Month: September 2017

Гадаад харилцааны дэд сайд Б.Батцэцэг 2017 оны 8 дугаар сарын 31-нд БНСУ-ын Бусан хотноо болж буй Зүүн Ази, Латин Америкийн хамтын ажиллагааны чуулга уулзалт (ФЕАЛАК)-ын Гадаад хэргийн сайд нарын VIII уулзалтад оролцов.

Дэд сайд ФЕАЛАК-ын сайд нарын уулзалтын нэгдсэн хуралдаанд оролцож үг хэлэхдээ, Зүүн Ази, Латин Америкийн бүс нутгийн улсууд боломжтой бүхий л салбарт хамтын ажиллагаагаа хөгжүүлж гүнзгийрүүлэхийн чухлыг тэмдэглэв.Тэрбээр Монгол Улс хөдөө аж ахуй, уул уурхай, аялал жуулчлалын салбарт хамтран ажиллах боломжтойг дурдаж ФЕАЛАК-ын Үйл ажиллагааны төлөвлөгөө, ФЕАЛАК-ын Сан, Бусаны Тунхаглалыг дэмжиж байгааг мэдэгдэв.

Дэд сайд Б.Батцэцэг БНСУ-ын Гадаад хэргийн сайд хатагтай Кан Ген Хва, Аргентины Гадаад хэргийн сайд Хорхе Марсело Фаурие, Парагвайн Гадаад хэргийн дэд сайд Оскар Кабелло Сарубби, Мексикийн Гадаад хэргийн дэд сайд Карлос Иказа Гонзалес нартай тус тус уулзаж, хоёр талын харилцаа, хамтын ажиллагааны талаар санал солилцов.

Мөн дипломат, албан болон энгийн паспорт эзэмшигчдийг визээс чөлөөлөх тухай Монгол Улс болон Бүгд Найрамдах Аргентин Улсын хоорондын хэлэлцээрт Дэд сайд Б.Батцэцэг, Аргентины Гадаад хэргийн сайд Хорхе Марсело Фаурие нар гарын үсэг зурав.

ФЕАЛАК нь Зүүн Ази болон Латин Америкийн орнуудын хооронд хамтын ажиллагаа, харилцан ойлголцлыг бэхжүүлэх яриа хэлэлцээний механизм юм. Энэхүү олон талт байгууллагад хоёр тивийн 36 орон хамрагддаг бөгөөд тэдгээрийн 16 нь Зүүн Азийн, 20 нь Латин Америкийн орнууд юм. ФЕАЛАК-ын энэ удаагийн Сайд нарын уулзалтад 20 шахам орон сайд, дэд сайдын түвшинд, мөн зарим олон улсын байгууллагын тэргүүн оролцов. Сайд нарын 8 дугаар уулзалтаар ФЕАЛАК-ын Үйл ажиллагааны төлөвлөгөөг баталж, ФЕАЛАК-ын Сан байгуулав. Мөн уулзалтын дүнгээр Бусаны Тунхаглалыг гаргав.

Унгар Улсын нийслэл Будапешт хотноо энэ 8 дугаар сарын 28-наас 9 дүгээр сарын 2-ны өдрүүдэд зохион байгуулагдаж буй Жүдо бөхийн дэлхийн аварга шалгаруулах тэмцээнд Монголын Жудо бөхийн холбооны Ерөнхийлөгчийн хувиар оролцож байгаа Монгол Улсын Ерөнхийлөгч Х.Баттулга Будапешт хотын Eötvös Loránd-ын их сургуулийн Монгол, Төв Ази судлалын төвөөс зохион байгуулсан зуны их сургуульд оролцож байгаа монголч эрдэмтэд, судлаачид, оюутнуудтай уулзаж эрдэм судлалын ажлынх нь талаар харилцан ярилцлаа.

Эрдмийн өргөөний гэрэлт хаалгыг татан орж буй оюутан, сурагчид аа,

Ирээдүй хойч үедээ эрдэм өвлүүлэх эрхэм үйлсийн эзэн багш, сурган хүмүүжүүлэгч, боловсролын салбарын нийт ажилтан, ажиллагсад аа,

Хүндэт эцэг эхчүүд ээ,

Та бүхэндээ 2017-2018 оны хичээлийн шинэ жилийн баярын мэнд дэвшүүлж, амжилт ерөөе.

Монгол айл өрх бүрийн сайн сайхан, амар түвшин амьдрал, улс үндэсний хөгжил дэвшлийг эрүүл чийрэг, эрдэм боловсролтой, өрсөлдөх чадвартай бүтээлч монгол хүн бий болгоно. Түүнд хүрэх зам нь боловсрол билээ. Боловсролоор дамжуулан бүтээлч, хариуцлагатай, ёс зүйтэй, мэдлэг чадвартай иргэнийг хөгжүүлэх нь суралцагч, сурган хүмүүжүүлэгч, эцэг эх, нийгмийн гишүүн Та бидний хамтын нэгдмэл үүрэг зорилт юм.

2017-2018 оны хичээлийн жилд улс даяар 798 сургуульд 578.9 мянган сурагч суралцана. Тэдгээрээс 252.7 мянган хүүхэд сургуулийн өмнөх боловсролд хамрагдаж, 73.5 мянган хүүхэд 1-р ангид элсэхээр бүртгэгдээд байна. Түүнчлэн улсын хэмжээнд 96 их, дээд сургуульд 150 мянгаад оюутан суралцах юм.

Шинэ хичээлийн жилд 1250 ортой 14 цэцэрлэг үүдээ нээж, ерөнхий боловсролын 21 сургуулийн барилга шинээр ашиглалтад орж байна.

Монгол Улс нийт төсвийнхөө 17.3 хувь буюу таван төгрөг тутмын нэг төгрөг болох 1.1 их наяд төгрөгийг боловсролын салбарт зарцуулж байгаа. Цаашид суралцах орчин, сургалтын агуулга, үнэлгээний тогтолцоо, багш, сурган хүмүүжүүлэгчдийн хөдөлмөрийн үнэлэмж, нийгмийн баталгаа зэрэг өргөн хүрээг хамарсан боловсролын хөгжлийн бодлого, зохицуулалтыг улам боловсронгуй болгох, мэргэжлийн институцуудын чадавхийг бэхжүүлэх цогц бодлогыг бодлого шийдвэр, төсөв, санхүү, хууль эрх зүйн хүрээнд тасралтгүй дэмжин ажиллах нь Монгол Улсын төрийн эрх барих дээд байгууллага УИХ-ын нэн чухал үүрэг байх болно.

Засгийн газрын үйл ажиллагааны хөтөлбөрт цалин, тэтгэврийг үе шаттай нэмэгдүүлэх зорилт тусгагдсаны дагуу эдийн засгийн өсөлттэй уялдуулан багш, сурган хүмүүжүүлэгчдийн цалин хөлсийг нэмэх ёстой гэсэн байр суурьтай байгаагаа энэ дашрамд илэрхийлье.

Оюутан, сурагчид аа!

Та бүхний сурах эрмэлзэл, хариуцлагаа ухамсарласан зорилго хосолж байж амжилтад хүрнэ. Аливаа улс орны хөгжлийн үзүүлэлт нь хуримтлуулсан материаллаг баялгаас илүү хүмүүжсэн хүн байдаг нь улс орнуудын түүхэн туршлагаар нотлогддог. Тиймээс эрдэм төгс, хөдөлмөрч, хүнлэг иргэн болох нь Эрхэм дүү Та нарын эн тэргүүний зорилго байх ёстой юм. Зорилгодоо хүрэхийн тулд хичээн суралцагтун!

Эрхэм багш, сурган хүмүүжүүлэгчид ээ!

Өөрийн эрдэм, оюуны их нөөцөө шавь нартаа харамгүй түгээж, ирээдүйн үнэ цэнэ бүхий хөгжлийн суурийг уйгагүй хөдөлмөр, зүтгэлээрээ үеийн үед цогцлоож ирсэн Та бүхнийг Монголын төр ямагт өндрөөр үнэлэн, хүндэлдэг билээ.

Монголын залуу үе боловсрол мэдлэг, өрсөлдөх чадвараа эх орондоо төдийгүй хилийн чинадад нотлон “Дэлхийн Монгол Иргэн” болох цаг үе ирж буйд баяртай байна.

Сайн шавь төрүүлэх нь улс үндэстэндээ Та бүгдийн оруулж буй үнэлж баршгүй том хувь нэмэр, юутай ч харьцуулшгүй чухал хөрөнгө оруулалт гэдгийг санаж, хичээн ажиллагтун!

Та бүхэндээ хамгийн сайн сайхныг хүсье.

Эрдэм ухаан түгэн дэлгэрч, эх орон маань хөгжин дэгжих болтугай!

МОНГОЛ УЛСЫН ИХ

ХУРЛЫН ДАРГАМИЕЭГОМБЫН ЭНХБОЛД

2017 оны есдүгээр сарын 1 Улаанбаатар хот.

Монгол Улсын Ерөнхий сайд Ж.Эрдэнэбат Ай Си Би компанийн удирдлагуудыг хүлээн авч уулзлаа. БНСУ-ын Цахим, төлбөр тооцоо, гадаад худалдаа, тээвэр ложистикоор мэргэшсэн тус компани нь Монгол Улсад бэлэн бус цахим төлбөр тооцооны үйлчилгээг нэвтрүүлэх саналаа илэрхийлж, боловсруулсан төслөө танилцууллаа. Бэлэн мөнгөний хэрэглээг халж орон даяар цахим төлбөр тооцооны сүлжээнд холбогдох боломжит шаардлагуудыг хангасан, бэлэн мөнгө хэрэглэдэггүй анхны улс болох боломжтой хэмээн тооцож байгаа аж. Цаг уурын байдал, иргэдийн цахилгааны хэрэглээ, төлбөр тооцоо, хүн амын ажиллах хүчний чадамж зэрэг нь дээрх үйлчилгээг нэвтрүүлэх үндсэн нөхцлийг бүрдүүлж байгаа гэв. Мөн хүн амын насжилт залуу, интернетийн хэрэглээ өндөр байгаа зэрэгч нөлөөлжээ.

Төсөл хэрэгжвэл 100 сая ам.долларын хөрөнгө оруулалт хийгдэж, 20,000 гаруй шинэ ажлын байр бий болно. Монгол улсын Ерөнхий сайд төсөлтөй танилцаад, дэлхий нийтэд шинэ тутам хэрэгжиж буй боломжит зах зээлийн үйлчилгээг нэвтрүүлэх ажлыг дэмжинэ. Хэрвээ төслийг хэрэгжүүлвэл инженер техникийн ажилчдыг Монголчуудаас сургаж Монгол Улсад нь монголчуудыг ажиллуулах нөхцөлийг бүрдүүлэх шаардлагыг тавина гэлээ.

Уг төсөл хэрэгжвэл 20,000 сервер бүхий бэлэн бус төлбөр тооцооны төвийн бааз бий болж, 100 сая ам.долларын хөрөнгө оруулалт хийгдэх юм байна гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.