Month: April 2017

Монголын Үндэсний Худалдаа Аж Үйлдвэрийн Танхимаас 27 дахь жилдээ ОХУ, Монголын хамтарсан “Азийн хаалга” 2017 үзэсгэлэнгийн нээлтийг өнөөдөр буюу дөрөвдүгээр сарын 25-ны 14:00 цагт нээх гэж байна.

Энэхүү үзэсгэлэнд ОХУ-ын 10 гаруй томоохон хотуудаас 36 компанийн 50 гаруй төлөөлөл иржээ. Арга хэмжээний гол зорилго нь хоёр улсын худалдаа, бизнес, эдийн засгийн харилцааг сайжруулах ажээ.

Үзэсгэлэнгийн талаар Чита хотын ХАҮТ-ын дарга А.Марков “Би Улаанбаатар хотод анх удаа ирж байна. Надтай хамт манай бүс нутгийн эрчим хүч, барилгын компаниуд ирсэн байна. Бид эрчим хүчний чиглэлээр ялангуяа хамтран ажиллах боломжтой. Манай үзэсгэлэн дээр ирэхийг урьж байна” гэв.

“Бизнес контакт” Ерөнхий захирал С.Александр “Энэ удаагийн арга хэмжээ 27 дахь удаагаа зохион байгуулагдана. Бид Монголын зах зээл дээр 15 жил ажиллаж байна. Тийм учраас Монголын аж ахуйн нэгжүүд ирж компаниудтай хэлхээ холбоо тогтоох боломжтой.

Эдийн засгийн асуудлаас болж 12 дугаар сард зохион байгуулагдах байсан үзэсгэлэн болоогүй. Харин энэ удаад бид илүү өргөн бүрэлдэхүүнтэй ирсэн” гэв.

Үзэсгэлэнд ОХУ-ын Киров, Ангарск, Ростов на Дону, Таганрог, Нюрба, Нюрингри, Пинск, Чита, Якутск болон Эрхүү мужийн компаниуд ирсэн байна. Тэд автомашин, хөнгөн үйлдвэрлэл, хүнс, барилга, эрчим хүч, хөдөө аж ахуй, аялал жуулчлал, үнэт эдлэл, хими, тээвэр зууч, шинжлэх ухаан боловсрол, зөвлөх үйлчилгээ, хэвлэх үйлдвэр, ном, сонин сэтгүүл, эмийн сан, хүүхдийн зөөлөн тоглоом зэрэг бараа бүтээгдэхүүнээ танилцуулж гурав хоногийн турш МҮХАҮТ-ын үзэсгэлэнгийн танхимд байрлах юм.

Урилгаар БНХАУ болон Пакистан, Монгол Улсын аж ахуй нэгжүүд оролцож байна. Тус үзэсгэлэнгийн хүрээнд маргааш буюу дөрөвдүгээр сарын 26-ны өдөр 10:00 цагаас МҮХАҮТ-ын 507 тоот хурлын танхимд “Бизнес уулзалт” зохион байгуулагдана.

БНХАУ-ын Засгийн газрын хөнгөлөлттэй зээлээр хэрэгжиж буй “Цахим эрүүл мэнд” төслийн хүрээнд нийтдээ Монгол Улсын 112 эрүүл мэндийн байгууллагад 23 нэр төрлийн мэдээллийн технологийн тоног төхөөрөмж, 48 байгууллагад цахим эмнэлгийн програм хангамжийг нийлүүлэх юм.

БНХАУ-ын Засгийн газрын хөнгөлөлттэй зээлээр хэрэгжиж буй “Цахим эрүүл

Уг төсөл хэрэгжсэнээр салбарын мэдээллийн тоног төхөөрөмж бүрэн шинэчлэгдэж, үйлчлүүлэгчдийн хүлээгдлээс үүдэлтэй бухимдал арилж, эрүүл мэндийн тусламж үйлчилгээг цаг алдалгүй авах, хүртээмж нэмэгдэх нөхцөл бүрдэх юм. Түүнчлэн үйлчлүүлэгчийн эрүүл мэндийн талаарх мэдээллийг олон улсын стандартад нийцүүлэн нууцлал, аюулгүй байдлыг бүрэн хангахуйц нэгдсэн мэдээллийн санд хадгалж, нотолгоонд суурилсан эрүүл мэндийн тусламж үйлчилгээг иргэдэд үзүүлэх ба тусламж үйлчилгээний чанар дээшилж, шаардлагагүй, давтан шинжилгээний тоог бууруулж зардал хэмнэх, эмийн жорыг цахим хэлбэрт оруулах замаар эмийн зохистой хэрэглээг төлөвшүүлэх, өвчтөн шилжүүлэх тогтолцоо цахимжих зэрэг ач холбогдолтой.

Энэхүү төслийг Эх хүүхдийн эрүүл мэндийн үндэсний төвд хэрэгжүүлэх бэлтгэл ажлын хүрээнд 2015 оны 12 сараас нийт 437 компьютер, 25 хэвлэх төхөөрөмж зэрэг нийт 23 нэр төрлийн 1017 ширхэг тоног төхөөрөмжийн угсралт, шинэчлэлийг тасаг, нэгжүүдэд гүйцэтгэсэн байна. 2017 оны 4 дүгээр сарын 5-ны өдрөөс цахим эрүүл мэндийн “eHealth” програм хангамжийн боловсруулалт, нэвтрүүлэлтийг хариуцан ажиллаж буй “Метронэтворкс” ХХК нь ЭХЭМҮТ-д ажиллаж эхэлсэн бөгөөд өнгөрсөн 2 долоо хоногийн хугацаанд тус төвийн товлолт цаг олголт, хүүхдийн ба эх барих, эмэгтэйчүүдийн амбулаторийн үзлэг, үйл онош, лабораторийн хэсгүүдэд амжилттай суурилуулснаар амбулаторийн үзлэг, эмчилгээний үйл явцыг түргэсгэж үйлчлүүлэгчдээс талархал хүртэж эхлээд байна. Өнөөгийн байдлаар хэвтэн эмчлүүлэх хэсгийн мэдээллийн цахимжилтын ажил эхлээд байгаа бөгөөд тавдугаар сард багтаан цахимжуулалтад бүрэн шилжихээр хамтран ажиллаж байна гэж ЭХЭМҮТ-өөс мэдээллээ.

Баянзүрх дүүргийн Засаг даргын Тамгын газар, Гэмт хэргээс урьдчилан сэргийлэх ажлыг зохицуулах зөвлөл, Цагдаагийн I, II, III хэлтсээс хамтран “1000 эргүүл” арга хэмжээг зохион байгуулж байгаа билээ. Уг нэгдсэн арга хэмжээний хүрээнд дүүргийн хэмжээнд гэмт хэргийн илрүүлэлт өсч, гэмт хэрэг, зөрчлийн тоо буурсан эерэг үзүүлэлт гарсан юм. Иймд дүүрэг дэх Цагдаагийн II хэлтсээс санаачлан “1000 эргүүл-2” арга хэмжээг эхлүүллээ. Энэ удаад Хууль сахиулахын их сургуультай хамтран нийтийн хэв журмыг сахиулах хамтарсан “1000 Эргүүл-2” ажиллуулж байна. Тус нэгдсэн арга хэмжээний хүрээнд Цагдаагийн I, II, III хэлтсийн 150 алба хаагч, Хууль сахиулахын их сургуулийн 1000 сонсогч хамтран 150 чиглэлд явган эргүүлийн үүрэг гүйцэтгэх юм хэмээн Баянзүрх дүүргийн Хэвлэл мэдээллийн албанаас мэдээллээ.

Автотээврийн үндэсний төвөөс таван аймгийн орон нутгийн автотээврийн төвд техникийн хяналт хийх Уаз-Фургон маркийн автомашин гардууллаа. Сайжруулсан техник хэрэгслээр автотээврийн үйлчилгээг иргэдэд түргэн шуурхай хүргэх зорилгоор Баян-Өлгий, Баянхонгор, Дорнод, Хэнтий, Хөвсгөл зэрэг орон нутгийн автотээврийн төвүүдэд дээрх автомашинуудыг хүлээлгэн өгсөн байна.

“Автотээврийн үндэсний төв” ТӨҮГ нь “Автотээврийн менежментийг сайжруулах жил”-ийн хүрээнд олон төсөл хөтөлбөрийг хэрэгжүүлж байгаагийн нэг нь явуулын техник хэрэгслийг шинэчлэх, стандартын дагуу үзлэг, оношилогоо хийх, тээврийн хэрэгслийн бүрэн бүтэн байдлыг хангах бөгөөд энэ хүрээнд дээрх таван аймагт автомашин гардуулжээ.

Монгол, Хятадын эрдэс баялаг, эрчим хүч, дэд бүтцийн хамтын ажиллагааны зөвлөлийн хуралдаан энэ сарын 24-26-ны өдрүүдэд БНХАУ-ын Бээжин хотноо болж байна. Хуралдаанд тус зөвлөлийн Монголын хэсгийн дарга, Монгол Улсын сайд, ЗГХЭГ-ын дарга Ж.Мөнхбат болон Зам, тээврийн хөгжлийн сайд Д.Ганбат, Уул уурхай, хүнд үйлдвэрийн сайд Ц.Дашдорж, Эрчим хүчний сайд П.Ганхүү болон албаны бусад төлөөлөгчид оролцож байна.

Зөвлөлийн нэгдсэн хуралдаан өнөөдөр эхлэх бөгөөд үүний өмнө Монголын төлөөлөгчид БНХАУ-ын Хөгжил шинэчлэлийн хорооны удирдлагуудтай уулзаж хоёр улсын уул уурхай, эрчим хүч, дэд бүтцийн салбарын хамтын ажиллагааны талаар санал солилцоно.

Монгол Улсын сайд, ЗГХЭГ-ын дарга Ж.Мөнхбат тэргүүтэй Монголын төлөөлөгчид өчигдөр БНХАУ-ын “Шэнхуа” группийн дэд ерөнхийлөгч Ли Донгтой уулзаж, тус группийн үйл ажиллагаатай танилцлаа.

“Шэнхуа” групп нь нарны, салхины, усан болон нүүрсний зэрэг бүх чиглэлээр эрчим хүч үйлдвэрлэдэг, томоохон гангийн үйлдвэрүүдтэй, 70 орчим нүүрсний уурхайтай, 2000 гаруй км төмөр замыг эзэмшдэг, нүүрс шингэрүүлэх болон нүүрснээс байгалийн хий, нийлэг эд гаргаж авах үйлдвэрүүдтэй, Хятадын хамгийн том компани юм гэж Засгийн газрын Хэвлэл мэдээлэл, олон нийттэй харилцах хэлтсээс мэдээллээ.

Унгар улсын нийслэл Будапешт хотноо Монголын соёлын өдрийн нээлт өнөөдөр боллоо.

Нээлтэнд Монгол улсаас Унгар улсад суугаа онц бөгөөд бүрэн эрхт элчин сайд З.Батбаяр, Бурханч лам Пүрэвбат болон эрдэмтэн судлаачид, оюутан залуус болон зочид төлөөлөгчид оролцлоо.

“Монгол Улсыг гадаадад сурталчлах хөтөлбөр” болон “Дэлхийн Монголчууд хөтөлбөр”-ийн хүрээнд Унгар улсын Будапешт хотын Вөрөшмартын талбайд Монголын соёлын өдөр энэ сарын 23-30-ны өдөр үргэлжлэх юм. Уг арга хэмжээг Монгол Улсаас Унгар Улсад суугаа ЭСЯ зохион байгуулж байна.

УИХ-ын Хууль зүйн байнгын хорооны өнөөдрийн хуралдаанаар Зөрчлийн тухай хуулийн шинэчилсэн найруулгын төсөл болон холбогдох бусад хуулийн төслүүдийн анхны хэлэлцүүлгийг хийлээ.

Хэлэлцүүлгийн үеэр УИХ-ын гишүүн Ж.Ганбаатар, “Эрх хасах тухайд уян хатан хэрэгтэй. Тухайлбал эмч гэхэд 10-15 жил сурсан байхад шууд эрхийг нь хасна гээд байж болохгүй” гэсэн бол Хууль зүйн байнгын хорооны дарга Ш.Раднаасэд, “Ямар тохиолдолд торгох, тусгай зөвшөөрлийг нь хүчингүй болгох, эрхийг нь хасна гэдгээ жагсаалтаар гарга. Тэгвэл илүү ойлгомжтой болно” гэсэн чиглэл өглөө.

УИХ-ын гишүүн Н.Оюундарь ч мөн адил “Аж ахуй нэгжүүдийн тусгай зөвшөөрлийг хасдаг болсноор авлига хээл хахууль цэцэглэх шалтгаан болох вий. Тусгай зөвшөөрлийг олгосон этгээд буцаан эргүүлэн татдаг. Гэтэл энэ хуулиар өөр нэг байцаагч очоод эрхийг хаахаар тусгасан байна шүү. Үүний бодолцоорой” гэсэн юм. УИХ-ын гишүүн Ж.Батзандан, “Архи, согтууруулах ундаа хэрэглэхийг зөвшөөрөөгүй газар хэрэглэсэн бол торгоно гэсэн заалт хуулинд тусчээ. Ер нь архи уух бол зөрчил гэхээсээ өвчин гэж харах ёстой асуудал шүү. Үүний зааг ялгааг олж хуулинд тусгаарай” гэв.

Хууль зүй, дотоод хэргийн сайд С.Бямбацогт, “Өнөөгийн нөхцөлд 240 хуулиар зөрчлийг хянан шийдвэрлэж байна. Өөрөөр хэлбэл, зөрчлийн хариуцлагыг өөрийн үзэмжээр тогтоож байгааг нэг хэм хэмжээнд оруулж байна. Ингэснээр нэг хуулиар зөрчлийн асуудлыг шийдвэрлэж, зөрчилд нь тохирох шийтгэл оногдуулдаг байхаар хуулийн төслийг боловсруулсан” гэлээ.

Энэ үеэр ажлын хэсгээс гаргасан саналаар санал хураалт явуулав. Тухайлбал, хуулийн төсөлд “Олон нийтийн газар, авто зам, орон сууцны орчны газар, гудамж, талбайд бие зассан, эсхүл нус, цэр, тамхины иш, хог хаясан бол хүнийг арван нэгжтэй тэнцэх хэмжээний төгрөгөөр торгоно”, “Нийтийн зориулалттай орон сууцанд шөнийн цагаар бусад оршин суугчдын амгалан тайван байдлыг алдагдуулсан хүнийг торгоно” гэх заалтыг гишүүд дэмжлээ. Мөн нэг нэгжийг 1000 төгрөгөөр тооцохоор болов.

Үүний дараа хуулийн төслийг үргэлжлүүлэн хэлэлцэх тухайд санал хураалт явуулахад олонх дэмжлээ.