УИХ-ын намрын чуулган хаасныг мэдэгдлээ.
УИХ-ын 2018 оны намрын ээлжит чуулган ажлын 88 өдөр чуулсан байна. Энэ хугацаанд УИХ-ын нэгдсэн чуулган 31, Байнгын болон Дэд, Түр хороод 92 удаа хуралдаж, бие даасан 5, хуульд өөрчлөлт оруулах тухай 25, зээлийн болон гэрээ хэлэлцээр соёрхон батлах тухай 25, хууль хүчингүй болсонд тооцох тухай 3 буюу нийт 46 хуулийг баталжээ. Мөн УИХ-ын 41 тогтоол хэлэлцэн баталсан болохыг УИХ-ын дарга Г.Занданшатар хэллээ.
Тэрбээр, “Улс төрийн нөхцөл байдлаас шалтгаалан чуулганы 9 удаагийн хуралдаан хойшилсон ч Монгол Улсын 2019 оны Төсвийн тухай, Нийгмийн даатгалын сангийн 2019 оны төсвийн тухай, Эрүүл мэндийн даатгалын сангийн 2019 оны төсвийн тухай зэрэг хуулийн хугацаатай, улс орны эдийн засаг, нийгмийн хөгжилд чухал ач холбогдол бүхий асуудлаа шийдэж чадсанв. УИХ-аас нийгэмд хүлээлт үүсгэсэн, зайлшгүй шийдвэл зохих хөрөнгө оруулалтын болон бусад зардлыг төсөв санхүүгийн боломжтой уялдуулан шийдвэрлэх чиглэлийг тууштай баримталж ажиллаа. УИХ хууль тогтоох бүрэн эрхээс гадна хянан шалгах бүрэн эрхээ зохих ёсоор хэрэгжүүлэхэд анхаарч хийж хэрэгжүүллээ. Нийгэм, эдийн засгийн амин чухал зарим асуудлыг шийдвэрлэх зорилгоор ээлжит бус чуулган зарлан хуралдуулах болно” хэмээв. Мөн тэрбээр удахгүй болох монгол түмний уламжлалт баяр Цагаан сарын мэндчилгээг ард түмэндээ дэвшүүлж, төрлөөрөө түвшин амгалан, элгээрээ энх амгалан, төр улсаараа элбэг дэлбэг, төрөл садан хотлоороо сайхан шинэлэхийг хүсэн ерөөлөө.
Өнөөдрийн УИХ-ын чуулганы нэгдсэн хуралдаанаар Эрүүгийн хуулийг дагаж мөрдөх журмын тухай хуульд өөрчлөлт оруулах тухай хуулийн төслийг хэлэлцлээ. Уг хуулийн төслөөр “Зорчих эрхийг хязгаарлах” гэсэн заалт амьдралд нийцэхгүй байгаагаас хэрэгжилтийг 2021 он хүртэл хойшлуулах саналыг оруулж ирсэн юм. Учир нь уг хуулийг хэрэгжүүлэхэд техникийн нөхцөл бүрдээгүй гэж үзсэн. Ийнхүү санал хураахад Зорчих эрхийг хязгаарлах хуулийн хэрэгжилтийг хойшлуулах төслийг хэлэлцэхийг дэмжсэн юм. Мөн УИХ-ын чуулганы үдээш хойших нэгдсэн хуралдаанаар ЗГХЭГ-ын дарга, Зам тээврийн сайд, БСШУС яамны сайд нарын томилгоог хэлэлцэн баталж томиллоо. Түүнчлэн Хэнтий аймгийн 42-р тойрогт болох ээлжит сонгуулийн хугацаа болон зарцуулах төсөв санхүүг батлав.
Ийнхүү УИХ-ын намрын чуулган хаасныг УИХ-ын дарга Г.Занданшатар мэдэгдлээ.
УИХ-ын чуулганы 2019 оны 02 дугаар сарын 02-ны өдрийн нэгдсэн хуралдаанаар Лувсаннамсрайн Оюун-Эрдэнийг Монгол Улсын сайд, Засгийн газрын Хэрэг эрхлэх газрын даргаар томиллоо.
Японы мэргэжлийн сүмо бөхөд багагүй дуулианыг тарьсан Таканоива А.Баасандорж өнөөдөр/2019.02.02/ албан ёсоор зодог тайллаа. Токио хотын сүмогийн ордонд болсон энэхүү арга хэмжээнд аварга Харүмафүжи Д.Бямбадорж, Какүрюү М.Ананд нарын сүмочид оролцжээ. Энэ жил 29 настай Таканоива А.Баасандорж 2009 онд мэргэжлийн сүмод хөл тавьж, 2014 оны нэгдүгээр сараас эхлэн дээд зиндаанд барилдаж эхэлсэн билээ. Мэргэжлийн сүмод амжилттай барилдаж байсан Таканоива А.Баасандорж 2017 оны аравдугаар сард аварга Харүмафүжи Д.Бямбадоржтой маргалдаж, улмаар томоохон дуулиан тарьж байсан юм. Мөн тэрбээр өнгөрөгч 2018 оны арванхоёрдугаар сард доод зиндааны залуу бөхийг юмаа мартсан гэж цохисон хэргээр дахин олны анхааралд өртсөн. Сүмогийн ертөнцөд багагүй дуулианыг удаа дараа гаргасан Таканоива А.Баасандорж албан ёсоор зодог тайллаа.
УИХ-ын чуулганы нэгдсэн хуралдаанаар БСШУС-ын сайдаар нэр дэвшсэн Ё.Баатарбилэг гишүүнийг томилох эсэх асуудлыг хэлэлцлээ. Гишүүд асуулт тодруулга авсны дараа санал хураалт явуулахад хуралдаанд оролцсон гишүүдийн 91.5 хувь нь дэмжлээ.
УИХ-ын чуулганы нэгдсэн хуралдаанаар ЗГХЭГ-ын даргад нэр дэвшиж буй Л.Оюун-Эрдэнийг томилох эсэх асуудлыг хэлэлцэж байна. Хэлэлцүүлгийн шатанд гишүүд асуулт тодруулга авч байна.
Монголын уламжлалт сар шинийн баярын амралтын өдрүүдэд эмнэлгийн тусламж, үйлчилгээг зохицуулах тухай Нийслэлийн Эрүүл мэндийн газрын даргын тушаал гарлаа. Энэхүү тушаалд заасны дагуу баяраар ажиллах эрүүл мэндийн байгууллагуудын цагийн хуваарь, утасны жагсаалтыг хүргэж байна.