Month: January 2017

Categories
мэдээ улс-төр

АН-ын бүлэг Дотоодын цэргийн тухай хуулиар тайлбар авлаа

УИХ дахь Ардчилсан намын ээлжит хурал /2017.01.31/ Төрийн ордны “Чингис хаан” танхимд боллоо. Хурлаар Хууль зүйн байнгын хорооны 2016 оны 06 дугаар тогтоолоор байгуулагдсан Оросын холбооны Улсын Засгийн газар болон тус улсын өндөр технологийн үйлдвэрлэлийн бүтээгдэхүүн бүтээх, үйлдвэрлэх, экспортлох ажиллагааг дэмжих “Ростех” улсын корпорацийн “Эрдэнэт үйлдвэр” ХХК болон “Монголросцветмет” ХХК-нд эзэмшиж байсан 49 хувийн энгийн хувьцааг Монголиан Коппер Корпорейшн ХХК худалдан авсантай холбогдох асуудлыг иж бүрнээр нь шалгаж, санал, дүгнэлт гаргах үүрэг бүхий ажлын хэсгийн санал, дүгнэлтийг УИХ-ын гишүүн Ж.Батзандан танилцуулж, бүлгийн гишүүд санал бодлоо солилцлоо.

Мөн хурлаар Цагдаагийн албаны тухай хуулийн шинэчилсэн найруулгын төсөл болон холбогдох бусад хуулийн төслүүд, Дотоодын цэргийн тухай хуулийн төсөл болон холбогдох бусад хуулийн төслүүдийг хэлэлцэж, уг хуулийн төслүүдтэй холбоотойгоор Хууль зүйн яам болон Цагдаагийн ерөнхий газрын холбогдох албаныхнаас мэдээлэл тодруулга авлаа.

Хурлын дараагаар УИХ дахь Ардчилсан намын бүлгийн дарга С.Эрдэнэ болон Ажлын албаны дарга Д.Золжаргал нар хэлэлцсэн асуудлуудын талаар мэдээлэл хийв. УИХ дахь Ардчилсан намын бүлгийн дарга С.Эрдэнэ: “УИХ аль нэг асуудалд шууд шийдвэр гаргах эрх байхгүй. Тийм учраас бид “Эрдэнэт”-ийн 49 хувьд ямар нэг гэмт хэргийн бүрэлдэхүүн байгаа гэж үзвэл хууль хяналтын байгууллагаар шалгуулах хэрэгтэй. Мөн “Эрдэнэт”-ийн 51 хувьтай холбоотой асуудал яригдахгүй байгаа. Арбитрийн шүүхийн шийдвэр гарсан байгаа гэсэн мэдээлэл ирээд байна. “Эрдэнэт”-д ил далд бизнесийн шахаа хийгддэг гэдэг. Тиймээс өнөөдөр энэ талаар шалгах шаардлагатай гэж үзэж байгаа. “Эрдэнэт”-ийн 49 хувь, 51 хувийг иж бүрнээр нь шалгах ажлын хэсэг гаргах саналыг УИХ дахь Ардчилсан намын бүлгийн зүгээс үзэж байна.

Өнөөдөр Цагдаагийн тухай хуульд өөрчлөлт орж байгаа. Нэн ялангуяа иргэдийн халдашгүй байдалд ямар өөрчлөлт орох, цагдаагийн албан хаагчдын эрх зүйн байдалд ямар өөрчлөлт орох талаар бүлгийн хуралдаанаар мэдээлэл сонслоо. Ингээд Цагдаагийн албан хаагчдын тухай хуулийн төслийг хэлэлцүүлэх нь зүйтэй гэсэн байр сууринд хүрлээ. Дотоодын цэргийн тухай хуулиар мөн тайлбар авлаа. Хугацаат цэргийн албан хааж байгаа 18 нас хүрсэн залуус жагсаалт цуглааныг хамгаалахад төлөвшөөгүй байдаг. Энэ асуудал яаж хандаж байгааг хууль санаачлагач нараас тодруулсан. Дотоодын цэргийг мэргэшсэн офицер ахлагч нараар бүрдүүлнэ гэдэг тайлбар өгсөн. Тиймээс бид энэ асуудлыг эргэн харж, хууль санаачлагачтай хамтарч ажиллан, Үндсэн хууль болон холбогдох хуулийг зөрчөөгүй хэмжээнд хэлэлцэхээр болсон” гэв.

Categories
мэдээ нийгэм

УИХ-ын гишүүн Б.Дэлгэрсайхан улсад 100 сая төгрөг хандивлана гэв

УИХ-ын гишүүн Б.Дэлгэрсайхан эдийн засгийн хүндрэлийг даван туулахад дэмжлэг үзүүлэх зорилгоор төрд 100 сая төгрөгийн хандив өргөж байгаа талаараа өнөөдөр мэдээлэв.

Тэрбээр, “Эдийн засгийн хүндрэлийг даван туулахад бүх нийтийн оролцоог хангах зорилгоор төрд хандив өгөх уриалгыг Гавъяат эдийн засагч Б.Осоргарав гаргасан байна. Энэхүү санаачлагдаг нэгдэж, эдийн засгийн хүндрэлийг хамтдаа даван туулахыг УИХ-ын гишүүд, хувийн аж ахуйн нэгжүүд болон алба хаагчдыг нэгдэхийг уриалж байна” хэмээв.

580 сая ам.долларын өрийг төлөхөд төрдөө тодорхой хэмжээний тусламж үзүүлэх зорилт тавьж байгаагаа УИХ-ын гишүүн Н.Оюундарь хэлэв. Тэрбээр, “Манай нөхөр бизнес эрхэлдэг. Түүнтэйгээ ярилцаж байгаад хэдэн төгрөгийн хандив өргөхөө шийдвэрлэх болно” гэлээ.

Мэдээллийн дараа сэтгүүлчид сонирхсон асуултдаа хариулт авав.

-Засгийн газар эдийн засгийг өргөх хөтөлбөр батлаад нилээдгүй хугацаа өнгөрлөө. Олон улсын валютын сангаас тусламж авах эсэх нь тодорхойгүй удаашралтай байна. Энэ тал дээр та ямар байр суурьтай байна вэ?

-УИХ-ын гишүүн Б.Дэлгэрсайхан: Ер нь ямархуу эдийн засгийн нөхцөл байдалтай Засгийн газар хүлээж авсныг бүгд мэдэж байгаа. Үүнийг өргөс авсан мэт хурдан сэргээх боломж хомс. Үүнд тодорхой хэмжээний хугацаа шаардлагатай. 2016-2020 он хүртэл тодорхой зорилт тавьсан. Ирэх хавраас үр дүн нь гарч ирнэ. Монгол Улсын эдийн засаг уул уурхай, барилга зэргээс шалтгаалан улирлын шинж чанартай байдаг. Тиймээс Цагаан сарын дараа бүх ажил эхэлнэ.

-Та “Эрдэнэт үйлдвэр”-ийн 49 хувийн асуудалд ямар байр суурьтай байгаа вэ?

-Энэ асуудлыг хууль хяналтын байгууллага шалгаад, шүүхийн шийдвэрээр тогтоох ёстой. Тэгж байж хувийн өмчийг төрийн эзэмшилд авах нь зөв гэсэн байр суурьтай байгаа.

Categories
мэдээ спорт

Их мастер Т.Батчимэг хоёр дахиа дэлхийн аварга цолтныг дийллээ

Зөвхөн эрэгтэй, эмэгтэй Их мастерууд оролцдогоороо онцлог “Tradewise Gibraltar 2017” тэмцээн үргэлжилж байна. 15 дахь удаагийн тус тэмцээнд манай улсаас дөрвөн шатарчин оюун ухаанаа сорьж буйгаас ШШГЕГ-ын харьяа “Сүлд” спорт хорооны тамирчин, гавьяат тамирчин, Их мастер Т.Батчимэг тавдугаар өрөгт дэлхийн аварга, Украины Их мастер Мария Музычукийг хожлоо.

Хар өргөөр нүүсэн тэрбээр ийнхүү хоёр дахь дэлхийн аварга цолтноо дийлсэн нь энэ.

Т.Батчимэг 2013 онд дэлхийн гурван удаагийн аварга, Их мастер, дэлхийн чансааг тэргүүлэгч Хоу Ифаныг хожсон юм.Тус тэмцээн ирэх сарын 2-нд өндөрлөж, аваргуудаа тодруулна.

Categories
мэдээ нийгэм

Хаягжуулалтын талаар сургалт явуулав

Монгол улсын Хаягжуулалтын тухай хуулийн хэрэгжилтийг хангах, хаягжилтийн нэгдсэн тогтолцоог бий болгох хороодын албан хаагчдыг мэргэжил арга зүйн зөвлөгөөгөөр хангах, хаягжилтын журам, дугаарлалт, системийн талаар мэдлэг олгох, чадавхжуулах зорилгоор Баянзүрх дүүргийн 28 хороодод сургалт зохион байгууллаа.

Сургалтаар хаягжуулалтын тухай хууль, журам, гудамж, зам, талбай, үл хөдлөх эд хөрөнгийн хаягийн тэмдэглэгээнд тавих ерөнхий шаардлага, хаягжуулалтын үйл ажиллагааны технологийн дараалал мэдээллийг “Геокад” ХХК-аас өгсөн байна

Хороодод “Гудамж, зам, талбай, үл хөдлөх эд хөрөнгийг хаягжуулах журам”-ын дагуу албан ёсны хаягжуулалт хийгдэж, хаягийн мэдээллийн нэгдсэн сан, стандарттай болох юм. Хаягийн нэгдсэн систем нь байрлал тодорхойлох солбицлын системд геодизийн хэмжилзүйгээр илэрхийлэгдэх шаардлагатай бөгөөд ингэснээр хүн ам, үл хөдлөх хөрөнгө болон бусад бүх төрлийн төрийн бүртгэлүүдийг орон зайн байрлалд суурилан хийж, төрийн бүхий л үйл ажиллагаанд байршлаас хамаарсан оновчтой, үр дүнтэй шийдвэр гаргахад дэмжлэг үзүүлэх аж.

Categories
мэдээ улс-төр

Эрдэнэтийн 49 хувийн асуудлыг УИХ-аар хэлэлцүүлэхээр боллоо

УИХ-ын Хууль зүйн байнгын хорооны хуралдаанаар өнөөдөр /2017.01.31/ “Эрдэнэт” үйлдвэр дэх “Монгол зэс” корпорацийн эзэмшлийн 49 хувийн худалдан авалттай холбоотой асуудлыг судлах үүрэг бүхий УИХ-ын гишүүн Ш.Раднаасэдээр ахлуулсан ажлын хэсгийн шалгалтын дүнг хэлэлцлээ.

Өнгөрсөн долоо хоногийн мягмар гаригт тус байнгын хорооны хуралдаанаар ажлын хэсгийн мэдээллийг сонсох болоход УИХ дахь Ардчилсан намын бүлэг тав хоногийн завсарлага авсан байсан юм.

Ажлын хэсэг “Эрдэнэт үйлдвэр”-ийн 49 хувийг төрийн мэдэлд авах нь зөв гэсэн дүгнэлт гаргажээ.

Монгол Улсын Үндсэн хуульд “УИХ олон улсын гэрээг соёрхон батлах, цуцлах асуудлыг бүрэн эрхийнхээ хүрээнд шийдвэрлэнэ” гэж заасан байна. Мөн Компанийн тухай хуульд “Төрийн өмчит компанийн өмчлөгч нь төрийг төлөөлж УИХ байна” гэсэн заалт бий аж.

Гэтэл Шийдлийн Засгийн газар “Эрдэнэт” үйлдвэрийн 49 хувийг хувийн хэвшилд шилжүүлэх асуудлыг УИХ-аар хэлэлцүүлээгүй, хэлэлцүүлээгүй шалтгаанаа тухайн үеийн Ерөнхий сайд асан Ч.Сайханбилэг” Цаг хугацааны хайчинд орж, УИХ-аар хэлэлцүүлээгүй” гэдэг тайлбар хийсэн . Харин ажлын хэсэг “”Эрдэнэт”-ийн 49 хувийг худалдахдаа УИХ-аар хэлэлцүүлээгүй нь хууль тогтоох дээд байгууллагын бүрэн эрхийг зөрчсөн хэмээн үзжээ.

Ажлын хэсгийн дүгнэлттэй холбогдуулж, УИХ-ын гишүүд байр сууриа илэрхийлсэн юм.

УИХ-ын гишүүн С.Эрдэнэ: “Эрдэнэт”-ийн 49 хувийг эргүүлж авахаар ярилцаж байгаа нь төр хувийн хэвшлийн өмчид халдсан үйлдэл. Энэ асуудлыг хэлэлцэх тохиолдолд 49 хувийг эзэмшигч талынх нь төлөөллийг оролцуулах хэрэгтэй. Иргэн, хуулийн этгээдийн буруутай эсэхийг шүүхийн байгууллага тогтоодог. УИХ шүүхийн өмнүүр орж асуудалд хандах ёсгүй. Энэ үйлдвэрт шахааны бизнес хөгжсөн гэж ярьдаг. Тиймээс төрийн өмчийн 51 хувийг мөн шалгах хэрэгтэй.

УИХ-ын гишүүн Ц.Даваасүрэн: Үндсэн хуулийн дагуу төрийн өмчийг төлөөлж УИХ хариуцахаар заасан. УИХ бол хууль тогтоох дээд байгууллага. Энэ байгууллага бүрэн эрхийнхээ хүрээнд төрийн өмчтэй холбоотой бүх асуудлыг шийдвэрлэх эрхтэй. Хувийн өмч хэнд ч шилжиж болно. Стратегийн ордыг төрийн эзэмшилд байлгаж, хөрш орнуудаасаа эдийн засгийн хараат бус байдлаа хангах ёстой.

УИХ-ын гишүүн Ц.Нямдорж: ”Эрдэнэт”-ийн төрийн өмчийн 51 хувийг жичдээ ажлын хэсэг гаргаад шалгаж болно. Энэ бол УИХ-ын бүрэн эрхийн асуудал. Хууль зөрчиж хийгдсэн 49 хувийн асуудлыг яаралтай шийдэх ёстой. Төрийн өмчийг буцааж авах ёстой.

УИХ-ын гишүүн Ж.Батзандан: “Эрдэнэт”-ийн 49 хувийн хувьчлалтай Д.Эрдэнэбилэг гэж хүний нэр холбогдоод байгаа. Энэ хүн Худалдаа хөгжлийн банк болон Улаанбаатар банкинд их хэмжээний хувьцаа эзэмшдэг. Төрийн өмчийг хууль бусаар авсан байх магадлал өндөр байгаа. Тийм учраас төр асуудлыг яаралтай шийдэх ёстой гэсэн юм.

Эцэст нь, УИХ-ын Хууль зүйн байнгын хороо ажлын хэсгийн санал дүгнэлтэд үндэслэн шийдвэрийн төсөл боловсруулж, УИХ-ын чуулганы нэгдсэн хуралдаанаар хэлэлцүүлэхээр боллоо.

УИХ-ын Хууль зүйн байнгын хорооны даргын хэлж буйгаа бол тус байнгын хороон дээр шийдвэрийн төсөл боловсруулагдаж буй аж.

Categories
мэдээ нийгэм

Эрсдэлийг нь эздэд нь үлдээх үү, ЭСВЭЛ…

-ЖИЛИЙН АШИГ НЬ НАЙМАН ТЭРБУМААР ХЭМЖИГДЭЖ БУЙ ҮЙЛДВЭРИЙГ ЧАМГҮЙ ӨНДӨР ХҮҮТЭЙ ЭХ ҮҮСВЭРЭЭР ХУДАЛДАН АВЧ, ТҮҮНИЙХЭЭ ӨРТӨГ ЗАРДЛЫГ НӨХӨЖ ЧАДНА ГЭЖ ТООЦООЛСОН ХУВИЙН КОМПАНИД ЭРСДЭЛИЙГ НЬ ҮЛДЭЭГЭЭД ТӨР ЗҮГЭЭР Л ХЯНАЛТАА ТАВИАД ТАТВАРАА АВААД ЯВЖ БАЙВАЛ ДЭЭР БИШ ҮҮ-

Уулын баяжуулах “Эрдэнэт” үйлдвэрийн 49 хувийг худалдаж авсан үйл явцад шалгалт хийсэн УИХ-ын Ажлын хэсгийн дүгнэлтийг хэлэлцэх асуудлаас Ардчилсан намын бүлэг тав хоногийн завсарлага авсан нь өнөөдөр дуусаж байна. Ардчилсан намын бүлгийн дарга С.Эрдэнэ намынхаа дарга болсноор сунгаа ч дууслаа.

“Эрдэнэт” үйлдвэрийн 49 хувийг “төрд авах нь зүйтэй“ гэсэн саналыг гаргаж, үүнийгээ гишүүдийн санал хураалтаар шийдүүлэхээр зэхэж байгаа Ажлын хэсгийн дүгнэлт ямарваа “тоормоз”-гүйгээр дараагийн хэлэлцүүлэгт орох нөхцөл бараг л бүрдлээ гэсэн үг.

Харин хувийн хэвшлийн өмчийг “нийгэмчлэх” саналд Ардчилсан намын бүлэг болоод УИХ-ын гишүүд чухам ямар байр суурь баримталж, ямар хариу өгөх бол гэх асуулт ирэх өдрүүдийн хамгийн анхаарал татсан сэдэв байх нь тодорхой биз. Гадны компанийн өмчлөлд байсан томоохон объектыг дотоодын компани худалдан авсан анхны тохиолдол, түүнийг даган үүссэн том асуултад УИХ мөн анх удаа хариулт өгөх гэж байгаа нь энэ.

Нэгэнт УИХ-ын түвшинд саналын томьёолол болж орж ирсэн “Эрдэнэт”-ийн 49 хувийг төрд авах” асуудал аль нэг талд шийдэгдэж таарна. Харин “тийм”, эсвэл “үгүй” гэх шийдлийн ард ямар үр дагавар үүсэхийг тооцоолж үзье.

ХУДАЛДАН АВАХ ТОХИОЛДОЛД ТӨСВИЙН АЧААЛАЛ ХЭТ ӨСНӨ

Монгол Улсын Засгийн газар одоогоор нэг тэрбум ам.доллартай тэнцэх хэмжээний алдаг бүхий төсөвтэй, гуравдугаар сард төлөгдөх ёстой 580 сая ам.долларын бондын өртэй байгаа юм. Чухамдаа “гутал нь хавчсан” мэт өвдөлттэй суугаа Засгийн газарт “Эрдэнэт” үйлдвэрийн 49 хувийн төлбөр болох 400 сая ам.доллар, худалдан авалтад “гуравдагч этгээд” болсны нэмэлт 100 сая ам.долларыг төлөх санхүүгийн чадавхи хараахан алга гэсэн үг. Энэ тохиолдолд гадаад зах зээлээс хөрөнгө босгох санхүүгийн арга хэрэгслийг, тодруулбал, бонд гаргах арга замыг сонгож болох ч найдвар тун бүдэг.

Гадаад зах зээлд зарлагдах бондын зориулалтыг хөрөнгө оруулагчид чухал хүчин зүйлд тооцдог. Өөрөөр хэлбэл, чухам юунд, ямар үр ашигтай зүйлд хөрөнгө оруулж байгаагаа мэдэхийг чухалчилдаг гэсэн үг. Монголын Засгийн газар хувийн хэвшлийн өмчийг шүүхийн шийдвэрээр бус улс төрийн шийдвэрээр бараг л хураах замаар худалдан авах гэж байгаа тохиолдолд хөрөнгө оруулагчид гар сунгах нь юу л бол. Өмчийг нийгэмчлэх үзэл санааг өнөө үед санхүүжүүлэгч олдоно гэдэг эргэлзээтэй.

Гэвч юмыг яаж мэдэх вэ, бонд амжилттай зарагдлаа гэхэд түүний хүү дор хаяж найман хувь байх төлөвтэй байгаа юм. Ирэх гуравдугаар сард төлөх “Засгийн газрын” гэж гадаад ертөнцөд нэрлэгдсэн Чингис бондын хүү 8.51 хувь байгаа жишиг үүнд нөлөөлөхөөс гадна “Эрдэнэт” үйлдвэрийн үйл ажиллагааны эрсдэл үр ашиг ч нөлөөлөх хүчин зүйл болж таарна. Тэгвэл өнгөрсөн оны статистикаар “Эрдэнэт” үйлдвэрийн ашиг найман тэрбум төгрөг буюу ойролцоогоор гурван сая орчим ам.доллар байв. Энэ тоо чухам ямар хэрэгтэй вэ гэж үү?

“Эрдэнэт” үйлдвэрийн 49 хувийг худалдан авахад шаардлагатай 400 сая ам.долларыг бонд барьцаалан доод тал нь найман хувийн хүүтэй зээллээ гэхэд үүний хүү нь лавтайяа 32 сая ам.доллар болж байна. Ойролцоогоор жилийн 80 тэрбум төгрөгийн хүүтэй мөнгө зээлэх хэрэг болно гэсэн үг. Гэтэл “Эрдэнэт” үйлдвэр өмнөх оны жишгээр жилийн найман тэрбум төгрөгийн ашигтай ажиллах тохиолдолд хэтэрхий өндөр өртөгтэй “наймаа” болж таарна.

Нэгэнт хувийн хэвшлийнхэн эрсдэлийг нь даана гэсэн “бооцоотой”-гоор мөнгөө гаргаад худалдаад авчихсан байтал 51 хувийн давуу эрхээрээ хяналтыг нь тавиад хамтраад ажиллаж болох атал заавал төр төсөвт жилийн 80 тэрбум төгрөгийн ачаа үүрэн байж худалдан авах ямар хэрэгтэй гэж?! Хэрэв 80 тэрбум төгрөгийг үүнд зарцуулах боломжтой гэж байгаа бол түүгээрээ бизнес санхүүжүүлэхийн оронд эмнэлэг, сургууль, цэцэрлэг барьсан нь илүү дээр баймаар.

ХУДАЛДАН АВАХГҮЙ, ХАРИН ХУРААЖ АВНА

“Эрдэнэт” үйлдвэрийн 49 хувийг хувийн хэвшил худалдан авсны хохирлыг лав одоогоор иргэд мэдрээгүй байна. Хууль зөрчсөн асуудал байж мэдэх ч “хохирогч ь хэн бэ” гэдэгт одоогоор хариулт алга. Ийм тохиолдолд гадаадын хөрөнгө оруулагчдаа хэдийнэ үргээгээд явуулчихсан Монгол Улс дотоодын хөрөнгө оруулагчдаа хууль ёсоор буюу төрийн эрх барих дээд байгууллагын шийдвэрээр “дээрэмдэнэ” гэдэг нэр хүндийн асуудал болж хувирна.

Дэлхий дээр бүх үнэ цэнэтэй өмчөө төр нь эзэмшдэг цөөхөн улс орон бий. Дэлхий дээр улсаасаа илүү баян компаниуд олон бий. Тэдгээрийн ихэнх нь төрийн мэдэлд бус харин ч олон нийтэд нээлттэй хувьцаат компани, тэр бүү хэл улс үндэстэн дамнасан корпорациуд байдаг жишигтэй. Тэгвэл Монгол Улс хувийн өмчийг төрд худалдан авсан ч бай, хураан авсан ч бай, чанарын ялгаагүй бөгөөд чухам хаашаа алхаж яваа улс вэ гэдэг эргэлзээг гадаад ертөнцөд, хамтрагчдадаа төрүүлэхээс өөр үр дагавар бараг гарахгүй биз ээ.

Энэ бүх эрсдэлийг тооцоолж байж УИХ-ын гишүүд шийдвэрээ гаргах нь тодорхой биз. Хэрэв “Эрдэнэт”-ийн 49 хувийг худалдан авсан нь Монгол Улсын хууль, тогтоомжийг зөрчиж байгаа бол түүнд нь хариуцлага тооцох нь зөв ч өмчийг эргүүлэн авах нь чухам хэнд ашигтайг хэдэн талаас нь харж үзэх биз ээ.

Жилийн ашиг нь найман тэрбумаар хэмжигдэж буй үйлдвэрийг чамгүй өндөр хүүтэй эх үүсвэрээр худалдан авч, түүнийхээ өртөг зардлыг нөхөж чадна гэж тооцоолсон хувийн компанид эрсдэлийг нь үлдээгээд Төр зүгээр л хяналтаа тавиад татвараа аваад явж байвал дээр мэт санагдана. Хэдий булаалдлаа ч хэн нь ч “Эрдэнэт”-ийг энэ улс орноос үүрээд гарахгүйгээс хойш одоо ойлголцол руу явцгаах хэрэгтэй биш үү?!

Categories
мэдээ улс-төр

БОХХААБХ дөрвөн асуудал хэлэлцлээ

Улсын Их Хурлын Байгаль орчин, хүнс, хөдөө аж ахуйн байнгын хорооны өнөөдрийн хуралдаан 09 цаг 40 минутад гишүүдийн 57.9 хувийн ирцтэйгээр эхэллээ. Байнгын хорооны дарга Ц.Гарамжав хэлэлцэх асуудлын дарааллыг танилцуулахдаа ажлын хэсэг нь хуралдаж амжаагүй учир Хог хаягдлын тухай хуулийн шинэчилсэн найруулгын төсөл болон холбогдох бусад хуулийн төслийн анхны хэлэлцүүлгийг хойшлуулсныг мэдэгдэв. Энэ үеэр УИХ-ын гишүүн Г.Тэмүүлэн Мал, амьтны эрүүл мэндийн тухай, Малын генетик нөөцийн тухай хуулийн төслийн үзэл баримтлалуудыг хэлэлцүүлэгт бэлтгэх ажлын хэсгийг байгуулах асуудлыг хэлэлцэх нь зүйтэй гэсэн горимын санал оруулсан юм. Хуралдаанд оролцсон гишүүдийн 83.3 нь уг горимын саналыг дэмжив.

ТОГТООЛЫН ТӨСЛИЙН АНХНЫ ХЭЛЭЛЦҮҮЛГИЙГ ХИЙВ

Хуралдааны эхэнд Засгийн газраас 2016 оны 12 дугаар сарын 28-ны өдөр өргөн мэдүүлсэн Хэнтий Хан уулын нэрийг Бурхан Халдун гэж өөрчлөх тухай Улсын Их Хурлын тогтоолын төслийн анхны хэлэлцүүлгийг хийсэн юм. Хуралдаанд Байгаль орчин, аялал жуулчлалын сайд Д.Оюунхорол холбогдох ажлын хэсгийн хамт оролцов.

Хэлэлцэж байгаа тогтоолын төсөлтэй холбогдуулж УИХ-ын гишүүн Ж.Бат-Эрдэнэ асуулт асуусан юм. Үүний дараа Хэнтий Хан уулын нэрийг Бурхан Халдун гэж өөрчлөх тухай Улсын Их Хурлын тогтоолын төслийн талаар зарчмын зөрүүтэй хоёр саналын томьёоллоор санал хураалт явуулсан юм.

Тухайлбал, Хэнтий Хаан уулын нэрийг Бурхан Халдун гэж өөрчлөх тухай Монгол Улсын Их Хурлын тогтоолын төслийн нэрийг, Монгол Улсын газар зүйн нэрийн жагсаалтыг батлах тухай УИХ-ын тогтоолын хавсралтад өөрчлөлт оруулах гэж өөрчлөхийг хуралдаанд оролцсон гишүүдийн 76.9 хувь нь дэмжсэнгүй. УИХ-ын гишүүн Ж.Бат-Эрдэнэ, Я.Санжмятав нарын хувьд уулынхаа нэрийг өөрчилсний дараа Монгол Улсын газар зүйн нэрийн жагсаалтыг батлах тухай УИХ-ын тогтоолын хавсралтад өөрчлөлт оруулах нь зүйтэй гэж үзсэн юм.

Харин Улсын Их Хурлын 2003 оны 42 дугаар тогтоолын хавсралтаар баталсан “Монгол Улсын нутаг дэвсгэрийн газар зүйн нэрийн жагсаалт”-ын Хэнтий Хаан уул, Hetii Haan uul, Хэнтий, Өмнөдэлгэр гэснийг Бурхан Халдун уул, Burkhan Khaldun uul, Хэнтий, Өмнөдэлгэр гэж өөрчилсүгэй гэсэн саналын томьёоллыг хуралдаанд оролцсон гишүүдийн 92.3 хувь нь дэмжлээ.

Иймд Улсын Их Хурлын тогтоолын төслийн анхны хэлэлцүүлэг хийсэн талаархи байнгын хорооны санал, дүгнэлтийг УИХ-ын гишүүн Б.Бат-Эрдэнэ УИХ-ын чуулганы нэгдсэн хуралдаанд танилцуулахаар болов.

ХУУЛЬД НЭМЭЛТ ӨӨРЧЛӨЛТ ОРУУЛАХ ХУУЛИЙН ТӨСЛҮҮДИЙН АНХНЫХЭЛЭЛЦҮҮЛГИЙГ ХИЙЛЭЭ

Үргэлжлүүлэн Засгийн газрын тусгай сангийн тухай хуульд нэмэлт өөрчлөлт оруулах тухай хуулийн төслийн анхны хэлэлцүүлгийг хийлээ.

Хэлэлцэж байгаа тогтоолын төсөлтэй холбогдуулан асуулт асуух гишүүн байсангүй. Байнгын хорооны дарга Ц.Гарамжав зарчмын зөрүүтэй хоёр саналын томьёоллоор санал хураалгасан юм. Засгийн газрын тусгай сангийн тухай хуульд нэмэлт өөрчлөлт оруулах тухай хуулийн төслийн 3 дугаар зүйлд заасан “Энэ хуулийг баталсан өдрөөс эхлэн дагаж мөрдсүгэй” гэснийг хуулийн хэрэгжих хугацааг ердийн журмаар гэж өөрчилснийг хуралдаанд оролцсон гишүүдийн 92.3 хувь нь дэмжив. Түүнчлэн хуулийн төсөлтэй хамт өргөн мэдүүлсэн Байгаль орчныг хамгаалах тухай, Ойн тухай, Усны тухай, Ус бохирдуулсны төлбөрийн тухай хуульд өөрчлөлт оруулах төслийн 2 дугаар зүйлд заасан “Энэ хуулийг баталсан өдрөөс эхлэн дагаж мөрдсүгэй” гэснийг хуулийн хэрэгжүүлэх хугацааг ердийн журмаар гэж өөрчилснийг хуралдаанд оролцсон гишүүд 92.3 хувиар дэмжлээ.

УИХ-ын гишүүдийн зүгээс зарчмын зөрүүтэй өөр саналын томьёолол ирүүлээгүй тул хуулийн төслийн талаархи байнгын хорооны санал, дүгнэлтийг УИХ-ын гишүүн Г.Мөнхцэцэг Төсвийн байнгын хороонд танилцуулахаар болов.

Дараа нь Засгийн газрын тусгай сангийн тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийсэн юм. Засгийн газрын тусгай сангийн тухай хуульд нэмэлт оруулах тухай хуулийн төслөөр Жижиг дунд үйлдвэрийг хөгжүүлэх сангаас олгох хөнгөлөлттэй зээлийн үйл ажиллагааг зохицуулах журам батлах эрхийг жижиг, дунд үйлдвэрийн асуудал эрхэлсэн Засгийн газрын гишүүнд олгохоор хуулийн төслийг боловсруулсан билээ.

Хуулийн төсөлтэй холбогдуулж УИХ-ын гишүүн Я.Содбаатар энэ жил Жижиг, дунд үйлдвэрийг хөгжүүлэх сангаас хэдэн төгрөг орж ирэхийг тодруулахын зэрэгцээ хөнгөлөлттэй зээлийн төсөл сонгон шалгаруулах журам, төсөлд бүрдүүлэх материалыг тодорхой болгох хэрэгтэйг анхааруулж байлаа.

Хүнс, хөдөө аж ахуй, хөнгөн үйлдвэрийн сайд П.Сэргэлэн, “Одоогоор жижиг, дунд үйлдвэрлэл эрхлэгчдээс 1590 орчим санал, 150 тэрбум төгрөгийн зээлийн хүсэлт ирээд байгаа. 2017 онд 20 орчим тэрбум төгрөг орж ирэх хэдий ч зээлийн эх үүсвэр хүндрэлтэй байгаа. Бидний хувьд хуулийн төсөлд өөрчлөлт оруулсны дараа хөнгөлөлттэй зээлийн төсөл сонгон шалгаруулах журам, төсөлд бүрдүүлэх материалыг тодорхой болгох талаархи асуудлыг судлаж шийдвэрлэнэ. Ер нь Жижиг, дунд үйлдвэрлэлийн тухай хуульд нэмэлт өөрчлөлт хийхээр ажиллаж байгаа гэж хариулсан юм.

Уг хуулийн төсөлтэй холбогдуулан зарчмын зөрүүтэй санал гараагүй учир Байгаль орчин, хүнс хөдөө аж ахуйн байнгын хорооны анхны хэлэлцүүлэг хийсэн талаархи санал, дүгнэлтийг УИХ-ын гишүүн Г.Мөнхцэцэг Төсвийн байнгын хороонд танилцуулахаар болов.

Үүний дараа Мал, амьтны эрүүл мэндийн тухай, Малын генетик нөөцийн тухай хуулийн төслийн үзэл баримтлалуудыг хэлэлцүүлэгт бэлтгэх ажлын хэсгийг байгуулах асуудлыг хэлэлцсэн юм. Ингээд Мал, амьтны эрүүл мэндийн тухай хуулийн төслийн үзэл баримтлалыг хэлэлцүүлэгт бэлтгэж, батлуулах ажлын хэсгийн ахлагчаар УИХ-ын гишүүн Ж.Бат-Эрдэнэ, Малын генетик нөөцийн тухай хуулийн төслийн үзэл баримтлалыг хэлэлцүүлэгт бэлтгэж, батлуулах ажлын хэсгийн ахлагчаар Г.Тэмүүлэнг томилохыг хуралдаанд оролцсон гишүүдийн олонхи нь дэмжлээ гэж УИХ-ын Тамгын газрын Хэвлэл мэдээлэл, олон нийттэй харилцах хэлтсээс мэдээллээ.

Categories
мэдээ нийгэм

Батлан хамгаалахын сайд Цэргийн төв эмнэлгийн хүүхдийн тасгийн үйл ажиллагаатай танилцлаа

Нийслэлийн хэмжээнд хүүхдийн амьсгалын замын өвчлөл ихэсч, эмнэлгүүдийн ачаалал хэтэрч байгаатай холбогдуулан Монгол улсын Ерөнхий сайдаас өгсөн үүргийн дагуу Батлан хамгаалах яам Цэргийн төв эмнэлэгт 50 ортой хүүхдийн тасгийг энэ сарын 15-ны өдрөөс эхлэн нээн ажиллуулж эхэлсэн. Баянзүрх дүүрэгт байрлах Цэргийн төв эмнэлгийн хүүхдийн тасгийн үйл ажиллагаатай УИХ-ын гишүүн, Засгийн газрын гишүүн Батлан хамгаалахын сайд Б.Бат-Эрдэнэ, УИХ-ын гишүүн, УИХ-ын Аюулгүй байдал, гадаад бодлогын байнгын хорооны дарга Ж.Энхбаяр болон бусад албаны хүмүүс өнөөдөр танилцлаа.

Цэргийн төв эмнэлгийн мэдрэлийн тасгийн хуучин байрыг сэргээн засварлаж нээсэн 50 ортой шинэ тасаг өнөөдрийн байдлаа 40 гаруй хүүхэд хэвтэн эмчлүүлж байгаа бөгөөд 24 цагийн дотор 20 гаруй хүүхэд эмчлүүлэхээр зорьж ирдэг бөгөөд амралтын өдрүүдээр ачаалал их байдаг тухай тус тасгийн хүүхдийн эмч Д.Мөнхжаргал ярьж байна. Тус тасаг нь нийт 50 ор, 11 өрөөтэйгээр сард 250-300 хүүхэд хэвтүүлэн эмчлэх хүчин чадалтай . Эрүүл мэндийн яамнаас амьсгалын аппарат, судасны шахуурга, өвчтөий монитор, соруулгын аппарат, хүчилтөрөгч зэрэг 67,8 сая төгрөгийн тоног төхөөрөмжийг суурилуулсан бол тус эмнэлгийн ажилчид өөрсдийн санаачилгаар 2 сая гаруй төгрөгийн эмнэлгийн хэрэгсэл авсан байна. Тус эмнэлэгт хүүхдийн тасаг нээснээр эрүүл мэндийн хөгжлийн төвд бүртгэлтэй байдаг хүүхдийн 9 эмч, 15 сувилагчдыг туршлага, ур чадварыг нь харгалзан сонгон ажилуулж байна. Тус эмнэлэг нь одоогийн байдлаар Баянзүрх дүүргийн 8,13,16,17 дугаар хороо, Чингэлтэй дүүргийн 9,10,13 дугаар хорооны иргэдэд үйлчилж байна. Цаашдаа тус тасгийг хэвээр ажиллуулж мөн хүүхдийн сувилал нээх бодлого барьж байгаа юм байна.

Categories
мэдээ нийгэм

Ц.Нямдорж “шахаа”-гаа хэнээр шийдүүлсэн бэ?

Эрдэнэт үйлдвэрт шахаа хийсэн тухайгаа УИХ-ын дэд дарга Ц.Нямдорж “Хүүгээ нэг юм хийе гэхэд нь дэмжээд өгөөрэй гэж хүн рүү ярьсан” гэж хүлээн зөвшөөрсөн. Тэр хэн рүү ярьсан бэ. Тухайн үеийн Хууль зүйн сайдын хамсаатан хэн байсан бэ. Тэд нийлж төрийн мөнгийг идсэнийхээ төлөө хариуцлага хүлээх үү. Энэ олон асуултын хариуг хэзээ хэн бидэнд өгөх вэ? Ц.Нямдоржийн хүү Н.Анхбаярын “Анлимитед” буюу “Хязгааргүй” гэх компани 2004 болон 2006, 2007 онуудад Эрдэнэт үйлдвэр рүү бараа нийлүүлэх гэрээ хийсэн байдаг. Ингэхдээ зах зээлийн үнээс зургаа дахин өндөр үнээр “шахсан” аж. Ийнхүү олон улсад хамгийн их ашигтайд тооцогддог хар тамхи, хүний наймаанаас ч илүү өндөр ашигтай том бизнесээ эхлэхдээ Н.Анхбаяр 24-хөн настай байжээ. Харин өнөөдөр Ц.Нямдорж 27 настай “хүүхдийг” “хорхойтой араандаа зууж” яваа. Гэхдээ өөрийн хүү нь төрийн мөнгийг хумсалж, өрөөлийнх нь харьд байсан баялгаа олж ирсэн ялгаатай. Эрдэнэт үйлдвэрт бараа бүтээгдэхүүн, үйлчилгээ үзүүлэхийн тулд тендерт шалгарсан байх ёстой. Тухайн чиглэлээр олон жил ажилласан туршлагатай компани чанарын дээд үзүүлэлтээр, хамгийн доод үнийн санал тавьсан тохиолдолд бараа үйлчилгээг нь авах зарчим “Эрдэнэт”-д хэзээ ч үйлчилж байсангүй. Үүний захын жишээ нь Н.Анхбаярын компанид хязгааргүй боломжийг сайд аав нь утас ганцхан цохиод л олж өгснөөс харагдана.

Тухайн үед Х.Наранхүү Эрдэнэт үйлдвэрийн даргаар ажиллаж байсан. Нийт дүнгээрээ сая шахам долларыг 24-хөн настай хүүгийн, байгуулагдаад нэг жил ч болоогүй компани руу шилжүүлэх эрх мэдлийг Х.Наранхүү л атгана. Хууль зүйн сайд нь утасдаад “хүүгээ дэмж” комманд өгөхөд биелүүлэхгүй байх зориг зүрхтэн тухайн үеийн МАХН дотор байсангүй. Жилийн дараа Ц.Нямдорж сайд УИХ-ын дарга, төрийн гурван өндөрлөгийн нэг болчихоод удаах хоёр шахаанд нь ногоон гэрэл асааж өгсөн байдаг. Өнөөдөр тэрээр “Эрдэнэт”-ийг зуун хувь төрд авахаар улайран зүтгэж байна. Мөр зэрэгцэн шахаа хийгсэд нь ч хамгаалан чичирч байна. Төрийн мөнгийг хувьдаа завших боломжийг хаасан хувийн хэвшлийнхнийг ямар ч хамаагүй аргаар “Эрдэнэт”-ээс зайлуулж, эрх мэдлээ бүрэн тогтоохоор эрмэлзэж байна.

Categories
мэдээ улс-төр

УИХ дахь АН-ын бүлэг хуралдаж байна

УИХ дахь Ардчилсан Намын бүлгийн хуралдаан эхэллээ. Хуралдаанаар энэ долоо хоногт УИХ, байнгын хороогоор хэлэлцэх асуудлаар байр сууриа нэгтгэх юм. Мөн Хууль зүйн байнгын хорооны 2016 оны 06 дугаар тогтоолоор байгуулагдсан Оросын холбооны Улсын Засгийн газар болон тус улсын өндөр технологийн үйлдвэрлэлийн бүтээгдэхүүн бүтээх, үйлдвэрлэх, экспортлох ажиллагааг дэмжих “Ростех” улсын корпорацийн “Эрдэнэт үйлдвэр” ХХК болон “Монголросцветмет” ХХК-нд эзэмшиж байсан 49 хувийн энгийн хувьцааг Монголиан Коппер Корпорейшн ХХК худалдан авсантай холбогдох асуудлыг иж бүрнээр нь шалгаж, санал, дүгнэлт гаргах үүрэг бүхий ажлын хэсгийн санал, дүгнэлтийг хэлэлцэх юм байна. Уг асуудлаар бүлгийн хуралдаанд УИХ-ын гишүүн Ж.Батзандан танилцуулга хийх аж.