Төсвийн байнгын хорооны өнөөдрийн хуралдааны эхэнд УИХ-ын гишүүн Н.Учралаас 2018 оны 01 дүгээр сарын 26-ны өдөр өргөн мэдүүлсэн Төсвийн тухай хуульд нэмэлт оруулах тухай хуулийн төслийн эцсийн хэлэлцүүлгийг хийлээ. Хэлэлцэж байгаа асуудалтай холбогдуулан асуулт асуух гишүүн байгаагүй тул энэ талаарх Байнгын хорооны санал, дүгнэлтийг УИХ-ын гишүүн Ч.Улаан чуулганы нэгдсэн хуралдаанд танилцуулахаар тогтлоо.
Үргэлжлүүлэн “Хууль хэрэгжүүлэх арга хэмжээний тухай” УИХ-ын тогтоолын төслийн анхны хэлэлцүүлгийг хийв.
Тогтоолын төсөлд “Бүх салбарт мөрдөгдөж байгаа зардлын норм, норматив, стандартыг валютын ханш, зах зээл дэх бараа, ажил үйлчилгээний үнийн өөрчлөлт, техник, технологийн дэвшлийг үндэслэн шинэчлэх ажлыг зохион байгуулах, урсгал болон хөрөнгийн зардлын төлөвлөлт, төсвийн гүйцэтгэлийн хяналт хийхэд эдгээр норм, норматив, стандартыг хэрхэн ашиглах талаар холбогдох хуульд заасан журам, зааврыг баталж мөрдүүлэх, шаардлагатай бол хуульд өөрчлөлт оруулах төслийг боловсруулж Улсын Их Хуралд өргөн мэдүүлэх”-ийг Засгийн газрын тэргүүнд даалгахаар тусгажээ.
Ажлын хэсгийн зүгээс тогтоолын төслийн хоёрдугаар заалт буюу “Монгол Улсын 2019 оны төсвийн төслийг боловсруулахдаа Төсвийн тухай хуульд нийцүүлэн баталсан зураг, төсөвгүй хөрөнгө оруулалтын төсөл, арга хэмжээг тусгахгүй байх зарчмыг мөрдлөг болгох” гэснийг татаж авлаа.
Иймд УИХ-ын гишүүн Ч.Улаан “Хууль хэрэгжүүлэх арга хэмжээний тухай” тогтоолын төслийг анхны хэлэлцүүлгээр нь батлах горимын санал гаргасныг Байнгын хорооны гишүүдийн 81.8 хувь нь дэмжив.
Хуралдааны төгсгөлд Засгийн газраас өргөн мэдүүлсэн Банкийг дахин хөрөнгөжүүлэх тухай хуулийн төслийн анхны хэлэлцүүлгийг хаалттайгаар хийлээ гэж Улсын Их Хурлын Хэвлэл мэдээлэл, олон нийттэй харилцах хэлтсээс мэдээлэв.
Нийслэлийн Хан-Уул дүүргийн 11 дүгээр хороо, “Чингисийн өргөө” амралтын газраас урд зүгт 200 метр “Богд Хан” ууланд алхалт хийж явсан иргэн амиа алдсан хэрэг гарчээ. Тодруулбал нийслэлийн Баянзүрх дүүргийн харьяат иргэн 61 настай эрэгтэй Д хадан дээрээс унаж бэртсэн тухай дуудлага өчигдөр өдрийн 11:56 цагт хүлээн авч Нийслэлийн Аврах ангийн 8 алба хаагч, 2 автомашинтай 7.5 км замыг туулан 12:10 цагт очжээ. Ингэхэд иргэн Д аль хэдийн нас барсан байжээ. Тиймээс цогцсыг буулгаж, цагдаагийн байгууллагад шилжүүлэн өгсөн байна.
Улаанбаатар хотын хэмжээнд 2018 оны зургаадугаар сарын 4-5-нд иргэд, байгууллагаас 1908 удаа дуудлага иржээ. Үүнээс гэмт хэргийн 126, зөрчлийн 1484, зам тээврийн ослын 298 мэдээллийг шалгасан байна. Энэ өдөр гэмт хэргийн шинжтэй 70 үйлдлээс 38 хэргийн эзэн холбогдогчийг илрүүлжээ.
Өнөөдөр буюу 06 сарын 5-ны өдөр “Монголд кино шүүмжийг хэрхэн хөгжүүлэх вэ?” сэдэвт хэлэлцүүлэг “Алтан хальс” кино наадмын хүрээнд болох ажээ. Хэлэлцүүлэг 17:00 цагт, “Алтан хальс” кино наадам зохиогдоөж буй Улсын их дэлгүүрийн iCinema кино театрт болох бөгөөд кинонд хайртай, кино шүүмж сонирхогч хэн бүхнийг урьж буйгаа зохион байгуулагчид уламжиллаа. Хэлэлцүүлэг үнэ төлбөргүй бөгөөд хүрэлцэн очсон хүмүүс үзэл бодлоо чөлөөтэй илэрхийлж, оролцох боломжтой юм байна. 
Бээжингийн Эмэгтэйчүүдийн Холбооны дэд Ерөнхийлөгч Жоу Жин тэргүүтэй төлөөлөгчид манай улсад айлчилж, Нийслэлийн Нийгмийн Ардчилал Монголын Эмэгтэйчүүдийн Холбоо /НАМЭХ/-той “Хамтран ажиллах гэрээ”-нд гарын үсэг зурлаа.
Монгол Улсын Ерөнхий сайд У.Хүрэлсүх манай улсад айлчилж байгаа Фридрих Эбертийн сангийн Ерөнхийлөгч Курт Бек тэргүүтэй төлөөлөгчдийг хүлээн авч уулзлаа.
Баянзүрх дүүргийн Тохижилт, нийтийн аж ахуйн хэлтсээс ‘’Өгөөмөр өдөр’’ өдөрлөгийг энэ сарын 09-ны өдөр зохион байгуулах гэж байна. Тус өдөрлөг нь “Өөртөө хэрэггүй зүйлээ хэрэгтэй нэгэндээ өгцгөөе” уриатай зохион байгуулагдах бөгөөд хог хаягдлыг ангилан ялгах, багасгах, бууруулах, дахин ашиглах чиглэлээр иргэдийн мэдлэг, оролцоог нэмэгдүүлэх зорилготой.
Ерөнхий сайд асан С.Баяр, Ч.Сайханбилэг нарыг Авлигатай тэмцэх газраас өнгөрсөн дөрөвдүгээр сард сэжигтнээр татан баривчилсан билээ. Тэднийг Оюу толгойн гэрээний асуудлаар 30 хоног цагдан хорих шийдвэрийг Чингэлтэй дүүргийн Эрүүгийн хэргийн анхан шатны шүүх гаргасан. Цагдан хоригдох хугацаанд С.Баярын тулай болон багтраа өвчин хүндэрч эрүүл мэнд ноцтой байдалд орсон гэдгийг өмгөөлөгч нь мэдэгдсэн юм. С.Баярт үзлэг хийж, яаралтай “сайд нарын” гэгдэх II эмнэлэг рүү шилжүүлсэн. Тэрээр одоо сайд нарын II эмнэлэгт хэвтэн эмчлүүлж байгаа. Энэ талаар УИХ-ын гишүүн Ц.Мөнх-оргил “Хууль хяналтын байгууллага шалгаж байгаа асуудал. Хувь хүний хувьд УИХ-ын зөвшөөрөлтэй, Засгийн газрын хамтын шийдвэртэй ийм асуудалд хувь улстөрчдөд зөв бурууг нь тохож, ухаад байвал дараа дараагийн Засгийн газарт шийдвэр гаргах хүн олдох юм болов уу гэж эргэлзэж байна. Тийм аюул байгаа учраас хуулийн байгууллага хурдан нэг тийш нь болгох хэрэгтэй. Би С.Баяртай уулзах хүсэлт тавьсан. С.Баяр дарга хүнээр дамжуулж ‘бие тааруу байна, эмнэлэгт хэвтэж байна, бие гайгүй болохоор эргэж ирж уулзаарай’ гэж хэлүүлсэн. Би хүсэлт тавьж, хүлээгээд байж байна” гэжээ.