Month: December 2017

ЦЕГ-аас шинэ жилийн баярыг тохиолдуулан “Шинэ жил-Эргүүл хяналт” нэгдсэн арга хэмжээг зохион байгуулж байна. Уг арга хэмжээнд Хууль сахиулахын их сургуулийн Цагдаагийн сургуулийн 1, 2, 3 дугаар дамжааны 400 сонсогч оролцож, 12 дугаар сарын 29-31-ний өдөр эргүүл хийж, хэрэг зөрчил гарахаас сэргийлэх чиглэлээр ажиллах аж. Сонсогчид нийслэлийн зургаан дүүргийн 14 цагдаагийн хэлтэс, Нийслэлийн цагдаагийн газрын Мөрдөн шалгах газрын Халаасны хулгайн гэмт хэрэгтэй тэмцэх хэлтэст хуваарилагдаж, 280 чиглэлд эргүүлийн үүрэг гүйцэтгэж байна.

Шударга өрсөлдөөн, хэрэглэгчийн төлөө газар (ШӨХТГ)-аас энэ сарын 29-нд шуурхай ажлын хэсэг гарган шатахууны жижиглэн худалдаа эрхлэгч аж ахуйн нэгжүүдийн борлуулалтын үйл ажиллагаанд хяналт шалгалт хийжээ.
Тус байгууллагын “Хэрэглэгчийн мэдээллийн 1284 төв”-д иргэдээс “Зарим компанийн шатахуун түгээх станцууд хязгаарлалт хийгээд байна” гэсэн мэдээллийн дагуу ийнхүү ажлын хэсэн гаргажээ. Хяналт шалгалтын явцад “Магнай трэйд”, “Сод Монгол”, “Тэс пэтролиум” компанийн Улаанбаатар хотын нутаг дэвсгэрт үйл ажиллагаа явуулдаг зарим салбаруудад А-92 авто бензин, дизель түлшний жижиглэнгийн борлуулалтадаа хязгаарлалт хийсэн нь илэрчээ. Тухайлбал, “Тэс петролиум” компанийн Нарны гүүр, Баянбүрдийн тойрогт байрлах зэрэг зургаан ШТС-д А-92 автобензинийг нэг хэрэглэгчдэд 30 000 төгрөгөөс илүү борлуулахгүй байх хязгаарлалт хийжээ. Мөн “Сод Монгол групп” компани дизель түлшийг зөвхөн өөрийн компанийн “Ай Си” картаар борлуулж байсан бөгөөд хамгийн ихдээ 100 мянган төгрөгийн борлуулалт хийх хязгаалалт тогтоосон бол “Магнай трейд” АИ-92 шатахууныг худалдаалахгүй байна. Ашигт малтмал, газрын тосны газрын газраас гаргасан мэдээллээр улсын хэмжээнд шатахууны 38 хоногийн нөөцтэй байгаа юм. Нарийвчлан тооцвол Аи-80 автобензин 68, Аи-92 автобензин 46, дизелийн түлшний 28 хоногийн нөөцтэй байна. Энэ нь шатахууны нөөцийн хувьд хэвийн хэмжээ тул дээрх гурван байгууллагын хязгаарлалт тогтоосон шалтгаан, нөхцлийг тодруулахаар нарийвчлан шалгаж эхэлжээ.

Мэргэжлийн сүмогийн 68 дахь их аварга Асашёрюү Д.Дагвадорж маргааш Асашёрюү Д.Дагвадорж энэ сарын 31-ний өдөр ABEMA телевизийн “Асашёорюүг унагаагаад 10 сая иен” шоу нэвтрүүлэгт оролцоно.

Энэхүү шоу нэвтрүүлэгт оролцох болсон талаараа “долоон жилийн дараа жинхэнэ дэвжээн дээр гарлаа. Танил дотно үнэр, урьд нь хийж байсан үйл хөдлөл хаа нэгтэй харсан үзсэн тэс хөндлөнгийн тэр нэгэн мэдрэмж. Нэг л сайхан мэдрэмж, үгээр хэлэхэд нулимс мэлмэрэх тэр нэгэн агшин. НЦэвэгням ахдаа баярлалаа” гэж өөрийн цахим хуудсаар мэдэгджээ.

Д.Дагвадоржийн эсрэг эхний ээлжинд тамирчин биш таван залуу барилдах бол тэдгээрийг ялсны дараа гурван шилдэг өрсөлдөгч хүлээж байгаа. Одоогоор түүнтэй Америкийн холимог тулаанч Боб Сапп болон Японы жүдо бөхийн шилдэг тамирчин байсан Изүми Хироши нар тулалдана. Харин сүүлийн өрсөлдөгч тодроогүй байгаа юм.

Асашёрюү Д.Дагвадорж 1999 онд мэргэжлийн сүмод элсч 2010 оны нэгдүгээр сарын башёд 13 даваатайгаар түрүүлснийхээ дараа зодог тайлсан юм. Тэрээр мэргэжлийн сүмогийн дээд зиндаанд нийт 25 удаа түрүүлсэн билээ.

“Асашёорюүг унагаагаад 10 сая иен” шоу нэвтрүүлэгийн дүрэмд харитэ алгадах мэх хийхгүй, тачай дээр зайлахгүй, тохойлдож мөргөхгүй гэж заасан байдаг аж. Эдгээр гурван дүрмээс бусад үед мэргэжлийн сүмо бөхийн дүрэмтэй ижил явагдана.

Шинэ жилийн баяр, амралтын өдрүүдэд зохих зөвшөөрөлгүй газраас болон иргэдийн гар дээрээс пиротехникийн хэрэгсэл буюу салютыг худалдан авч ашиглах, хэрэглэх, буудуулахгүй байхыг Онцгой байдлын газраас анхааруулж байна. Барилга, байгууламж дотор пиротехникийн хэрэгслийг ашиглан салют, гэрэлт үзүүлбэр зохион байгуулахыг тус тус хориглосон байдаг. Тиймээс зохих зөвшөөрөлгүй газраас энэ төрлийн бүтээгдэхүүнийг худалдан авч, ашиглахгүй байхыг онцгойлон анхаарч, өөрсдийн болон бусдын эрүүл мэндэд хохирох учруулахгүй байх, түлэгдэж гэмтэх, бэртэх зэрэг эрсдэл үүсгэхгүй байхыг нийт иргэдэд албаныхан анхаарууллаа.

Зөгийн бал гэдэг байгалийн гаралтай, эрүүл хүнс мэт санагдах боловч нярай хүүхдэд, нэг нас хүрээгүй байхад нь өгөхийг хориглодог байна. Учир нь зөгийн баланд ботулизм хэмээх өвчин үүсгэгч нян байх магадлал өндөр байдаг бөгөөд энэ нян нь хүүхдийн аминд хүрэх хүртэл аюултай аж. Харин нэг наснаас дээш хүүхэд болон насанд хүрэгчдийн ходоодонд тухайн нянг өсөхөөс нь сэргийлж байдаг микро организм /Clostridium Botulinum/ бий учраас өвчин үүсгэдэггүй байна. Тиймээс та нярай хүүхдэдээ зөгийн бал өгөхөөс татгалзах хэрэгтэй. Нярай хүүхэд ботулизмын нянд хордсоноос болж өтгөн хатах, бие сулбайх, хооллох чадваргүй болох зэрэг шинж тэмдэг илэрдэг байна. Түүнчлэн амьсгалын тогтолцоо саатсанаас сул дуугаар уйлах зэргийг сайтар хянаж байх хэрэгтэй аж.

Зөвхөн зөгийн бал гэлтгүй дараах хүнсний бүтээгдэхүүнийг нэг нас хүрээгүй хүүхдэд өгөхийг хориглодог:

• Өндөгний цагаан: Харшил үүсгэх эрсдэлтэй.
• Үнээний сүү: Харшил, өтгөн хаталт, төмрийн дутагдал үүсгэх эрсдэлтэй.
• Какао, шоколад, гүзээлзгэнэ: Харшил хөдөлгөх эрсдэлтэй.
• Хагас бэлэн бүтээгдэхүүн: Хэт давсалсан, удаан хугацаагаар муутгахгүй зорилгоор нитрат агуулдаг учраас зүрх судас, бөөрний өвчин үүсгэх эрсдэлтэй.
• Самар, хатаасан жимс мэтийн хатуу хүнс: Амьсгалын зам, хоолойд тээглэх аюултай.

“Нийслэлийн Засаг даргын Тамгын газар, Нийслэлийн Соёл, урлагийн газраас жил бүр зохион байгуулдаг “Улаанбаатарын мөнгөн шөнө” нийслэлийн иргэдэд зориулсан шинэ жилийн баярын үйл ажиллагааг энэ сарын 31-ний 21:00-01:00 цагийн хооронд Жанжин Д.Сүхбаатарын талбайд зохион байгуулна. Тус үйл ажиллагааны урлагийн тоглолтын найруулагчаар УДЭТ-ын жүжигчин, найруулагч СТА А.Чингүн, зөвлөх найруулагчаар УДЭТ-ын ерөнхий найруулагч, Төрийн соёрхолт Н.Наранбаатар ажиллаж байгаа ажээ.

Баярын цэнгүүнд үе үеийн хамтлаг, дуучид оролцож уран бүтээлээ толилуулж он гарах мөчид Нийслэлийн Засаг дарга бөгөөд Улаанбаатар хотын дарга нийслэлчүүддээ мэндчилгээ дэвшүүлэх юм байна. Цэнгүүний үеэр талбайд халуун ундаа зууш, шинэ жилийн баярын худалдаа үйлчилгээ гарч, Нийтийн тээврийн хэрэгслээр төв талбайгаас чиглэл бүрт 01 дүгээр сарын 01 ний 02 цаг хүртэл үйлчлэх бөгөөд арга хэмжээний үеэр Нийслэлийн Цагдаагийн газар, Онцгой байдлын газар, Нийслэлийн мэргэжлийн хяналтын газар, Улаанбаатар хотын захирагчийн ажлын алба, Нийслэлийн эрүүл мэндийн газар, зэрэг байгууллагууд ажиллаж иргэдийнхээ аюулгүй байдлыг хангаж ажиллахаар төлөвлөжээ.

Иргэдиийн гар дээрээс пиротехникийн хэрэгсэл худалдан авч ашиглахгүй байхыг анхааруулав

Нийслэлийн Онцгой байдлын газрын Гал түймрийн улсын хяналтын ахлах байцаагч хошууч С.Эрдэнэбаяр “Шинэ жилийн баярын арга хэмжээг тэмдэглэн өнгөрүүлэхтэй холбогдуулан Онцгой байдлын байгууллагын нийслэлийн хүрээний анги, салбарын нийт бие бүрэлдэхүүн 2017 оны арванхоёрдугаар сарын 29-ний өдрийн 09:00 цагаас 2018 оны нэгдүгээр сарын 2-ны өдрийн 09:00 цаг хүртэл албаны өндөржүүлсэн бэлэн байдлын зэрэгт шилжин ажиллана. Шинэ жилийн баярын цэнгүүнийг тэмдэглэх арванхоёрдугаар сарын 31-ний өдрийн шөнө Сүхбаатарын талбай, Соёл амралтын хүрээлэн, Сүхбаатар дүүргийн Дамбын гүүр, Сонгинохайрхан дүүргийн Баянхошуу, Баянзүрх дүүргийн Маахуур толгой зэрэг 5 газарт албан ёсны зөвшөөрөлтэй компаниас пиротехникийн хэрэгслийг ашиглах, буудуулах ажиллагааны үеэр нийслэлийн Онцгой байдлын газраас галын аюулгүй байдлыг хангуулж, хамгаалалтанд үүрэг гүйцэтгэн ажиллах техник, хүн хэрэгслийг томилгоожуулан, бэлэн байдлыг хангуулаад байна. Нийслэлийн Иргэдийн Төлөөлөгчдийн Хурлын Тэргүүлэгчдийн 2011 оны 27 дугаар тогтоол, нийслэлийн Засаг даргын 2009 оны 662 дугаар захирамжаар нийслэлийн нутаг дэвсгэрт пиротехникийн хэрэгслийг худалдах, ашиглахыг хориглосон мөн барилга, байгууламж дотор пиротехникийн хэрэгслийг ашиглан салют, гэрэлт үзүүлбэр зохион байгуулахыг тус тус хориглосон байдаг.
Шинэ жилийн баяр, амралтын өдрүүдэд зохих зөвшөөрөлгүй газраас болон иргэдиийн гар дээрээс пиротехникийн хэрэгсэл буюу бидний хэлдэгээр салютыг худалдан авч ашиглах, хэрэглэх, буудуулахгүй байх тал дээр онцгойлон анхаарч, өөрсдийн болон бусдын эрүүл мэндэд хохирох учруулахгүй байх, түлэгдэж гэмтэх, бэртэх зэрэг эрсдэл үүсгэхгүй байхыг нийслэлийн Онцгой байдлын газраас нийт иргэдэд анхааруулж байна” гэлээ.
Цагдаагийн алба хаагчид өндөржүүлсэн бэлэн байдалд ажиллана

Цагдаа, дотоодын цэргийн бие бүрэлдэхүүн Үндэсний эрх чөлөө тусгаар тогтнолоо сэргээн мандуулсны 106 жилийн ой, шинэ жилийн баяраар өндөржүүлсэн бэлэн байдалд үүрэг гүйцэтгэнэ. Цагдаагийн ерөнхий газрын дарга, дотоодын цэргийн командлагч, цагдаагийн хурандаа С.Баатаржав тэдгээр өдрүүдэд бие бүрэлдэхүүн албаны бэлэн байдал, сахилга хариуцлагыг чанд сахиж, иргэд, олон нийтийн аюулгүй байдлыг ханган гэмт хэрэг, зөрчлөөс урьдчилан сэргийлэхэд онцгойлон анхаарч ажиллахыг үүрэг болгосон байна. Тодруулбал, цагдаа, дотоодын цэргийн бие бүрэлдэхүүн өндөржүүлсэн бэлэн байдлын нэгдүгээр зэрэглэлд шилжиж ажиллах аж.

“Шинэ жилийн баярын цэнгүүн”-ий дараа 18 чиглэлд автобус үнэгүй үйлчилнэ

Нийслэлийн шинэ жилийн баярын үйл ажиллагааг зохион байгуулах ажлын хүрээнд 2017 оны арванхоёрдугаар сарын 31-ний өдөр “Шинэ жилийн баярын цэнгүүн”-ийг Сүхбаатарын талбайд зохион байгуулах ба олон нийтийг хамарсан ёслолын арга хэмжээний дараа иргэдийг нийтийн тээврийн үйлчилгээгээр хангахаар дараах төлөвлөлтийг нийслэлийн Тээврийн газраас хийгээд байна. Үүнд: “Шинэ жилийн баярын цэнгүүн” нэгдсэн үйл ажиллагаа өндөрлөхөд их багтаамжийн автобусны 18 чиглэлд 18 автобус Сүхбаатарын талбайн баруун, зүүн болон урд зогсоол буюу зурагт тэмдэглэсэн “А”, “B”, “С” зогсоолоос суурьшлын цэгүүд рүү үнэ төлбөргүй үйлчлэхээр төлөвлөөд байна. Мөн 2017 оны арванхоёрдугаар сарын 29, 30, 31, 2018 оны нэгдүгээр сарын 1-ний өдөр нийтийн тээврийн үйлчилгээ энгийн амралтын өдрийн хуваарийн дагуу байх болно гэж нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.