Month: February 2017

Categories
мэдээ нийгэм

Гамшгаас хамгаалах ангиудын бэлтгэл бэлэн байдлыг шалгалаа

ГАА-н гамшгаас хамгаалах алба мэргэжлийн ангиуд аймгийн засаг даргын захирамжаар бэлэн байдлын үзлэгт хамрагдлаа. Гамшгийн нөхцөл байдалд хүрсэн тохиолдолд гурван хоногийн бэлэн байдалд байх ,зэрэгт хяналт тавив.

Албны хүнээс тодруулахад “Гамшгийн аюулаас хүн ам, мал амьтан, эд хөрөнгө, хүрээлэн байгаа орчныг урьдчилан сэргийлэх, аврах, хор уршгийг арилгах, эдгээр үйл ажиллагаанд хүн амыг сургаж бэлтгэх цогцолбор арга хэмжээ авч ажиллаж байна” гэв.

Гамшгийг дотор нь аюулт үзэгдэл, техникийн холбогдолтой осол гэсэн хоёр үндсэн хэсэгт хуваадаг юм байна. Аюулт үзэгдэлд хүчтэй цасан ба шороон шуурга, ган зуд, үер, газар хөдлөлт, цөлжилт, гал түймэр, хүн мал амьтны болон ургамалын гоц халдварт өвчин гарах, хортон мэрэгчид тархахзэргийг хамруулна.

Техникийн холбогдолтой осолд, Үйлдвэрлэлийн технологийн үйл ажиллагаа зөрчигдсөнөөс тоног төхөөрөмж, барилга байгууламж, шугам сүлжээ эвдрэх, тээврийн хэрэгсэл сүйрэх, цацраг идэвхит болон химийн хорт бодис алдагдах зэргийг хамруулдаг байна.

Харин гамшгийн менежмент гэдэг нь нэн тэргүүнд эрсдэл ихтэй хүн амын эмзэг байдлыг бууруулах болон гамшиг тохиолдсон үед түүний хор уршгийг арилгах арга хэмжээг аль болох үр дүнтэй болгох зорилготой өргөн хүрээтэй хөгжлийн хандлагатай багц үйл ажиллагаа гэдгийг танилцууллаа.

Categories
мэдээ улс-төр

Туул голыг хамгаалах асуудлаар Засгийн газарт чиглэл өглөө

Өргөдлийн байнгын хорооны хуралдаанаар “Туул голын бохирдлын асуудлаар Монгол Улсын Засгийн газарт чиглэл өгөх тухай” тогтоолын биелэлт, явцын талаар УУХҮЯ-ны мэдээллийг сонсов.

Өргөдлийн байнгын хорооноос өнгөрсөн оны 11дүгээр сарын 23-нд Засгийн газарт Туул голын сав газарт элс, хайрга олборлох үйл ажиллагааг зогсоох, хайгуулын 11, ашиглалтын 39 тусгай зөвшөөрлийг цуцлах, Төв цэвэрлэх байгууламжийн шинэчлэлийн ажлыг шуурхайлах, Туул голыг бохирдуулсан иргэн, аж ахуйн нэгжид хүлээлгэх эрүүгийн болон захиргааны хариуцлагыг чангатгах зэрэг чиглэл өгсөн юм. Үүний биелэлтийг өнөөдөр УУХҮ-ийн сайд Ц.Дашдорж танилцуулав.

Ашигт малтмалын хайгуулын тусгай зөвшөөрөл шинээр олгохыг хориглох тухай хууль анх 2010 онд батлагдсан. Үүнээс хойш гурван жил хугацаанд хайгуулын тусгай зөвшөөрөл шинээр олгоогүй нь зам, барилга, дэд бүтцийн бүтээн байгуулалтад шаардлагатай элс, хайрга зэрэг түгээмэл тархацтай ашигт малтмалын хайгуулын ажил зогсонги байдалд орсон байна. Тиймээс Түгээмэл тархацтай ашигт малтмалын тухай хуулийг УИХ-аас 2014 онд баталж, түгээмэл тархацтай ашигт малтмалын хайгуулын болон ашиглалтын тусгай зөвшөөрөл олгох бүрэн эрхийг аймаг, нийслэлийн Засаг дарга нарт олгожээ. Хууль батлагдсанаас хойш өнөөдрийг хүртэл нийт 826 өргөдөл аймаг, орон нутгийн Засаг дарга нараар дамжин Ашигт малтмалын газарт иржээ. Үүнээс 273 тусгай зөвшөөрөл олгогдсон бөгөөд 205 өргөдөлд олгох боломжтой талаар дүгнэлт гарсан байна.

УУХҮ-ИЙН САЙД Ц.ДАШДОРЖ:

-Туул голын орчимд нэгэнт олгогдсон түгээмэл тархацтай ашигт малтмалын хайгуулын болон ашиглалтын тусгай зөвшөөрлийг нийслэлийн Засаг дарга шийдвэрлэх бүрэн эрхтэй байна. Байнгын хорооны тогтоолын 10 дахь хэсэгт “..түгээмэл тархацтай ашигт малтмалын тусгай зөвшөөрлийг олгох, цуцлах эрхийг геологи, уул уурхайн асуудал эрхэлсэн төрийн захиргааны байгууллагад шилжүүлэх асуудлыг шийдвэрлэх”-ийг Засгийн газарт чиглэл болгосон. Түгээмэл тархацтай ашигт малтмалын тухай хуульд нэмэлт, өөрчлөлт оруулах, эсхүл түүнийг хүчингүй болгох замаар тусгай зөвшөөрөл олгох, цуцлах эрхийг Ашигт малтмал, газрын тосны газарт шилжүүлэх боломжтой. Иймд 2014 оны Түгээмэл тархацтай ашигт малтмалын тухай хуульд нэмэлт, өөрчлөлт оруулах, эсвэл түүнийг хүчингүй болгох шаардлагатай хэмээсэн юм. Хэлэлцэж байгаа асуудалтай холбогдуулан гишүүд асуулт тавьж, байр сууриа илэрхийлэв.

УИХ-ЫН ГИШҮҮН А.СҮХБАТ:

Гэр хороололд 200 мянга орчим ил задгай бие засах газар байгаа гэсэн судалгаа танилцуулсан. Тийм биш. Өмнө нь ухаад, дүүрэх үед буцаагаад булчихсан хэдэн мянган газар бий. Нэг айл 10 жил амьдрахдаа хашаандаа хамгийн багадаа гурван удаа бие засах газар ухдаг. Тиймээс ил задгай бие засах газрыг бетоноор доторлох, түүнийг нь соруулж авдаг системд шилжих хэрэгтэй. Ингэхгүйгээр хөрс, усны бохирдлыг арилгах талаар ярих боломжгүй гэв.

Ингээд байнгын хорооноос Туул голыг хамгаалах асуудлаар Засгийн газарт дахин чиглэл өглөө. Байнгын хорооноос өгөх чиглэлийн төсөлд Туул голын ойролцоо хайгуулын болон ашиглалтын тусгай зөвшөөрөл өгөхийг хориглох, Ашигт малтмал, газрын тосны газарт тусгай зөвшөөрлийн үйл ажиллагааг төвлөрүүлэх, нөхөн сэргээлт хийгээгүй аж ахуйн нэгжийн эрхийг цуцлах зэргийг тусгажээ. Мөн барилга, зам, төмөр замын салбарт элс, хайрга олборлохр газар нутгийг тодорхойлох, үүнд тавих хяналтын бүтцийг бий болгохоор тусгасан байна.

Categories
онцлох-нийтлэл туслах-ангилал

ЭЕШ-ын монгол, англи, орос хэлний сонсголын даалгаврын оноог үндсэн дүнд оруулж тооцно

Элсэлтийн ерөнхий шалгалтын бүртгэл өнөөдөр эхэлсэн. Боловсролын үнэлгээний төвөөс энэ оны ЭЕШ-ын шинээр гарсан дүрэм, өөрчлөлтийн талаар сэтгүүлчдэд мэдээлэв. Бүртгэл дөрөвдүгээр сарын 14-ны 18 цаг хүртэл үргэлжлэх бөгөөд хугацаа сунгахгүй гэнэ шүү.

Бүртгэлийн үнэлгээний төвийн хэлтсийн дарга Л.Ганбат ийнхүү мэдээллээ.

Бүртгэлийн системийг энэ жил хүүхдүүдэд хялбар болгохын тулд хэд, хэдэн өөрчлөлт орсон. Үүний нэг нь БСШУЯ-ны мэдээллийн нэгдсэн системийн сервертэй бүртгэлийг холбосон. Тухайн шалгуулагч регистрийн дугаараа оруулахад өөрийнх нь хувийн мэдээллээс гадна шалгалттай холбоотой бүх шаардлагатай мэдээллүүд яамны мэдээллийн нэгдсэн цэгээс автоматаар гарч ирнэ. Үүний дагуу хүүхдүүд өөрсдийнхөө хувийн мэдээллийг зөв буруу эсэхийг шалган бүртгэлээ баталгаажуулна. Хувийн мэдээлэл буруу байвал заавал БҮТ-д очих шаардлагагүйгээр сургуулийнхаа сургалтын менежер эсвэл ангийн багшдаа хандан мэдээллийг засах боломжтой. Мөн шалгуулагчид бүртгүүлснийхээ дараа дахин шинэ хичээл нэмэх бол манай цахим хуудасны шалгуулагч гэсэн буланд орж хүссэн үедээ, хэдэн ч удаа өөрсдөө нэмж болно. Бүртгэлийн хураамж өмнөх жилтэй адил нэг хичээл 5800 төгрөг, батламж хуудас 700 төгрөг байна. Энэ жил Монгол хэлний шалгалтад босго оноо байхгүй. Гэхдээ заавал Монгол хэлний шалгалтаа өгч байж ерөнхий шалгалт өгөх, их дээд сургуульд орох боломж нээгдэнэ. Монгол хэлний шалгалтын дүн оноо долдугаар сарын 1-нд ерөнхий шалгалтын адил есөн цаг гэхэд гарна. Ерөнхий шалгалтын батламж хуудас, Монгол хэлний шалгалтын батламж хуудсыг тус тусад нь олгоно. Эдгээр батламж нь дээд сургуульд ороход бүрдүүлэх гол бичиг баримтын нэг юм. Сүүлийн хоёр жилд туршилтын журмаар авч байсан монгол, англи, орос хэлний хичээлийн шалгалтын сонсголын даалгаврыг энэ жил үндсэн дүн оноонд оруулж өгч байгаа.Энэ нь хүүхдүүдийн чадварыг шалгахад олон улсын стандартад дөхөж буй хэрэг юм. Улсын хэмжээнд нийт шалгалтын 50 байр бий. Эдгээр байруудыг шаардлагын дагуу тоног төхөөрөмжөөр тоноглох ажил ид өрнөж байна. Шалгалт авах байранд хяналтын камер, сүлжээ сарниулагч, металл илрүүлэгч багаж, сонсох төхөөрөмж зэргийг байршуулна. Нэг и-мэйл хаяг дээрээс олон хүүхэд бүртгэж болдог байсныг өөрчлөн нэг хүн нэг л хаягаар бүртгүүлэхээр болсон. Ингэснээр мэдээлэл буруу очдог явдал зогсоно. Сүүлийн үед интернетээр тарааж байгаа их, дээд сургуулийн мэдээллүүд нь албан ёсны биш байгааг анхаарах хэрэгтэй” гэв.

Элсэлтийн ерөнхий шалгалттай холбоотой мэдээллийг 75779498 гэсэн лавлах утаснаас 24 цагийн турш аваарай.

Categories
мэдээ улс-төр

Уул уурхай, хүнд үйлдвэрийн сайдын мэдээлэл сонслоо

Улсын Их Хурлын Өргөдлийн байнгын хорооны өнөөдрийн /2017.02.01/ хуралдаан 09 цаг 20 минутад 52.6 хувийн ирцтэй эхэллээ. Хуралдаанаар “Туул голын бохирдлын асуудлаар Монгол Улсын Засгийн газарт чиглэл өгөх тухай” 2016 оны 03 дугаар тогтоолын биелэлт, явцын талаар Уул уурхай, хүнд үйлдвэрийн яамны мэдээлэл сонссон юм.

УИХ-ын Өргөдлийн байнгын хорооны 2016 оны 03 дугаар тогтоолын хэрэгжилтийн танилцуулгыг Уул уурхай, хүнд үйлдвэрийн сайд Ц.Дашдорж хийв. Тэрээр, Ашигт малтмалын хайгуулын тусгай зөвшөөрөл шинээр олгохыг хориглох тухай хууль анх 2010 онд батлагдан хэрэгжсэнээр 3 жил гаруйн хугацаанд хайгуулын тусгай зөвшөөрөл шинээр олгоогүй нь зам, барилга, дэд бүтцийн бүтээн байгуулалтын ажлын үед тэдгээр бүтээн байгуулалтад шаардлагатай элс, хайрга зэрэг түгээмэл тархацтай ашигт малтмалын хайгуулын ажил зогсонги байдалд орсон гэж үзэн Түгээмэл тархацтай ашигт малтмалын тухай хуулийг УИХ-аас 2014 оны 01 дүгээр сард баталсан. Улмаар уг хуулийн 11 дүгээр зүйлийн 11.2.5-д “харьяалах нутаг дэвсгэрт нь хамаарах түгээмэл тархацтай ашигт малтмалын хайгуулын болон ашиглалтын тусгай зөвшөөрөл олгох” бүрэн эрхийг аймаг, нийслэлийн Засаг дарга нарт олгосны дагуу 2014 оноос эхлэн хайгуул, ашиглалтын тусгай зөвшөөрлийг аймаг, нийслэлийн Засаг дарга нар олгож байна. Хууль батлагдсанаас хойш 2017 оны 01 дүгээр сарын 19-ний байдлаар нийт 826 өргөдөл аймаг, орон нутгийн Засаг дарга нараар дамжин Ашигт малтмалын газарт /хуучнаар/ ирсэн. Үүнээс 273 тусгай зөвшөөрөл олгогдсон бөгөөд 205 өргөдөлд олгох боломжтой талаар дүгнэлт гарсан, мөн 317 өргөдөлд олгох боломжгүй талаар тус тус дүгнэлт гарсан байдалтай байна.

Өргөдлийн байнгын хорооны 2016 оны 11 дүгээр сарын 23-ны өдрийн 03 дугаар тогтоолын 3 дахь хэсэгт “Туул голын сав газар, түүний ойр орчимд элс, хайрга олборлохыг зогсоох”, мөн 9 дэх хэсэгт “Туул голын энгийн хамгаалалтын бүсэд олгогдсон түгээмэл тархацтай ашигт малтмалын хайгуулын 11, ашиглалтын 39 тусгай зөвшөөрлийг цуцлах, 116,9 га талбайд нөхөн сэргээлт хийлгэх”-ээр Засгийн газарт чиглэл өгсөн. Туул голын орчимд нэгэнт олгогдсон түгээмэл тархацтай ашигт малтмалын хайгуулын болон ашиглалтын тусгай зөвшөөрлийг зөвхөн тус хуульд заасан үндэслэлээр цуцлах хуулийн зохицуулалттай. Уг асуудлыг Түгээмэл тархацтай ашигт малтмалын тухай хуулийн “Тусгай зөвшөөрлийг цуцлах” гэсэн 37 дугаар зүйлээр зохицуулж байна. Хуулийн 37 дугаар зүйлийн 1 дэх хэсэгт тусгай зөвшөөрлийг цуцлах дөрвөн үндэслэлийг заасан бөгөөд уг асуудлыг аймаг, нийслэлийн Засаг дарга шийдвэрлэх бүрэн эрхтэй байна. Түүнчлэн Байнгын хорооны тогтоолын 10 дахь хэсэгт “..түгээмэл тархацтай ашигт малтмалын тусгай зөвшөөрлийг олгох, цуцлах эрхийг геологи, уул уурхайн асуудал эрхэлсэн төрийн захиргааны байгууллагад шилжүүлэх асуудлыг шийдвэрлэх”-ийг Засгийн газарт чиглэл болгосон. Түгээмэл тархацтай ашигт малтмалын тухай хуульд нэмэлт, өөрчлөлт оруулах, эсхүл түүнийг хүчингүй болгох замаар тусгай зөвшөөрөл олгох, цуцлах эрхийг шилжүүлэх боломжтой. Иймд 2014 оны Ашигт малтмалын хайгуулын тусгай зөвшөөрөл шинээр олгохыг хориглох тухай хуулийг хүчингүй болгосноор хайгуулын тусгай зөвшөөрлийг шинээр олгох боломжтой болсон тул Түгээмэл тархацтай ашигт малтмалын тухай хуульд нэмэлт, өөрчлөлт оруулах, эсхүл түүнийг хүчингүй болгох асуудлыг дэмжиж байна гэлээ.

Сайдын мэдээлэлтэй холбогдуулан УИХ-ын гишүүд асуулт асууж, тайлбар авахын зэрэгцээ саналаа илэрхийлэв. УИХ-ын гишүүн М.Оюунчимэг, Түгээмэл тархацтай ашигт малтмалын тухай хуультай холбогдуулан Уул уурхай, хүнд үйлдвэрийн яамнаас хийж буй ажлын талаар тодруулга авсан юм. Түүнчлэн тэрээр АНУ-ын туршлага судлахад холбогдох газар нь ашигт малтмалын тусгай зөвшөөрөл олгохдоо нэн тэргүүнд нөхөн сэргээлт хийлгүүлэх тухай баталгаа авдаг. Тухайлбал, тухайн аж ахуйн нэгж баталгаа болгож мөнгө байршуулдаг юм байна. Иймд гадны сайн туршлагыг нэвтрүүлэх үүднээс уг хуульд тусгах санал илэрхийлж байсан юм.

Уул уурхай, хүнд үйлдвэрийн сайд Ц.Дашдорж хэлэхдээ, лицензийн зохицуулалтыг тухайн аймаг, нийслэл өөрөө шийдвэрлэж байгаа нь тус яаманд хүндрэл учруулж байна. Иймд аймаг, нийслэлийн удирдлагуудад удирдамж өгч, хуульд өөрчлөлт оруулах шаардлага үүсч байна. Хуульд нэмэлт, өөрчлөлт оруулснаар яам, газар болон Засаг дарга нар нэг тогтолцоо дор ажиллах боломж бүрдэнэ гэж үзэж байна гэлээ. Түүнчлэн хуульд нөхөн сэргээлт хийх төдийгүй мөнгө байршуулах тухай асуудал тусгагдсан байгаа гэв.

Ийнхүү “Туул голын бохирдлын асуудлаар Монгол Улсын Засгийн газарт чиглэл өгөх тухай” 2016 оны 03 дугаар тогтоолын биелэлт, явцын талаар Уул уурхай, хүнд үйлдвэрийн яамны мэдээлэл, УИХ-ын гишүүдийн саналыг сонссоны дараа Өргөдлийн байнгын хорооны дарга Д.Сарангэрэл өнөөдрийн хуралдааныг дүгнэж, Засгийн газарт чиглэл өгөх тухай Байнгын хорооны тогтоолын төслийг танилцуулсан юм. Уг тогтоолын төсөлд тусгай зөвшөөрөл олгохыг түр хугацаанд түдгэлзүүлэх, нөхөн сэргээлт хийгээгүй аж ахуйн нэгжийн эрхийг цуцлах зэрэг чиглэлүүд тусгагдсан байна.

Ингээд тогтоолын төсөлтэй холбогдуулан УИХ-ын гишүүд санал хэлж, байр сууриа илэрхийлсний дараа Засгийн газарт чиглэл өгөх тухай найман зүйл бүхий Байнгын хорооны тогтоолын төсөл хуралдаанд оролцсон гишүүдийн олонхийн дэмжлэг авсан юм хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээлэв.

Categories
мэдээ нийгэм

Цагаан сарын үзэсгэлэн худалдаа 20-ыг хүртэл үргэлжилнэ

Чингэлтэй дүүргийн Засаг даргын Тамгын газраас Монголын уламжлалт сар шинийн баярыг тохиолдуулан үзэсгэлэн худалдаа зохион байгуулж байна. Үзэсгэлэн худалдаа энэ сарын 20-ны өдрийг хүртэл Тусгаар тогтнолын талбайд үргэлжилнэ. Тус худалдааг Чингэлтэй дүүргийн 25 жилийн ойн хүрээнд дүүргийн Засаг даргын Тамгын газар, жижиг, дунд үйлдвэрлэлийг дэмжих Бизнес инкубатор төв, “Нэг Архангай” ТББ-ынхан хамтран зохион байгуулж байгаа юм байна.

Categories
гадаад мэдээ

Саран дээр хүчилтөрөгч байгааг илрүүлжээ

Дэлхийн агаар мандлын хүчилтөрөгчийн бөөмсүүд саран дээр байдаг төдийгүй тэдгээр бөөмсүүд нь 2,4 тэрбум жилийн өмнө дэлхийгээс сар руу дамжин иржээ. Энэ тухай Осакагийн их сургуулийн эрдэмтэд мэдээлэв.

Японы эрдэмтэд 10 жилийн өмнө сар руу илгээсэн судалгааны “Кагуя” аппаратаас авсан мэдээллийг боловсруулсны үндсэн дээр ийм дүгнэлт хийжээ. Дүгнэлтэд дурдсанаар, нар, дэлхий, сар гурав нэг шугаман дээр зэрэгцэн ирэх үед хүчилтөрөгчийн ионууд дэлхийн агаар мандлаас салж, саран дээр очсон байх магадлалтай гэдгийг тогтоосон байна. 384 мянган километр зайг туулахад хүчилтөрөгчийн ионуудад нарны шуурга дэм болдог байна. Бусад үед нь сарыг тойрсон ионуудын үзүүлэлтүүд нь өөр өөр байдаг ажээ.

Японы эрдэмтдийн үзэж байгаагаар, энэ үйл явц анх 2,5 тэрбум орчим жилийн өмнө эхэлжээ. Чухам тэр үед хүчилтөрөгчийн сүйрэл хэмээх үзэгдэл болж, энэ нь дэлхийн агаар мандлын бүтэц эрс өөрчлөгдөж, түүн дотор чөлөөт хүчилтөрөгч бий болоход хүргэжээ.

Дэлхийн хүчилтөрөгчийн ихэнх хэсэг нь фотосинтез урвалын үр дүнд бий болдог ба манай гараг дээр болж буй процессууд нь саранд шууд нөлөө үзүүлдэг болохыг бидний судалгаа нотолж байна” хэмээн Осакагийн их сургуулийн профессор Кэнтаро Тэрада ярилаа.

Японы сансрын хөтөлбөрт сарыг судлах ажил томоохон байр суурийг эзэлдэг. Тухайлбал, 2007 онд хөөргөсөн “Кагуя” аппаратын тусламжтайгаар сарны гадаргуугийн зургийг олон удаа авч чадсан ба эдгээр зургуудыг “Google” корпорацын мэргэжилтнүүд гурван хэмжээст загварыг зохиохдоо ашиглажээ. Ойрын ирээдүйд Японы мэргэжилтнүүд саран дээр буулгах зорилгоор анхны автомат аппаратыг хөөргөхөөр төлөвлөж байна.

Categories
мэдээ нийгэм

Тэнэмэл иргэдийн дунд “Гэртээ харих зам” төсөл хэрэгжүүлнэ

Нийслэлийн Халамжийн үйлчилгээний хэлтсээс Улаанбаатар хотын хэмжээнд орон гэргүй тэнэмэл амьдралтай иргэдийг бүртгэлжүүлэх ажлыг хоёр үе шаттай хэрэгжүүлж байна.

Нийслэлийн Нийгмийн халамжийн газраас Сүхбаатар дүүргийн Тамгын газрын байранд Гэр оронгүй тэнэмэл амьдралтай иргэдийг нийгэмшүүлэх “Гэртээ харих зам” хөтөлбөрийг танилцуулав.

Өнөөдрийн байдлаар нийслэлийн хэмжээнд орон гэргүй тэнэмэл амьдралтай 919 иргэн бүртгэгдээд байгааг Нийслэлийн Нийгмийн Халамжийн Газрын олон нийтийн оролцоонд түшиглэсэн халамжийн үйлчилгээ хариуцсан мэргэжилтэн Ц.Энхжаргал онцоллоо.

Гэр оронтой хэдий ч өөрийн сонирхлоороо тэнэмэл амьдралаар амьдарч буй иргэд 6.3 хувийг эзэлж байгааг тэрээр дурдсан юм. Тус хөтөлбөрт нийслэлийн хэмжээнд жилд 2.6 тэрбум төгрөг төсөвлөснөөс одоогийн байдлаар нийслэлийн хоёр дүүрэгт 2017 оны төсвөөс санхүүжилт гаргахаар хуваарилжээ. Тодруулбал Сүхбаатар дүүрэг 10 сая төгрөг, Сонгинохайрхан дүүрэгт зургаан сая төгрөгийг Нийслэлийн Нийгмийн халамжийн газраас “Гэртээ харих зам” хөтөлбөрт зориулж олгосон байна. Сүхбаатар дүүргийн хэмжээнд 186 орон гэргүй, тэнэмэл амьдралтай иргэнийг бүртгэлжүүлсэнийг тус дүүргийн Засаг Даргын орлогч Л. Нармандах тодотгов. Тэнэмэл иргэдийн эрүүл мэндийн асуудлыг онцгойлон анхаарч үзэхэд залуучуудын дунд бэлгийн замын халдварт өвчин их байгааг албаныхан хэлж байв.

“Гэртээ харих зам” хөтөлбөрийг хэрэгжүүлэхэд хамгийн тулгамдсан асуудал бол хөрөнгө санхүү байгааг холбогдох албаныхан өгүүллээ. Тухайлбал орон гэргүй тэнэмэл амьдралтай нэг иргэнийг бичиг баримтжуулахад 18 мянган төгрөг зарцуулдаг байна.

Categories
мэдээ улс-төр

Хөгжлийн банкны асуудлыг хэлэлцэхээр болов

Эдийн засгийн байнгын хорооны хуралдаанаар Аялал, жуучлалын салбарын өнөөгийн байдал болон эдийн засгийг сэргээх хөтөлбөрт аялал, жуучлалын талаар тусгагдсан зорилт, арга хэмжээг хэрэгжүүлэх бэлтгэл ажлын явц, тулгамдсан асуудлуудын талаархи Байгаль орчин, аялал жуучлалын сайдын мэдээллийг сонслоо.

Байнгын хорооны хуралдаанаар Хөгжлийн банкны хуулийн төслийн шинэчилсэн найруулгыг хэлэлцэхээр байлаа. Харин гишүүн Ч.Хүрэлбаатар Хөгжлийн банктай холбоотой хэлэлцүүлгийг хойшлуулах санал гаргажээ. Тиймээс энэ асуудлаар санал хураалт явууллаа. Байнгын хорооны гишүүдийн олонхи нь уг саналыг дэмжсэнгүй.

Ийнхүү байнгын хорооны хуралдаан завсарлаж, үдээс хойш 15.00 цагаас үргэлжлүүлэн хэлэлцэхээр боллоо.

Categories
мэдээ нийгэм

Д.Сүхбаатарын малгай, дээл, гутал, хөөрөг үзэсгэлэнд тавигдана

Жанжин Д.Сүхбаатарын мэндэлсний 124 жилийн ой, Маршал Х. Чойбалсангийн мэндэлсний 122 жилийн ойд зориулан “ТУСГААР ТОГТНОЛЫН ТӨЛӨӨХ МӨНХИЙН ҮЙЛС” үзэсгэлэнг БСШУСЯ, Монголын Үндэсний музей хамтран энэ сарын 2-8-ны өдрүүдэд зохион байгуулах гэнэ.

Монголын төр, нийгмийн зүтгэлтэн, их жанжин Д.Сүхбаатар 1893 оны 2 дугаар сарын 2-нд Их хүрээний зүүн дүүрэг, Элбэг амгалан гацаанд мэндэлжээ. Харин маршал Х.Чойбалсан 1895 оны 2 дугаар сарын 8-ны өдөр Сэцэн хан аймгийн Ачит вангийн хошуунд мэндэлсэн байна. Алдартануудын төрсөн өдрийг тохиолдуулан энэхүү үзэсгэлэнг дэлгэн үзүүлэх юм.
Уг үзэсгэлэнд их жанжин Д.Сүхбаатар болон маршал Х.Чойбалсан нарын эдэлж хэрэглэж байсан дээл хувцас, одон тэмдэг, бичгийн хэрэглэл, зэр зэвсэг болон нэрт уран бүтээлчдийн туурвисан урлагийн бүтээлүүд, уран зураг, баримал зэрэг тус музейн сан хөмрөгт хадгалагдаж буй 160 гаруй ховор сонин үзмэр багтжээ. Жанжин Д.Сүхбаатарын малгай, дээл, гутал, хөөрөг даалин, сэлэм уг үзэсгэлэнд тавигдах юм. Маршал Х.Чойбалсангийн тэрлэг дээл, цэрэг малгай, маршал сэлэм, бичгийн хэрэгсэл зэрэг сонирхолтой түүхэн үзмэрүүд бас бий.
Д.Сүхбаатар 14 наснаасаа бичиг үсэгт шамдан сурч, 1911 онд цэргийн албанд ирж, пулемёт сумангийн даргаар ажилласан бөгөөд 1918 онд эх орныхоо төлөө дайнд оролцож баатар цолоор шагнагдсан. Тэрээр Ардын хувьсгалын удирдагчдын нэг төдийгүй оросын хувьсгалчидтай холбоо тогтооход онцгой үүрэг гүйцэтгэсэн хүн юм. 1922 онд Цэргийн яамны сайд, Бүх Цэргийн жанжинаар томилогдон ажиллаж байв.
Х.Чойбалсанд эцэг Жамц нь Дугар гэдэг нэр өгсөн ч долоон наснаасаа эхлэн төвд ном үзэж, улмаар 13 насандаа Санбэйсийн хүрээнд шавилан сууж, сахил хүртэн, Чойбалсан хэмээх нэртэй болсон байна. 1924 оны намраас 1928 он хүртэл бүх цэргийн жанжин, 1929-1930 онд Улсын Бага Хурлын дарга, 1931 оны эцсээс Мал тариалангийн яамны сайдын албыг тус тус хашиж байсан. 1939-1952 он хүртэл Монгол Улсын Ерөнхий сайдаар тасралтгүй 13 жил ажилласан төр, нийгмийн нэрт зүтгэлтэн билээ.

Үзэсгэлэнгийн нээлт 2-ны 14:00 цагт Монголын Үндэсний Музейд болно.

Categories
мэдээ нийгэм

Сибирээс нөхөн сэргээх эмчилгээнд хамтран ажиллахаар эмч нар иржээ

Сибирийн эрдэм шинжилгээ эмнэлзүйн төвийн ерөнхий эмч Осипова Татьяна Михайловна, хөрөнгө оруулалт, төслийн газрын захирал Яковлева Людмила Ивановна, чанарын албаны дарга Хмелевская Елена Георгиевна, хэвлэлийн төлөөлөгч Соколова Марина Александровна нар Улаанбаатар хотноо ирлээ.

Тус төв нь ОХУ-ын Красноярск хотод байрладаг бөгөөд Сибирийн холбооны тойрогт төдийгүй ОХУ, хамтран ажилладаг гадаад орнуудад амь тэмцсэн үеийн анагаах ухаан, спортын анагаах ухаан, мэдрэлийн мэс засал, мэдрэлийн эмгэгийн дараах нөхөн сэргээх эмчилгээгээр олон улсын жишигт хүрсэн тусламж үйлчилгээ үзүүлдэг төв юм.

ОХУ-ын Эмнэлэг биологийн агентлагийн харъяа СЭШЭТ-ийн төлөөлөгчид манай улсын эрүүл мэндийн салбарын ижил төстэй үйлчилгээ үзүүлдэг байгууллагуудтай хамтын ажиллагаа тогтоох, томоохон эмнэлгүүдийн үйл ажиллагаатай танилцах зорилготой иржээ.

ЭМЯ-нд болсон уулзалтаар цаашид цөмийн оношлогоо эмчилгээ, эрхтэн шилжүүлэн суулгах, уламжлалт анагаах ухааны чиглэлээр хамтарч ажиллах талаар харилцан санал бодлоо солилцлоо. Мөн төлөөлөгчид УНТЭ-ийн цөмийн онош зүй, мэдрэлийн эмнэлзүйн төвийн үйл ажиллагаатай танилцжээ.