Month: January 2018

Өмнөговь аймгийн Даланзадгад хотод шинээр баригдах цэвэрлэх байгууламжийн барилга угсралтын ажлын нээлт өнөөдөр БХБЯ-нд боллоо.

Хоногт 3000 шоо дөрвөлжин метр ус цэвэрлэх хүчин чадалтай энэхүү байгууламжийг барих ажлыг үндэсний “Эн Эй Би”, “Эс Энд Эй Трейд” болон “Сан”, “Байгууламж” компани гүйцэтгэх бөгөөд нийт 8.5 тэрбум төгрөг зарцуулах юм. Дээрх компаниуд 2018-2019 онд барилга, угсралтын ажлыг гүйцэтгэх бөгөөд 2020 онд туршилтын ажиллагааг эхлүүлэх аж. Туршилтын ажлыг 2020 оны зургадугаар сард дуусгаж, бүрэн ашиглалтад оруулахаар төлөвлөсөн байна. Аймгуудад анх удаа Монгол инженерүүд эх орныхоо орны цаг уурын нөхцөлд тохирохуйц цэвэрлэх байгууламжийн шийдэл гаргаж байгаагаараа онцлог гэдгийг Барилга хот байгуулалтын сайд Х.Баделхан нээлтийн үеэр онцлов. Мөн энэхүү шийдлийг бусад аймгийн цэвэрлэх байгууламжийг шинэчлэх жишиг болгохоор төлөвлөж буйгаа дурьдлаа.

Тэрбээр, “Бид удахгүй Арвайхээр, Сайншанд, Цэцэрлэг зэрэг төслийн хотуудад хоногт 3000 шоо дөрвөлжин метр ус цэвэршүүлэх хүчин чадалтай, орчин үеийн бохир ус цэвэрлэх байгууламж барина. Ингэснээр аймгийн төвүүдийн хуучин цэвэрлэх байгууламжийн байгаль орчинд үзүүлэх сөрөг нөлөөлөл багасч, орон нутгийн оршин суугчдын эрүүл ахуй, орчны стандартыг дээшлүүлэх юм. Үүнд нийт 21.17 сая ам.доллар зарцуулахаас Монгол улсын Засгийн газар 8 хувийг гаргах бол үлдсэн 92 хувийг АХБ-ны зээлээр санхүүжүүлнэ” гэлээ.

Өнөөдөр 2018 оны нэгдүгээр сарын 4-20-ны хооронд болох цэргийн үүрэгтэн, бэлтгэл офицеруудын бүртгэлийн ажил эхэллээ. Бүртгэлийг дүүрэг, хороодын Засаг даргын Тамгын газарт ажлын өдрүүдэд 8.30-19.00, амралтын өдрүүдэд 10.00-18.00 цагийн хооронд хийж байна. Цэргийн албаны тухай хуульд:

• Цэргийн бэлтгэл үүрэгтэн нь цэргийн үүрэгтний үнэмлэхтэй байна.
• Цэргийн бэлтгэл алба хаах насны иргэн жил бүр цэргийн бүртгэлд бүртгүүлж, цэргийн үүрэгтний үнэмлэхэд тэмдэглэл хийлгэнэ.
• Цэрэгт бүртгэлтэй мэргэжил эзэмшсэн эмэгтэйчүүд цэргийн бүртгэлд бүртгүүлнэ.
• Цэргийн бүртгэлд тус хуулийн 16.1-д заасан үндэслэлээр чөлөөлөгдсөн, цэргийн жинхэнэ алба хааж байгаа, ял эдэлж байгаа иргэн хамрагдахгүй гэж заасан байдаг. Тиймээс цэргийн бүртгэлд хамрагдах иргэн нутгийн захиргааны анхан шатны нэгж /баг, хороо/-ийн байранд тогтоосон хугацаанд ирж цэргийн бүртгэлд хамрагдах, цэргийн үүрэгтний үнэмлэхийг хаяж, үрэгдүүлэхгүй байх, хаяж үрэгдүүлсэн тохиолдолд нөхөж авах, цэрэг татлагын үеэр гурван сараас дээш хугацаагаар гадаад улсад зорчих бол энэ тухайгаа мэдэгдэх, өөр газар шилжин суурьших тохиолдолд тухайн оршин суугаа газрынхаа цэргийн бүртгэлээс хасуулж, шилжин очсон газраа цэргийн бүртгэлд бүртгүүлэх зэрэг үүргийг хүлээнэ гэдгийг уэргий нбүртгэлийг зохион байгуулж байгаа дүүргийн цэргийн штаб, хороодын ажолын хэсгээс иргэдэд анхаарулж байна.

Цалинтай ээж хөтөлбөрт бүртгүүлэн хамрагдаж буй эхчүүдийн мөнгийг “Капитал”, “Хаан банк”, “Төрийн банк”-аар дамжуулан олгохоор болжээ. Хөтөлбөрт хамрагдахаар бичиг баримтаа бүрдүүлж өгсөн тухайн сараас нь тэтгэмжийг тооцож өгөх бөгөөд хоцорсон сарын мөнгийг нөхөж олгохгүй гэж албаны хүн мэдэгдсэн байна. Уг хөтөлбөрт багтсан өрх толгойлсон эцэг, эхэд олгох тэтгэмжийг ирэх гуравдугаар сарын 20-ноос эхлэн улиралд нэг удаа олгоно. Харин бусад төрлийн тэтгэмжийг сар бүрийн 20-ноос олгохоор болж байгаа аж.

Урьдчилсан тооцоогоор 0-3 насны хүүхэдтэй 135 мянган эхэд нийт 81 тэрбум төгрөгийн тэтгэмж олгохоор улсын төсөвт суулгаж өгсөн. Харин өрх толгойлсон 16 500 эцэг, эхэд нийт 15.8 тэрбум, ихэр хүүхдийн мөнгийг жилд 1000 ихэр мэндэлдэг гэж тооцон 1.7 тэрбум, 2018 онд 98 мянган жирэмсэн эх байна гэж урьдчилан тооцсоны дүнд 43.7 тэрбум төгрөгийг тус тус улсын төсөвт суулгаж өгчээ.

Монголоос Их Британийн Лондон хүртэл арван хоёр мянган километр газрыг Монгол тэмээгээр туулах аяллыг Н.Байгалмаа бүсгүй 2017 оны арван нэгэн сард эхлүүлсэн билээ. Н.Байгалмаа 630 километрийг туулж, Баянхонгор аймагт очоод байгаа ажээ.

Түүнийг Баянхонгор аймгийн Засаг даргын орлогч Б.Батсуурь болон БОАЖГ, аймгийн Засаг даргын дэргэдэх ГХАЖА, нутгийн иргэдийн төлөөлөл тосон авч хүндэтгэл үзүүлсэн байна. Аймгийн Засаг даргын орлогч Б.Батсуурь хэлэхдээ ”Гурван бүсийн нутгаар маань таны аялал дайран өнгөрч байгаад бид талархалтай хүлээн авч байна. Бид 2018 оныг аялал жуулчлалыг дэмжих жил болгон зарласан. Энэ утгаараа дэлхийг тэмээн хөсөгтэй туулах таны аялал шинэ оны эхэнд манай нутгаар үргэлжилж байгаад баяртай байна. Баянхонгорт саатах хугацаандаа шаардлагатай зүйл байвал бид тусалж дэмжинэ. Таны цаашдын аялалд амжилт хүсье. Зорьсон хэргээ бүтээгээд эргээд сайхан нутагт маань зочлоорой” гэлээ.

Н.Байгалмаа арван нэгдүгээр сарын эхээр Улаанбаатар хотоос санаа сэтгэл нэгдсэн зургаан хүний хамтаар аяллаа эхлүүлсэн ч хоёр сарын хугацаанд хамт гарсан аялагчид замаа орхижээ.

Маршрутын хувьд хуучны торгоны замын маршрутаар явах юм байна. Хятадын хилээр гараад цаашаа Англи хүртлээ Казахстан, Узбекистан, Туркменистан, Иран, Турк зэрэг арван таван орныг дайран өнгөрөх төлөвлөгөөтэй ажээ. Торгоны зам гэдэг нь Азиас Европ хүртэлх зам бөгөөд Нийтийн тооллын өмнөх 115 оноос ХIII зуун хүртэл хамгийн чухал арилжааг хийдэг зам байсан. Италийн аялагч Марко Поло ч энэхүү замаар худалдаа наймаа хийдэг байсан түүхтэй.

Аялагч бүсгүй сүүлийн 11 жил явган аяллаар аялж буй Их Британийн иргэн Карлийн хамтаар зам нэгдэн аяллаа үргэлжлүүлж байгаа ажээ.

Аялал гурван жил үргэлжилнэ гэж тооцжээ. Идэр есийн жавар тачигнаж буй энэ өдрүүдэд эрс тэрс уур амьсгалтай эх орноо хөндлөн гулд туулж, урд хилээр цааш гарах зорилготой байгаа түүнд Цагдаагийн Ерөнхий газраас дэмжлэг үзүүлж аялж буй аймгаас нэг алба хаагчийг цалинтай дагалдуулахаар болжээ.