Month: April 2017

Хэнтий аймагт нэг иргэн архинд хордож нас барсан байж болзошгүй хэрэг өчигдөр /2017.04.25/ гарчээ.Уг хэрэг архи, согтууруулах ундаа худалдан борлуулахыг хориглодог өдөр гарсан байна.

Сар бүрийн 25-ны өдөр Хэнтий аймагт архи согтууруулах ундааны зүйл худалдан борлуулахыг хориглодог боловч талийгаач найзуудтайгаа нууцаар архи худалдан авч уусан байжээ.

Мөн дээрх иргэнээс гадна архинд хордсон байж болзошгүй таван иргэн Хэнтий аймгийн Нэгдсэн эмнэлэгт хандсан байна. Тэдэнд хордлого тайлах эмчилгээ хийсэн гэх мэдээллийг тус аймгийн Мэргэжлийн хяналтын газрын дарга Б.Сүнгээ өглөө.

Нас барсан иргэний хэргийг Хэнтий аймгийн цагдаагийн газарт шалгаж байгаа бөгөөд ямар архинаас хордсон эсэхийг тодруулахаар ажиллаж байна.

Дээрх хэрэгтэй холбогдуулан Хэнтий аймгийн Засаг дарга захирамж гаргаж, архи согтууруулах ундааг худалдан борлуулах, түүгээр үйлчлэхийг тодорхойгүй хугацаагаар хоригложээ.

Ерөнхийлөгчийн сонгууль ирэх зургаадугаар сарын 26-ны өдөр болох гэж байгаатай холбогдуулан хуулийн дагуу шилжилт хөдөлгөөнийг маргаашнаас эхлэн зогсооно.

Тодруулбал, зургаадугаар сарын 27-ны өдрийг дуустал буюу 60 хоногийн хугацаанд улсын хэмжээнд иргэдийн засаг захиргааны нэг нэгжээс нөгөө нэгжид шилжин суурьших хөдөлгөөнийг зогсоох аж.

Сонгуулийн бэлтгэл ажлыг хангах зорилгоор Оюуны өмч, улсын бүртгэлийн ерөнхий газраас дээрх шийдвэрийг гаргажээ.

Дархан цаазат Богд хан ууланд өнөөдөр /2017.04.26/ түймэр гарчээ. Нүхтийн аманд түймэр гарч буй тухай дуудлага 30-40 минутын өмнө ОБЕГ-ын шуурхай албаны 101 тоот утсанд ирсэн байна. Дуудлагын дагуу нийслэлийн Гал унтраах ангийн гал сөнөөгч нар галыг унтраахаар ажиллаж байгаа юм.

С.Зориг агсны амийг бүрэлгэсэн хэргээр ял сонссон Ц.Амгаланбаатар, Т.Чимгээ, Б.Содномдаржаа нарыг чанга дэглэмтэй анги руу шилжүүлжээ.

Тэднийг ШШГЕГ-ын харъяа Цагдан хорих 461 дүгээр ангид хорьж байсан юм. Тэгвэл ШШГЕГ-аас хоёр шатны шүүхийн тогтоолыг биелүүлж, яллагдагч нарыг өчигдөр гяндан руу шилжүүлсэн байна.

Эх сурвалжийн мэдээлснээр давж заалдах шатнаас гаргасан ялын тогтоолыг биелүүлж, яллагдагч нарыг чанга дэглэмтэй хорих анги руу шилжүүлсэн нь хууль ёсны дагуу зүйл аж. Дараагийн шатны буюу Улсын дээд шүүхийн хурлаар хэргийг хянан хэлэлцэх тул тус хуралд яллагдагч нар байлцах шаардлагагүй байдаг гэнэ. Гэхдээ тэд өөрсдөө болон ар гэрийнхэн нь хүсэлт гаргавал хуралд оролцож болох аж.

Яллагдагч нар өмгөөлөгчдөөрөө дамжуулж хоёр шатны шүүхийн шийдвэрийг эсэргүүцэн, өнгөрөгч долоо хоногт буюу дөрөвдүгээр сарын 18-ны өдөр Дээд шатны шүүхэд хүсэлт гаргасан байна. Улсын дээд шүүхийн хурлыг С.Зориг агсны дүү С.Оюун нээлттэй явуулах хүсэлт гаргахаа мөн л мэдэгдээд байгаа юм.

Нийслэлийн иргэдийн төлөөлөгчдийн хурал дахь /НИТХ/ Ардчилсан намын бүлгээс цаг үеийн асуудлаар өнөөдөр мэдээлэл хийлээ. Тэд одоогийн Засаг дарга С.Батболдыг ажлаа муу хийж байна хэмээн мэдэгдэв.

НИТХ дахь Ардчилсан намын бүлгийн дарга Ц.Баатархүү: С.Батболд Нийслэлийн Засаг дарга бөгөөд Улаанбаатар хотын захирагчаар томилогдоод есөн сарын хугацаа өнгөрлөө. Энэ бол ажил хийе, нийслэлээ хөгжүүлье гэж боддог хүнд бол хангалттай хугацаа. Гэтэл Засаг дарга С.Батболд өнгөрсөн хугацаанд Нийслэлийн Иргэдийн Төлөөлөгчдийн Хурал /НИТХ/-д 15 тогтоолын төсөл санаачлан өргөн барьсан нь өмнөх Засаг дарга Э.Бат-Үүлийн үеэс хоёр дахин бага байна. 2017 онд хэрэгжүүлэх 15 хөтөлбөр, долоон дэд хөтөлбөр байгаагаас одоогоор нэг нь ч НИТХ болон Тэргүүлэгчдийн хурлаар албан ёсоор батлагдаагүй байна. Ажилдаа санаачилга, хурд муутай байгаагаа мөнгөгүй, төсөвгүй гэсэн башир тайлбар хийж бултах оролдлого хийх боллоо.

Эрүүл мэнд, Нийгмийн даатгалын ерөнхий газраас энэ онд ЭМД-аар даатгуулагчдад сэргээн засах тусламж, үйлчилгээ үзүүлэх Нийслэлийн рашаан сувиллуудын нэр, хаяг, холбогдох утасны дугаарыг гаргасныг хүргэж байна.

Хөдөлмөр, нийгмийн хамгааллын салбарын нээлттэй өдөрлөг маргааш буюу 4 дүгээр сарын 27-нд зохион байгуулагдана. Нийслэлийн эрүүл мэнд, нийгмийн даатгалын газар, Нийслэлийн хөдөлмөр эрхлэлтийн газар, Нийслэлийн нийгмийн халамжийн газрууд хамтран төрийн үйлчилгээг үзүүлэхээс гадна иргэдэд хууль тогтоомжийн талаар зөвлөгөө мэдээлэл өгч ажиллана.

Нийгмийн даатгалын хууль тогтоомжийг сурталчилан таниулах, эрүүл мэндийн болон нийгмийн даатгалын сайн дурын даатгалд хамруулах, хөнгөлттэй эмийн жороор үйлчилнэ.

Мөн Нийслэлийн иргэдэд нээлттэй ажлын байрны мэдээллийг хүргэж, хөдөлмөр эрхлэлтийн үйлчилгээг нэг дороос үзүүлэх, ажил хайгч иргэд тохирох ажлын байрандаа бүртгүүлж түр болон байнгын ажлын байраар хангагдах боломж нөхцөлийг бүрдүүлэх юм.

Эрүүл мэнд болон нийгмийн даатгалын үйлчилгээний талаар төвийн зургаан дүүргийн Эрүүл мэнд, нийгмийн даатгалын хэлтсүүд мэдээлэл өгөхөөс гадна эрүүл мэнд, сайн дурын даатгалын шимтгэлээ төлөх болон дэвтрийн баталгаажуулалтаа хийлгэх боломжтой.

Түүнчлэн тэтгэвэр тогтоолт, олголтын талаар зөвлөгөө мэдээлэл авахыг хүсвэл нээлттэй өдөрлөгт оролцоорой. Өдөрлөг 11-16 цагийн хооронд болно гэж Нийслэлийн эрүүл мэнд, нийгмийн даатгалын газраас мэдээллээ.

Авлигатай тэмцэх газрын дарга, тэргүүн комиссар Х.Энхжаргал Авлигын эсрэг НҮБ-ын конвенц, авлигын эсрэг баримт бичгийн хүрээнд хулгайлагдсан хөрөнгийг илрүүлэх, буцаан олгох асуудлаар НҮБ-ын Мансууруулах бодис, гэмт хэрэгтэй тэмцэх албаны Хулгайлагдсан хөрөнгийг буцаан олгох олон улсын “СТАР” санаачилгын төлөөлөгч Лаура Попыг хүлээн авч уулзлаа.

Энэ үеэр “Монгол Улсын хулгайлагдсан хөрөнгийг илрүүлэх, буцаан олгох чадавхийг бэхжүүлэх” хөтөлбөрийг Авлигатай тэмцэх газартай хамтарч амжилттай хэрэгжүүлсэнийг дурдаад цаашид хөтөлбөрийн хамрах хүрээг өргөжүүлэх хүсэлтэй буйгаа Лаура Поп илэрхийлсэн юм.

Авлигатай тэмцэх газрын дарга, тэргүүн комиссар Х.Энхжаргал Монгол Улсад хулгайлагдсан хөрөнгийг буцаан авах боломжийг нэмэгдүүлэх, хөрөнгө орлогын мэдүүлгийг хянан шалгах, энэ чиглэлийн зохион байгуулалтыг сайжруулах, эрх зүйн орчинг боловсронгуй болгох, хувийн ашиг сонирхлын болон хөрөнгө орлогын мэдүүлгийн цахим программыг шинэчилж сайжруулах зэрэг санаачилга гарган ажиллаж буйгаа танилцуулж цаашид хөтөлбөрийг үргэлжлүүлэн ажиллах болсонд талархал илэрхийлэв.

Хамтын ажиллагааны хүрээнд төрийн албан хаагчдын хувийн ашиг сонирхлын болон хөрөнгө орлогын мэдүүлгийг хянан шалгах чиглэлээр Авлигатай тэмцэх газрын ажилтан, албан хаагчидыг хамруулсан сургалтыг зохион байгуулах ажээ.

Цагдаагийн ерөнхий газарт АТГ-ын Мөрдөн шалгах хэлтсийн дарга Э.Идэрцогоор ахлуулсан ажлын хэсэг ажиллаж байна. Тэд “Авлигатай тэмцэх Үндэсний хөтөлбөрийг сурталчлан таниулах, Олон нийтийн дэд зөвлөлийн гишүүдийг сонгон шалгаруулах, авлигын эсрэг хууль тогтоомжийн хэрэгжилттэй танилцах, авлигын эрсдэлийн үнэлгээ хийх, авлигын эсрэг сургалт зохион байгуулах, арга зүйн туслалцаа үзүүлэх” чиглэлээр ажиллаж байна.

Тус ажлын хэсгээс “Авлигатай тэмцэх үндэсний хөтөлбөр”-т заагдсан яам, агентлаг, орон нутагт гэмт хэргээс урьдчилан сэргийлэх ажлыг зохицуулах салбар зөвлөлийн дэргэд ажиллах, Олон нийтийн хяналтын дэд зөвлөлийн гишүүдийг сонгон шалгаруулах юм.

Хан-Уул дүүргийн XIII хорооны V дугаар хэсэгт байрлах “Бага-Асгат” ХХК-ийн борцны үйлдвэрт хяналт шалгалт хийж, улсын байцаагчийн актаар үйл ажиллагааг нь зогсоолоо гэж Нийслэлийн мэргэжлийн хяналтын газраас мэдээллээ. Тус үйлдвэрт мал эмнэлэг, эрүүл ахуй халдвар хамгааллын хяналтын улсын байцаагчид хамтран хяналт шалгалт хийхэд зориулалтын бус байранд ариун цэвэр, эрүүл ахуйн шаардлага хангахгүй нөхцөлд үйл ажиллагаа явуулж байжээ. Энэ нь Монгол Улсын Хүнсний тухай хуулийн 10.1.2 , Хүнсний бүтээгдэхүүний аюулгүй байдлыг хангах тухай хуулийн 6.5 дах заалтыг тус тус зөрчиж байсан тул улсын байцаагчийн актаар үйл ажиллагааг нь зогсоох арга хэмжээ авсан байна.