Month: September 2018

УУХҮЯ, СЕСМИМ төсөл, Нийгмийн бодлого хөгжлийн судалгааны хүрээлэн /НБХСХ/ хамтран өнөөдөр “Эрдэс баялгийн салбарын жендэрийн нөлөөллийн үнэлгээ”-ний урьдчилсан үр дүнг танилцуулах уулзалт хэлэлцүүлгийг зохион байгууллаа.

Уулзалтын үеэр судалгааны үр дүнг урьдчилсан байдлаар танилцуулж, судалгааны дүгнэлт, бодлогын зөвлөмж дээр оролцогчдоосоо санал авах юм. Уулзалт хэлэлцүүлэгт Ерөнхий сайдын Жендерийн асуудал эрхэлсэн зөвлөх Д.Сүхжаргалмаа Жендерийн үндэсний хорооны нарийн бичгийн дарга бөгөөд Ажлын албаны дарга Т.Энхбаяр, СЕСМИМ төслийн Монгол дахь захирлын үүргийг түр орлон гүйцэтгэгч Вит Семинюк, төрийн болон төрийн бус байгууллагын жендерийн мэргэжилтнүүд оролцож байна.

Монгол Улсын олборлох салбарын менежментийг сайжруулах Канадын Засгийн газрын СЕСМИМ төслийн дэмжлэгтэйгээр УУХҮЯ, НБХСХ хамтран “Эрдэс баялгийн салбарын жендэрийн нөлөөллийн үнэлгээ”-ний судалгааг хийжээ. Энэ нь Монголд анх удаа хийгдсэн томоохон хэмжээний, судалгаан суурилсан энэхүү цогц судалгаа бөгөөд “Эрдэс баялгийн салбарт баримтлах бодлого”-ыг боловсруулахад ач холбогдолтой юм.

Судалгаанд Улаанбаатар хотын Налайх, Багануур дүүрэг болон Өмнөговь, Дорнод, Дорноговь, Орхон, Ховд аймгуудыг хамруулжээ. Эрдэс баялгийн салбарын удирдлага, зохион байгуулалт, хүний нөөцийн болон аж ахуйн нэгж байгууллагын жендерийн асуудал, салбарын хүрээнд орон нутаг, өрх иргэдэд үзүүлж буй жедерийн нөлөөллийг үнэлэх, нотолгоонд суурилсан үр дүнтэй судалгаа болсон талаар мэргэжилтнүүд хэлж байв.

Шинээр томилогдсон Ховд аймгийн Засаг дарга Б.Дүгэржав “Ховд дулааны станц” болон “Бадамлах дөл” дулааны станцын удирдлагыг ёсдүгээр сарын 26-нд хүлээн авч уулзлаа.Тэрээр хүйтний ам наашилж цаг агаар муудаж, хүйтэрч байгаа учир орон сууцны оршин суугчид, нялх балчир хүүхдүүд, ахмадуудын тав тух алдагдаж байгааг харгалзан хугацаанаас өмнө халаалт дулаанаар яаралтай хангах үүрэг чиглэл өглөө. Эхний ээлжинд орон сууцны айл өрх, сургууль, цэцэрлэг, эмнэлгийн халаалтыг өгөхийг сануулав.

Ховд Дулааны станц хувьд өвлийн бэлтгэлээ тодорхой хэмжээгээр хангасан тул халаалтыг есдүгээр сарын 26-наас урьдчилан өгөх боломжтой гэсэн бол “Бадамлах Дөл” дулааны станц шугам шүлжээний засвар үйлчилгээ хийх, нүүрсний нөөц бүрдүүлэх, өр авлага барагдуулах зэрэг багаггүй ажлыг гүйцэтгэх шаардлагатай байгаа аж.

Ховд аймгийн дулааны станцууд жил бүрийн 10 дугаар сарын 1-нээс иргэд байгууллагыг халаалтаар хангаж эхэлдэг. Шугам сүлжээний эвдрэл гэмтлийг олох, засвар үйлчилгээ хийх зэрэг ажил ундарсаар байтал бараг 10 дугаар сарын дунд хүрдэг талаар албаныхан ярилаа.

Улиастайн уулзвараас Баянзүрхийн гүүр, Баянзүрхийн товчоо орчмын нийт 3.5 км авто замын өргөтгөл, шинэчлэлтийн ажил хийгдэж, зорчих хэсгийг 2018 оны 09 дүгээр сарын 20-ны өдөр нээсэн билээ.

Үргэлжлүүлэн өнөөдрийн байдлаар ОХУ-ын “Бриз” группийн “Формула-К” ХХК-ний үйлдвэрлэсэн эрс тэс уур амьсгалтай бүс нутагт зориулан бэлтгэсэн бүтээгдэхүүнээр замын тэмдэглэгээний ажлыг Монгол Улсад анх удаа хийж байна.

Энэхүү тэмдэглээ нь зуны улиралд хайлж, хэвээ алдахгүй байх, өвлийн улиралд агшиж, хэврэг болохгүй байх чанарыг агуулсан тусгай модификатор найрлага орсноороо онцлогтой.

Тэмдэглэгээний ажлыг “Үйлсийн зам” ХХК нь Hoffman термопластикийн машинаар гүйцэтгэж байгаа юм. Харин технологийн явцыг Швейцарын ретрорефлектометр ба спектрофотометр багажуудаар хянаж байгаа аж.

Мөн тус замд ОХУ-ын “Красдорзнак” ХХК-ний үйлдвэрлэсэн дүрсийг өндөр чанартай гэрэл ойлгогч алмазан хальсан дээр буулгасан тэмдэг шинээр тавигдах гэнэ.

Эх сурвалж: НАЗХГ

Нийслэлийн ИТХ-ын Тэргүүлэгчид өнөөдөр хуралдаж Орон нутгийн өмчит хаалттай ХК-иудын хараат бус гишүүдийг томилох, хөрөнгө бүртгэж авах, гудамж, цэцэрлэгт хүрээлэн шинээр нэршүүлэх болон “Хангарьд” одонгоор шагнах гэсэн 5 асуудлыг хэлэлцэж тогтоол гаргав.

“Нийслэлийн орон сууцны корпораци”, “Олон улсын худалдааны ложистик төв” хаалттай ХК-ийн ТУЗ-ийн хараат бус гишүүдийг томилох асуудал дээр НИТХ-ын дарга С.Амарсайхан, “Тухайн компаниудын ТУЗ-ийн 9 гишүүний 3 нь хараат бус гишүүд байх Компанийн тухай хуулийн заалтыг мөрдөхдөө мэргэжлийн, ашиг сонирхолын зөрчилгүй хүмүүсийг томилох, ингэхдээ хуулийн байгууллагын өмнөөс дүгнэлт хийж дураар авирлах ёс зүйгүй байдал гаргахгүй байхыг сануулж байв. “Хэрэв ийм байдал гаргаж байна гэдэг нь төрийн өмчит компаниудад танил талын, өөрийн төлөөллийн хүмүүсээ ар, өврийн хаалгаар оруулж байна гэсэн үг. Ийм байдал гаргахгүйгээр төрийн ажил дэг журам, хууль ёсны дагуу, албан ёсоор шударга явагдах учиртай” гэдгийг онцлож байв. Нийслэлийн Өмчийн харилцааны газрын дарга Ч.Однасан, “НОСК-ийн ТУЗ-ийн хараат бус гишүүнээр нэр дэвшсэн Б.Хонгор, Ц.Амарсанаа, “Олон улсын худалдааны ложистик төв”-ийн ТУЗ-ийн хараат бус гишүүнд нэр дэвшиж буй Ш.Алтанчимэг нарыг АТГ-аар шалгуулж ашиг сонирхолын зөрчилгүйг тодорхойлуулсан, эрхзүйч, санхүүч, даатгалын мэргэжлийн хүмүүс байгаа” гэж танилцуулснаар НИТХ-ын Тэргүүлэгчдийн хурлын тогтоолоор нэр дурдсан хүмүүсийг хэлэлцэн батлав.

Нийслэлийн Засаг даргын 2013 оны захирамжаар Баянзүрх дүүргийн VIII, XVI хороонд гэр хорооллын дахин төлөвлөлтийн төсөл хэрэгжүүлж буй “Баганат өргөө”, “Гангар инвест” ХХК-иудын барьж, ашиглалтад оруулж буй ус, дулаан дамжуулах төв, шугам сүлжээг нийслэлийн өмчид бүртгэх асуудал байв. Үндэсний батлан хамгаалахын их сургууль орчимд байгуулсан энэ төвийг нийслэл болон Хөгжлийн банкны 12.4 тэрбум төгрөгийн санхүүжилтээр барьжээ. Уг инженерийн байгууламжийг “Орон сууц,нийтийн аж ахуйн удирдах газар” ОНӨААТҮГ-ын дансанд бүртгэж, ашиглалт, хамгаалалтыг нь хариуцуулах тогтоолын төслийг мөн нийслэлийн Өмчийн харилцааны газрын дарга Ч.Однасан танилцуулсан юм.

Тэргүүлэгч Б.Батнасан тогтоолын төсөлтэй холбоотойгоор, “Ямар нэг байгууллагын дансанд хөрөнгө бүртгэхдээ ашиглалт, арчлалтын зардлыг нь хаанаас гаргахыг тооцож, тухайн байгууллагын удирдлагаас санал асууж байх нь зүйтэй” гэдгийг хэлж байв. Нийслэлийн ИТХ-ын дарга С.Амарсайхан шинээр ашиглалтад оруулж буй хөрөнгийг эзэнгүйдүүлж болохгүйг анхааруулснаар Тэргүүлэгчдийн санал хураалтаар ус, дулаан дамжуулах төв, шугам сүлжээг өмчид бүртгэн авлаа.

Гамшгаас хамгаалах бэлэн байдлын үзлэгийг Завхан аймагт 09 дүгээр сарын 23-наас эхлэн зохион байгуулж байна. Гамшгаас хамгаалах бэлэн байдлын үзлэгийг явуулах, мэргэжил, арга зүйн зөвлөгөө өгөх, удирдлага зохион байгуулалтаар хангахаар Онцгой байдлын ерөнхий газрын тэргүүн дэд дарга, бригадын генерал Г.Ариунбуян, ГШУГ-ын Мэргэжлийн удирдлага, зохицуулалтын хэлтсийн дарга, дэд хурандаа Ж.Дамдинсүрэн нараар ахлуулсан ажлын хэсгийн бүрэлдэхүүн тус аймагт ажиллаж байгаа юм.

Энэ сарын 30-ны өдрийг хүртэл үргэлжлэх бэлэн байдлын үзлэгт Завхан аймгийн 12 сум, Увс аймгийн 10 сумын Онцгой комисс, гамшгаас хамгаалах мэргэжлийн ангийн бие бүрэлдэхүүн хамрагдана.

Үзлэг шалгалтаар сумдын гамшгаас хамгаалах мэргэжлийн ангийн бэлтгэл бэлэн байдал, гамшгаас хамгаалах төлөвлөгөөний хэрэгжилт, хүч хэрэгслийн бэлэн байдал, үүрэг гүйцэтгэх чадварыг дээшлүүлэх талаар хэрэгжүүлж байгаа үйл ажиллагааны чиглэл болон өвөлжилтийн бэлтгэл ажилтай танилцаж, мэргэжил, аргазүйн зөвлөгөө өгөх юм гэж Онцгой байдлын ерөнхий газраас мэдээллээ.

Нийслэлийн Хүүхэд, гэр бүлийн хөгжлийн газраас Нийслэл, есөн дүүрэгт хэрэгжүүлсэн Хүүхдийн хөгжил, хамгааллыг сайжруулах үндэсний хөтөлбөрийн хүрээнд хийгдсэн үйл ажиллагаа, түүнд зарцуулагдсан төсөвт тайлан хэлэлцүүлгийг 2018 оны 09 дүгээр сарын 25-ны 09 цагаас 13 цагийн хооронд Хүүхэд, залуучуудын сургалт хүмүүжлийн тусгай цогцолборын танхимд нээлттэй хэлэлцлээ.

Хэлэлцүүлэгт НИТХ-ын дарга С.Амарсайхан болон НИТХ-ын Нийгмийн хөгжлийн хорооны дарга Д.Мөнхжаргал гишүүд Ц.Одонтунгалаг, М.Эрдэнэтуяа нар мөн НЗД-ын Ядуурлыг бууруулах, хөдөлмөр эрхлэлтийн асуудал хариуцсан төслүүдийн удирдагч Нийслэлийн Засаг даргын орлогч Д.Энхтөр, нийгмийн хөгжлийн хэлтсийн хүүхдийн асуудал хариуцсан мэргэжилтэн Чингүүнжав, ЗГХА-ГБХЗХГ-ын санхүү хэлтсийн ахлах эдийн засагч Мөнхболор нар оролцож Нийслэл дүүрэгт хэрэгжсэн 1-09 сар хүртэлх хийж хэрэгжүүлсэн үйл ажиллагааны тайланг сонсож санал дүгнэлтээ хэлэлцлээ.

Тайлангаас харахад 2018 оноос хүүхдийн хөгжил хамгааллын зардал олгогдож эхэлсэнтэй холбоотойгоор дүүрэг бүрт төсөв хуваарилагдаж, түүний хүрээнд хүүхдэд чиглэсэн ажил үйлчилгээний чанар хүртээмж нэмэгдсэн ба илүү хүүхдийн хөгжлийн ажлууд, мөн хүүхдийг аливаа эрсдэл, хүчирхийллээс урьдчилан сэргийлэх чиглэлд төсөв илүү зарцуулагдсан байна. Хүүхэд хамгааллын хариу үйлчилгээ өмнөх оныхоос 20-30 хувиар нэмэгдсэн, иргэд олон нийт, эцэг эхийн оролцоо сайжирсан зэрэг үр дүнгүүд гарсан байна гэж нийслэлийн Хүүхэд, гэр бүлийн хөгжлийн газраас мэдээллээ.