Монгол Улсын Ерөнхийлөгч Х.Баттулга эрхэлсэн салбартаа олон жил үр бүтээлтэй ажилласан эрхмүүдэд төрийн дээд, одон медаль гардуулан өглөө. Энэ өдөр Баян-Өлгий аймгийн Өлгий сумын дунд сургуулийн сурагч Н.Айшолпанд Алтангадас одон хүртээлээ. “Бүргэдчин охин” хэмээн алдаршсан тэрбээр өнгөрсөн онд хүйсээр ялгаварлах үзэл, ойлголтыг өөрчилсөн хэмээн “Asia Game Changer Awards”-аас шагнал хүртсэн юм. Израйлийн гэрэл зурагчин Ашер Свиденский 2014 онд Баян-Өлгий аймагт ажиллах үеэрээ 13 настай Н.Айшолпан охиныг бүргэдээр ан хийж буй тухай гэрэл зургийн сурвалжилгыг “BBC” агентлагийн цахим хуудаснаа нийтэлсэн байдаг. Ингэснээр “The Eagle Huntress” хэмээх Н.Айшолпаны тухай баримтат киног бүтээхэд хүргэсэн ажээ.
Баярын өдрүүдэд замын хөдөлгөөний аюулгүй байдлыг хангах, зам тээврийн осол хэрэг, зөрчлөөс урьдчилан сэргийлэх зорилгоор улсын хэмжээнд “Шинэ жил-2018” арга хэмжээ явагдаж буй. Улаанбаатар хотоос хөдөө, орон нутгийг чиглэх хөдөлгөөн нэмэгдэж байгаа энэ үед орон нутгийн цагдаагийн байгууллагаас байнгын болон 24 цагийн хөдөлгөөнт эргүүл, хяналт шалгалтын ажиллагааг зохион байгуулж байна. Тээврийн цагдаагийн албанаас орон нутгийн замуудад согтууруулах ундааны зүйл хэрэглэсэн үедээ тээврийн хэрэгсэл жолоодох, бүрэн бус тээврийн хэрэгслээр замын хөдөлгөөнд оролцох, хүн ба ачаа тээвэрлэх журам зөрчих, хурд хэтрүүлэх болон тээврийн хэрэгсэл ашиглан үйлдэгддэг бусад төрлийн гэмт хэрэг, зөрчлийг илрүүлэх, таслан зогсоох, зөрчлийг арилгуулах, урьдчилан сэргийлэх чиглэлээр хяналт шалгалтыг явуулж байна. Иймд зөвхөн “цагдаад баригдахгүй байх” гэх бодлоос илүүтэйгээр өөрийн болон гэр бүл, бусад хүмүүсийн амь нас, эрүүл мэнд, эд хөрөнгийг хамгаалах зорилгоор хурд хэтрүүлэхгүй байх, хамгаалах бүс хэрэглэх, хүүхдийг зориулалтын хамгаалах хэрэгсэлтэй тээвэрлэх зэргээр Замын хөдөлгөөний дүрмээ баримталснаар та осол, аюулаас 90 хүртэл хувиар хамгаалагдах боломжтой юм гэдгийг зөвлөж байна.
Сүхбаатар дүүргийн 9, 10, 11 дүгээр хорооны орон сууцны 7-р хорооллын Б хэсэгчилсэн талбайд гэр хорооллын дахин төлөвлөлтийн төслийн эхний ээлжийн 60 айлын орон сууцны барилга өнгөрсөн оны дөрөвдүгээр сард ашиглалтад орсон. Тэгвэл өнөөдөр дараагийн 60 айлын орон сууц ашиглалтад орж, иргэдэд түлхүүр гардуулах ёслолын үйл ажиллагаа боллоо. Ёслолын үйл ажиллагаанд нийслэлийн Засаг дарга бөгөөд Улаанбаатар хотын Захирагчийн үүргийг түр орлон гүйцэтгэгч Ж.Батбаясгалан, нийслэлийн Засаг даргын орлогч П.Баярхүү, Хот төлөвлөлт, ерөнхий төлөвлөгөөний газрын орлогч дарга Ц.Тулга, НИТХ-ын нарийн бичгийн дарга Б.Батбямба болон дахин төлөвлөлтөд хамрагдсан иргэдийн төлөөлөл, холбогдох албаны хүмүүс оролцлоо.
Жил бүрийн арванхоёрдугаар сарын 29-ний өдрийг Үндэсний эрх чөлөө, тусгаар тогтнолоо сэргээсний өдөр болгон тэмдэглэдэг. Энэ өдөр Монгол Улсын Ерөнхийлөгч Х.Баттулга Төрийн соёрхол шагнал гардуулж, Чингисийн хөшөөнд хүндэтгэл үзүүлнэ.
Жил бүрийн эхний улиралд НӨАТ-ын урамшуулал олгодог. Энэ оны арваннэгдүгээр сарын 30-ны өдрийн байдлаар 362 сая 832 мянган ширхэг 639 и-баримт хэвлэгдэж, 238 сая 737 мянга 388 и-баримт баталгаажсан байна.
Өнөөдөр НИТХ-аар хотын даргыг томилох асуудлыг хэлэлцэнэ.Үүнээс өмнө НИТХ-ын Тэргүүлэгчид хуралдаж,хотын даргад нэр дэвшигчийг тодруулан, МАН-ын Удирдах зөвлөл рүү нэрийг нь оруулах юм. Одоогоор НИТХ-ын тэргүүлэгчид болон МАН-ын Удирдах зөвлөлөөс хэдэн хүний нэр оруулах нь тодорхойгүй байна.