Онцгой байдлын ерөнхий газар, Азийн хөгжлийн банктай хамтран Ядуурлыг бууруулах Япон сангийн санхүүжилтээр хэрэгжүүлж буй “Зуд болон ой, хээрийн түймэртэй тэмцэх олон нийтийн чадавхыг бэхжүүлэх” төслийг хэрэгжүүлэн ажиллаж байна.
Уг төсөл нь Говь-Алтай, Хөвсгөл, Дорнод, Сүхбаатар аймгийн 12 суманд хэрэгжиж байгаа юм. Тэгвэл төсөл хэрэгжиж буй Сүхбаатар аймгийн Түмэнцогт суманд гамшгаас хамгаалах команд штабын сургуулийг зохион байгууллаа. Сургуульд сумын Онцгой комисс, гамшгаас хамгаалах мэргэжлийн анги, аж ахуйн нэгж, байгууллагын удирдах бүрэлдэхүүн хамрагдаж, гамшиг, осол, аюулт үзэгдлээс урьдчилан сэргийлэх, бэлтгэл, бэлэн байдлаа хангах мэдлэгээ дээшлүүлж, сумын гамшгаас хамгаалах төлөвлөгөөг тодотгосон юм. Мөн энэ үеэр Түмэнцогт сумын Засаг даргын А/18 дугаар захирамжаар “Хээрийн түймэртэй тэмцэх сайн дурын хэсэг”-ийг байгуулж, сумын иргэд гал түймэр унтраах, эмнэлгийн анхан шатны тусламж үзүүлэх тактикийн сургуулийг зохион байгуулж, гамшгаас хамгаалах мэдлэгээ бататгалаа.
“Эрдэнэс-Тавантолгой” ХК-ийн хувьцаа эзэмшигчдийн ээлжит хурал 2019 оны 4 дүгээр сарын 30-ны өдөр Төр засгийн үйлчилгээний “Элит” төвийн байранд нээлттэй боллоо.
Онцгой байдлын ерөнхий газрын даргын А/127 дугаар тушаалаар зохион байгуулж байгаа Онцгой байдлын байгууллагын мэргэжлийн аврагч-усчин, шумбагчийн дунд шатны “АУШДС-19.1” сургалт эхэллээ. Сургалт энэ сарын 17-ныг хүртэл ОБЕГ-ын Үндэсний аврах бригад болон Баянгол дүүргийн Усан спорт сургалтын төвд зохион байгуулагдах юм.
УИХ-ын чуулганы нэгдсэн хуралдаанаар ОУПХ-ны удирдах зөвлөлөөс ирүүлсэн дүгнэлтийн хүрээнд С.Зоригийг хөнөөсөн хэргийг судлах үүрэг бүхий Түр хорооны даргаар УИХ-ын гишүүн Ж.Батзанданг томиллоо. Олон улсын парламентын удирдах зөвлөлөөс “Монгол Улсын дээд шүүхийн шийдвэрээр, 2017 онд эцэслэн шийдвэрлэсэн С.Зоригийг хөнөөсөн хэргийн шүүн таслах ажиллагаа нь хүний эрхийн хэмжүүр болон шударга шүүхийн зарчимд нийцээгүй” хэмээн үзжээ. Тиймээс тус зөвлөл уг хэргийг шударга шүүхээр шийдвэрлэх, цаашид ч шийдвэрлэнэ гэдгийг баталгаажуулах үүднээс УИХ дэргэдээ парламентын хянан шалгах чиг үүргийг хэрэгжүүлэх шинэчилсэн хороо байгуулахыг уриалжээ. Энэ дагуу УИХ-ын гишүүн Л.Болд, Ж.Батзандан, Я.Санжмятав, Ц.Нямдорж, А.Сүхбат, Ө.Энхтүвшин, Х.Нямбаатар нарын бүрэлдэхүүнтэй Түр хороог өнгөрсөн сарын 25-нд байгуулсан юм. Түр хороо өчигдөр буюу энэ сарын 01-нд анхны хуралдаанаа хийж, УИХ-ын гишүүн Ж.Батзанданг тус хорооны даргаар томилохоор нэр дэвшүүлснийг өнөөдрийн чуулганд оролцсон гишүүдийн 81.6 хувь дэмжлээ.
УИХ-ын чуулганы нэгдсэн хуралдаан эхэллээ. Өнөөдөр болон маргаашийн чуулганы нэгдсэн хуралдаанаар дараах асуудлуудыг хэлэлцэхээр төлөвлөөд байгаа юм.
Жил бүрийн 05 дугаар сарын 08-нд “Хүмүүнлэгийн өдөр”ийг тэмдэглэн өнгөрүүлдэг. Тус өдрийг тохиолдуулан ОБЕГ-ын дэргэдэх Гамшиг судлалын хүрээлэн, Монголын Улаанзагалмай нийгэмлэгтэй хамтран гамшгаас хамгаалах үйл ажиллагаанд тулгамдаж буй асуудлаар онол, практикийн бага хурлыг зохион байгуулдаг уламжлалтай. Энэ жил “Гамшгийн хохирол, хэрэгцээг үнэлэх аргазүйн асуудал” сэдвийн хүрээнд онол, практикийн бага хурлыг маргааш буюу энэ сарын 03-нд зохион байгуулах гэж байна. Гамшгаас хамгаалах үйл ажиллагаа болон гамшгийн хохирол, хэрэгцээг үнэлгээнд тулгамдаж буй асуудлыг тодорхойлох, энэ чиглэлээр эрдэмтэн, судлаачид, төрийн болон төрийн бус байгууллагын мэргэжилтнүүдийн төлөөлөлтэй санал бодлоо солилцох, тулгарч буй асуудлыг шийдвэрлэх арга замыг хамтран тодорхойлох зорилготой юм. Хуралд ОБЕГ, МУЗН, төрийн болон төрийн бус байгууллага, олон улсын байгууллагын мэргэжилтнүүд, их, дээд сургууль, эрдэм шинжилгээний хүрээлэн, судалгааны төвийн эрдэмтэн, судлаачид оролцоно. Өнгөрсөн жил зохион байгуулагдсан онол практикийн бага хурлаар орон нутаг дахь гамшгийн эрсдэлийг бууруулах үйл ажиллагаанд тулгамдаж байгаа асуудлыг хөндөж, Онцгой байдлын ерөнхий газар, холбогдох яам, агентлаг, эрдэм шинжилгээний байгууллагууд, орон нутгийн удирдлага, төрийн бус байгууллага, төсөл хөтөлбөр, олон нийтийн бүлэгт хандаж, цаашид авч хэрэгжүүлэх арга замыг тодорхойлох зөвлөмжийг гарган, ажиллаж байна гэж Онцгой байдлын ерөнхий газраас мэдээллээ.