, модон материал болон целлюлоз болон цаасан бүтээгдэхүүн ордог.

Холбогдох утас: +976 11312501, 88091112

Цахим хуудас: www.mongolchamber.mn

Цахим шуудан: foreignrelations@mongolchamber.mn

Замын цагдаагийн баруун урд уулзварын, гүүрэн гарцын дам нурууг цутгах ажил хийгдэж байгаатай холбоотойгоор Нарны замын зорчих хэсэгт түр тулаасуудыг байрлуулсан тул зорчигчид тус дам нурууны ажлыг дуустал холбогдох тэмдэг тэмдэглэгээ заалтуудаа баримтлан аюулгүй байдлаа ханган хөдөлгөөнд оролцохыг зөвлөж байна. БНХАУ-ын засгийн газрын хөнгөлөлттэй зээлийн хөрөнгөөр хэрэгжүүлж байгаа Замын цагдаагийн баруун урд уулзварын, гүүрэн гарц барих төслийн хөдөлгөөн зохион байгуулалт, орц гарц, газар чөлөөлөлт, замын өргөтгөлийн ажлуудыг хэлэлцэн шийдлүүдийг тодорхойлж, гүйцэтгэгч компани болон хариуцсан албан хаагчдад Нийслэлийн Авто замын хөгжлийн газрын дарга Ж.Тогтохбаяр,орлогч дарга Б.Индра нар үүрэг өгчээ.

Авлигын эсрэг олон нийтийг соён гэгээрүүлэх чиг үүргийн хүрээнд “Найзын яриа” сэдэвт өдөрлөгийг Авлигатай тэмцэх газраас Олон улсын хүүхдийн эрхийг хамгаалах өдрийг тохиолдуулан Сүхбаатарын талбайд зохион байгуулахаар төлөвлөж байна. Авлигатай тэмцэх газраас олон улсын аргачлалын дагуу “Хүүхдийн шударга байдлын судалгаа”-г 21 аймаг, 9 дүүргийн 12-18 насны 10 мянга орчим хүүхдийг хамруулж, асуумжийн аргаар онлайнаар зохион байгуулдаг. Судалгааны дүнгээр монгол хүүхдүүдийн шударга байдлын түвшин жил ирэх тусам буурсаар байгаа юм. Тиймээс хүүхдүүдийн дунд шударга ёсны зан үйл төлөвшүүлэх, үлгэр дуурайл үзүүлэх зорилгоор соён гэгээрүүлэх ажил, арга хэмжээ зохион байгуулах шаардлагатай бөгөөд энэ ажлыг Авлигатай тэмцэх үндэсний хөтөлбөрийн хүрээнд бусад төрийн болон төрийн бус байгууллагуудтай хамтран хэрэгжүүлж байна. Хүүхдүүдэд шударга ёсны зан үйл төлөвшүүлэх, шударга ёсны үлгэр дуурайл бий болгох зорилгоор ерөнхий боловсролын сургуулийн бага, дунд ангийн сурагчдад зориулан Авлигатай тэмцэх газрын ажилтнууд “Найзын яриа” комикс номыг зохиож хэвлүүлжээ. Комикс номд ангийн даргаар сонгогдохын тулд ангийнхаа хүүхдэд мөнгө, бэлэг өгөх нь зөв үү, хаясан гар утас олбол эзнийг нь олж өгөх үү, шалгалтаа онц өгсөн хүүхдээ аав, ээж нь шагнах зөв үү, хүүхдүүд аав, ээжээсээ шударга ёсны үлгэр дуурайлыг хэрхэн авдаг вэ, шалгалтын үеэр хуулах нь багшийг хуурч байгаа явдал мөн үү, олон нийтийн газарт хүүхдүүд биеэ хэрхэн авч явах ёстой вэ гэх зэрэг дунд сургуулийн сурагчдад зориулсан шударга ёсны 10 өгүүллэг багтсан байна. Уг комикс номын агуулгаар хүүхэлдэйн кино бүтээсэн бөгөөд түүгээр дамжуулан соён гэгээрүүлэх ажлыг улам өргөжүүлэн зохион байгуулж байна. Олон улсын хүүхдийн эрхийг хамгаалах өдрөөр Сүхбаатарын талбайд Монголын Хүүхдийн ордны дугуйлангийн авьяаслаг сурагчид жүжиг, дуу, хөгжмийн үзүүлбэр үзүүлэхийн зэрэгцээ Сурагчдын холбооны өсвөрийн лидер сурагчид “Би шударга хүүхэд” сэдвээр хөтөлбөр гаргаж оролцохоор бэлтгэж байна.

2019 оны Дэлхийн тамхигүй өдрөөр тамхины хэрэглээ хүн амын уушигны эрүүл мэндэд олон замаар хохирол учруулж байгаад анхаарлаа хандуулж байна. Үүнд: Уушигны хавдар. Тамхины хэрэглээ уушигны хавдар үүсгэж, хавдартай гурван тохиолдол бүрийн нэгийг үхэлд хүргэж байна. Гэрт, ажлын байранд тамхи татах нь уушигны хавдрын эрсдлийг нэмэгдүүлдэг. Тамхинаас татгалзах нь эрсдлийг бууруулж 10 жилийн дараа уушигны хавдраар өвдөх эрсдэл 50 хувиар бууруулна.

Амьсгалын замын архаг өвчлөл.Тамхи татах нь уушигны архаг бөглөрөлт өвчин үүсгэдэг гол шалтгаан юм. Уушигны салст бүрхэвчийг цочроож, шингэнээр дүүргэж амьсгалахад хүндрэл учруулдаг. Тамхины утаа уушигны хөгжлийг алдагдуулснаар тамхи татдаг хүмүүсийн дунд уг өвчин үүсэх эрсдэл өндөр байдаг. Мөн гуурсан хоолойн багтраа өвчинг хүндрүүлж, хөгжлийн бэрхшээлд хүргэдэг. Тамхинаас эрт татгалзах нь уушигны архаг бөглөрөлт өвчний явцыг удаашруулж, багтраа өвчний шинж тэмдгийг багасгах хамгийн үр дүнтэй арга юм.

Амьдралын явцад нөлөөлөх нь. Жирэмсэн эмэгтэй тамхи татах, дам тамхидалтад өртөхөд урагт нөлөөлж уушигны өсөлт, үйл ажиллагааг алдагдуулдаг. Бага насны хүүхдүүд дам тамхидалтад өртснөөр гуурсан хоолойн үрэвсэл, багтраа, уушигны үрэвсэл, уушигны доод замын болон амьсгалын доод замын халдварт өвчнөөр өвдөх эрсдэл нэмэгддэг. Жил бүр дэлхийд 165 000 хүүхэд 5 нас хүрэхээсээ өмнө тамхитай холбоотой амьсгалын доод замын халдварын улмаас нас барж байна. Бага насандаа амьсгалын доод замын халдвараар өвдөх нь насанд хүрээд уушигны архаг бөглөрөлт өвчнөөр өвдөх эрсдлийг нэмэгдүүлж байна.

Сүрьеэ өвчин нь уушгийг гэмтээж үйл ажиллагааг бууруулдаг. Тамхины найрлаганд ордог химийн бодисууд 4 хүн тутмын 1-д тээгдэж байдаг сүрьеэгийн далд халдварыг сэдрээдэг байна. Тамхи татах нь идэвхитэй хэлбэрийн сүрьеэг идэвхижүүлж амьсгалын дутагдалд оруулдаг. Агаарын бохирдол. Тамхи нь агаарын дотоод бохирдлыг хамгийн их бохирдуулагч. 7000 химийн нэгдэл агуулдагаас 69 нь хорт хавдар үүсгэдэг. Утаа нь үнэргүй, харагдахгүй байж болох ч 5 цаг байхад л уушигны үйл ажиллагааг алдагдуулж, архаг өвчин хавдрын эрсдлийг нэмэгдүүлдэг.

Кампанит ажлын гол зорилго:

Уушигны эрүүл мэндийг сайжруулах хамгийн үр дүнтэй арга зам бол тамхины хэрэглээ, дам тамхидалтад өртөлтийг бууруулах юм. Нийт хүн ам, түүний дотор тамхи татагчдын дунд тамхи уушгинд хэрхэн нөлөөлдөг талаарх мэдлэг зарим орнуудад доогуур байна. Уушигны эрүүл мэндэд тамхи хортойгоос гадна уушгины эрүүл мэндийг сайжруулахад тамхины хэрэглээнд хяналт тавих боломж хязгаарлагдмал хэвээр байна.

Кампанит ажил нь хүн амын ойлголтыг дараах чиглэлээр нэмэгдүүлнэ.

✔ Тамхидалт, дам тамхидалтаас үүсэх эрсдэл

✔ Уушигны эрүүл мэндэд үзүүлэх хор нөлөө

✔ Тамхинаас үүдэлтэй, амьсгалын замын архаг өвчин, уушигны хорт хавдрын өвчлөл, нас баралтын цар хэмжээ

✔ Тамхины хэрэглээ, сүрьеэгийн нас баралт хоорондын холбоо

✔ Насны бүлэг бүрт тамхины үзүүлэх хор хөнөөл

✔ Уушигны эрүүл мэнд нь эрүүл мэнд, сайн сайхан байдалд нөлөөлөх чухал ач холбогдолтой

✔ Тамхичдын уушгины эрүүл мэндэд учрах эрсдлийг багасгахын тулд олон нийт, засгийн газрууд руу чиглэсэн хэрэгжихүйц арга хэмжээ авах

Тамхины хэрэглээ нь тамхи татдаг, татдаггүй бүх хүмүүсийн уушигны эрүүл мэндийг алдагдуулагч гол эрсдэлт хүчин зүйл юм.

Тогтвортой хөгжлийн зорилгод хүрэхийн тулд 2030 он гэхэд ХБӨ-ний эндэгдлийн гуравны нэгээр буурах зорилтыг хангах, тамхины хяналтыг дэлхий даяар төр засаг, олон нийтийн өмнө тэргүүн эгнээнд эрэмбэлэх ёстой. Одоогийн байдлаар энэ зорилтод дэлхий нийтээр хүрч чадахгүй байна. Улс орнууд ДЭМБ-ын Тамхины хяналтын суурь конвенцийг бүрэн хэрэгжүүлж, тамхины эрэлтийг бууруулахад чиглэсэн хамгийн үр дүнтэй тамхины хяналтын бодлогыг боловсруулан хэрэгжүүлэх MPOWER-ийг хэрэгжүүлэх замаар тамхины тархалтад хариу өгөх ёстой. Эцэг эх, иргэн бүр өөрсдийн болон хүүхдийнхээ эрүүл мэндийг тамхины хор хөнөөлөөс хамгаалах ажлыг дэмжин ажиллахыг уриалж байна.

Нийслэлийн Засаг даргын Тамгын газрын Цэргийн штаб, нийслэлийн Аялал жуулчлалын газар, “Дуурсах он жилүүд” ТББ хамтран Халхын голын байлдааны ялалтын 80 жилийн ойг угтаж, Улаанбаатар дахь түүх дурсгалын газруудыг түшиглэн Халхын голын байлдааны талаарх өсвөр үеийнхний түүхийн мэдлэгийг нэмэгдүүлэх, Монгол, Зөвлөлтийн дайчдын баатарлаг гавьяаг мөнхжүүлэх, сурагчдын эх орноо хайрлах хүмүүжил төлөвшлийг нэмэгдүүлэх зорилгоор өнөөдөр “Халхын гол тандаа баярлалаа” тойрон аяллыг Монгол дахь Сингапур ерөнхий боловсролын сургуулийн сурагчдыг хамруулан зохион байгуулж байна.

Тойрон аяллын нээлт Зайсан толгой дахь “Хувьсгалт Монгол” танкийн бригадын дурсгалын хөшөөний дэргэд боллоо. Энэ үеэр тойрон аяллын зорилго, хөтөлбөрийг танилцуулж, Зөвлөлтийн дайчдын дурсгалын хөшөөнд цэцэг өргөв. Эндээсээ Монгол Улсын баатар, хурандаа генерал Ж.Лхагвасүрэнгийн хөшөө, Монгол цэргийн музей, Офицеруудын ордны өмнөх Монгол Улсын баатар, хурандаа Л.Дандарын дурсгалын хөшөө, Маршал Г.К.Жуковын дурсгалын гэр музей гэсэн маршрутаар тойрон аялал үргэлжлэх аж.

НЗДТГ-ын Цэргийн штабын Батлан хамгаалах хууль тогтоомж, хяналт шинжилгээ хариуцсан офицер, дэд хурандаа Т.Мөнхбаяр хэлсэн үгэндээ “Энэ онд Халхын голын байлдааны 80 жилийн ой тохиож байна. Энэ хүрээнд Нийслэлийн Засаг даргын 2019 оны А/350 дугаар захирамж гарсан. Захирамжийн дагуу Халх голын байлдааны ойг тэмдэглэх төлөвлөгөө гарч, ажлын хэсэг байгуулагдсан. Өнөөдөр ерөнхий боловсролын сургуулийн сурагчдад Халх голын байлдааны үнэ цэнийг ойлгуулах, Улаанбаатар хотод байгаа түүхийн дурсгалт газруудаар аялуулах ажлыг зохион байгуулж байна. Цаашид бид байлдаанд оролцсон ахмад дайчдынхаа ар гэрт нь очиж, хүндэтгэл үзүүлэх, мөн их, дээд сургуулийн оюутан залууст Халх голын байлдааны үнэ цэнийн талаарх лекц, сургалт хийх зэрэг ажлуудыг зохион байгуулна” гэсэн юм.

Сурагчид өнөөдрийн бидний энэхүү амар тайван амьдрал ямар их үнэ цэнээр олдсоныг, эх орныхоо төлөө амиа хайрлахгүй тулалдсан дайчдын баатарлаг гавьяаг ойлгон мэдэж, түүхийн мэдлэгээ арвижуулсан дурсамж дүүрэн аялал болно хэмээн нээлтийн үеэр зохион байгуулагчид ярьж байв.

Америкийн “Nickelodeon” телевиз 1994-2005 онд гаргаж байсан, алдарт “All that ” инээдмийн шоугаа сэргээн зарлаж, 12-15 настай, комедид сонирхолтой 20 мянган хүүхдийг өрсөлдүүлжээ. Энэ өрсөлдөөнд Чикаго хотод амьдардаг монгол хүү Сэргэлэнгийн Чингүүн тэнцсэн байна.С.Чингүүн “All that ” шоуны албан ёсны жүжигчний эрх авсан нь, зөвхөн Монгол төдийгүй Азийн орнуудын төлөөлөл болж байгаа аж. Тэрээр ширүүн өрсөлдөөн дундаас тодорч шалгарсан авъяаслаг Рийс Кадделл, Габриэл Грийн, Натан Жанак, Кейт Годфри, Райн Алесси, Лекс Лампкин нарын хүүхдүүдтэй инээдмийн хөтөлбөрт тоглох юм байна.