Month: June 2016

Монгол
Улсын Ерөнхийлөгч Ц.Элбэгдорж Олон улсын хүүхдийн эрхийг хамгаалах
өдрийг тохиолдуулан олон хүүхэд төрүүлж, өсгөн хүмүүжүүлсэн ээжүүдийг
“Алдарт эх” нэг, хоёрдугаар одонгоор шагнах тухай зарлиг гаргажээ.
Ерөнхийлөгчийн зарлигын дагуу өнөөдөр НИТХ-ын дарга Д.Баттулга,
Нийслэлийн Засаг даргын Хот байгуулалт, хөрөнгө оруулалтын асуудал
хариуцсан орлогч С.Очирбат нар “Алдарт эх” нэг, хоёрдугаар одон хүртсэн
29 эхэд одонг нь гардуулан өглөө. Нийслэлийн хэмжээнд өнөөдөр 3100
гаруй эх “Алдарт эх” одонгоор энгэрээ мялааж байгаа юм байна гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Эх үрсийн баяр болж байгаатай холбогдуулан хүнсний түүхий эд, бүтээгдэхүүн худалдан авахдаа доорхи зүйлд анхаарч байхыгМэргэжлийн хяналтын ерөнхий газраас иргэдэд анхаарууллаа.

1. Худалдаа, үйлчилгээний газраас хүнсний түүхий эд, бүтээгдэхүүн сонгон авахдаа шошгонд хэн, хэзээ, хаана үйлдвэрлэсэн болох, хадгалалтынхугацаа, хэрэглэх, хадгалах нөхцөл заагдсан эсэх, тухайн барааны чанар илт муудсан эсэхийг сайтар нягтлан үзэх

2. Түргэн гэмтэж чанар байдлаа алддаг хүнсний бүтээгдэхүүнийг зориулалтын хөргөх төхөөрөмжгүй болон чингэлэг, ил задгай худалдаанаас авч хэрэглэхгүй байх

3. Лаазалсан бүтээгдэхүүний сав нь зэвэрсэн, хонхойж цохигдсон, хий дүүрч таг нь төмбийсэн, дарахад хонхолзож, бамбаж үүссэн, задалж үзэхэд дээр нь хийн бөмбөлөг үүссэн байвал муудсан

4. Шилэнд савласан бүтээгдэхүүнд тунадас үүссэн, шүүс нь булингартай, доторхи хүнсний ногоо, жимс нь хорчийж жижгэрсэн, ялзарсан, хөгцөрсөн, бөглөөнд нь жижиг цагаан өнгөр үүссэн

5. Өндөгний хальс нимгэрч, өнгө нь өөрчлөгдсөн, хагарч цуурсан, гадна тал нь бохирдсон, хөлдөж чанараа алдсан, шар уураг нь холилдсон, шохойлог хатуу хальс нь хагарч уураг нь гоожсон байвал

6. Хиам худалдаж авахдаа гадаргуу нь үрчийгээгүй гөлгөр, нойтон биш, өнгө нь хувираагүй, элдэв гаж үнэргүй, зөвхөн бүтээгдэхүүний өөрийн өвөрмөц амт, үнэртэй байх ёстойг анхаарах

7. Хөлдөөсөн, хөргөсөн хүнсийг худалдаж аваад богино хугацаанд гэрийн хөргөгчинд хийх, эсвэл хурдан бэлтгэж хэрэглэх, мах, загас, шувуу зэрэг түүхий бүтээгдэхүүнийг шууд хэрэглэдэг бүтээгдэхүүнээс сайтар тусгаарлан хадгалж зөөвөрлөх нөхцөлийг хангах

8. Мах, махан бүтээгдэхүүнийг мал эмнэлэг, ариун цэвэр-гарал үүслийн гэрчилгээтэй, эрх бүхий лабораторид аюулгүй байдлын шинжилгээнд хамрагдсан эсэхийг нягтлан үзэх

9. Худалдаа, нийтийн хоолны газраас архи, согтууруулах ундаа худалдан авах, үйлчлүүлэхдээ хаана үйлдвэрлэсэн, чанар, аюулгүй байдлын баталгаажилттай эсэхийг магадлан үзэх, тунадас булингартай, механик хольцтой, хямд үнэтэй, архи, согтууруулах ундаа худалдан авч хэрэглэхгүй байх

10. Гэрийн нөхцөлд хүнсний бүтээгдэхүүнээ зөв хадгалж, бүрэн боловсруулан хэрэглэх, дэлгүүр дэх хөлдөөсөн бүтээгдэхүүн гэссэн байвал, удаан хадгалсанбүтээгдэхүүнийг хүнсэндээ хэрэглэхгүй байх

11. Ариун цэврийн шаардлага хангаагүй, бохир орчинд явуулж буй худалдаа,үйлчилгээнээс хүнсний бүтээгдэхүүн худалдан авахгүй байх

12. Хүнсний бүтээгдэхүүний сав, баглаа боодлын бүрэн бүтэн байдлыг шалгаж, урагдаж, гэмтсэн бол худалдаж авахгүй байх

Олон улсын хүүхдийн эрхийг хамгаалах өдрөөр хүүхэд багачуудаа амар тайван баярлуулахын төлөө Улаанбаатар хотын цагдаагийн газрын нийт бие бүрэлдэхүүн ажиллаж байна. Мөн баяр, наадам, олон нийтийг хамарсан арга хэмжээний үеэр бага насны хүүхдүүд эцэг, эх, асран хамгаалагчаасаа төөрөх тохиолдол ихээр гардаг тул Улаанбаатар хотын цагдаагийн газрын Мэдээлэл харилцааны багийн алба хаагчид хүүхэд, багачуудын бугуйд эцэг, эхийн утасны дугаар бичих зориулалт бүхий бугуйвчийг зүүж өгч байна.

Олон улсын хүүхдийн эрхийг хамгаалах
өдрийг тохиолдуулан “Хүүхдийн баяр” нэгдсэн арга хэмжээг Чингис хааны
нэрэмжит талбайд “Найрсаг Улаанбаатарын ирээдүй-Өнөөгийн хүүхдээс” уриан
дор зохион байгуулж байна.

Монгол орны хөгжил хөдөлмөрч, махруу,
тэвчээртэй эмэгтэйчүүд, мөрөөдөл хүсэлдээ умбан сурч боловсорч хорвоотой
танилцаж, хэрсүүжиж, ухаажиж яваа хүүхдүүд та бүхнээс хамаарна.
Монголчууд бид олуулаа болж байна. Гурван сая дахь иргэнээ 2015 онд
ёслол төгөлдөр хүлээн авсан гэж Ерөнхий сайд Ч.Сайханбилэг уг арга
хэмжээнд оролцохдоо хэллээ. Эх, хүүхдийн хөгжил, хамгааллын
тулгамдаж байгаа асуудлуудыг шийдвэрлэх зорилгоор Хүүхдийн эрхийн тухай,
Хүүхэд хамгааллын тухай, Хүүхэд харах үйлчилгээний тухай, Гэр бүлийн
хүчирхийлэлтэй тэмцэх тухай хуулиудыг батлуулснаар сургуулийн өмнөх
боловсролд хамрагдаж чадахгүй байгаа 2-6 насны хүүхэд эрүүл аюулгүй,
хамгаалагдсан орчинд өсч торних, хөгжих, хүмүүжих боломж бүрдэж, эцэг
эх, асран хамгаалагч нь ажил хийж, орлогоо нэмэгдүүлэх, гэр бүлийн
хүчирхийллийн аливаа илрэлтэй үр нөлөөтэй тэмцэх эрх зүйн таатай орчин
бүрдлээ.

Хүүхдийг өсгөх, тэдний боловсролыг
дэмжихэд чухал ач холбогдолтой хүүхдийн мөнгийг ямар нэг ялгаваргүйгээр
ахин олгож эхэллээ. Манай улс 16 нас хүртлэх хүүхэд бүртээ сар бүр 20
мянган төгрөг олгож байна. 2015 оны эцсийн байдлаар нийт нэг сая хүүхэд
хүүхдийн мөнгөө авчээ.

2012-2015 онд улсын хэмжээнд 12,735 ор
бүхий 127 цэцэрлэг, 37,760 суудал бүхий 79 сургууль, 4,160 ор бүхий 39
дотуур байр, 33 сургуулийн спортын танхим барьж, ашиглалтад оруулж
боловсролын салбарын хөрөнгө оруулалт, сургууль, цэцэрлэгийн хүртээмжийг
нэмэгдүүлснээр хүүхдийн ая тухтай сурч, хүмүүжих орчин сайжирлаа.
Ерөнхий боловсролын сургуулиудын хичээлийн анги, танхимыг ухаалаг
самбараар, багш нарыг зөөврийн компьютерээр хангаж, байгалийн ухааны 400
танхим лаборатори байгуулан сургалтад шинэ технологи, орчин үеийн арга
зүй нэвтрүүлж байна.

Төр гэр бүлийн хүчирхийлэлд өртсөн,
хүчирхийлэлд өртөх магадлалтай хохирогч, түүний бага насны хүүхдийг
хамгаалах “Түр хамгаалах байр”-тай болж, хүүхэд хамгааллын чиглэлээр
зөвлөгөө мэдээлэл өгч, хүүхдийн эрхийн зөрчлийн дуудлага хүлээн
авах “108 Хүүхдийн тусламжийн утас”-ыг ажиллуулж байна. Эх, хүүхдийн
төлөө Монгол төр, Засгийн газар цаашид ч тэргүүн ээлжинд анхаарч,
бодлого, үйл ажиллагаагаа чиглүүлнэ гэж Ерөнхий сайд Ч.Сайханбилэг
хэллээ гэж Засгийн газрын Хэвлэл мэдээлэл, олон нийттэй харилцах албанаас мэдээллээ.

Хүүхдэдээ БНХАУ-ын хийлдэг тоглоом авч өгөгхгүй байхыг анхааруулж байна. БНХАУ өнгөрсөн жилийн хоёрдугаар сард энэхүү хийн бөмбөлгүүдийг худалдаанаас бүр мөсөн гаргаснаа мэдэгдэж байсан боловч худалдаа эрхлэгчид зарж борлуулсаар байгаа юм. Хүүхдүүдийн анхаарлыг татдаг тус хийн бөмбөлөгнөөс болж олон хүүхэд түлэгдэж, зарим нь эрэмдэг болон үлджээ. Учир нь бөмбөлгийн хажууд хэн нэгэн этгээд тамхиныхаа ишийг унтраалгүй хаях, эсвэл ил гал гаргахад л бөмбөлөг дэлбэрдэг аж. Тодруулбал тус бөмбөлгүүдийг азотын хийгээр хийлдэг учир ийнхүү дэлбэрдэг юм байна. Манай улсад ч энэ төрлийн хийн бөмбөлгүүдийг борлуулсаар байгаа учир эх үрсийн баяраар хүүхдүүддээ хийн хийн бөмбөлөг авч өгөхгүй байхыг анхааруулж байна.

МҮОНРТ-ээс “MNB Сэтгэлийн үндэс” бүтээн байгуулалтын аяныг эхлүүлж, энэхүү ажлын хүрээнд дөрвөн томоохон ажлыг зохион байгууллахаар болсон билээ. Тодруулбал, Баянгол дүүргийн 21 дүгээр хороонд хүүхдийн цэцэрлэг байгуулах, хүүхдүүдийн сурах орчныг аюулгүй болгож, сургуулийн ойр орчимд гарц тэмдэглэгээг сайжруулах, боловсон бие засах газрын асуудлыг шийдвэрлэх, харанхуй гудамжуудыг гэрэлтүүлэгтэй болгох зэрэг гол асуудлуудад анхаарлаа хандуулж, төрөөс ямар нэгэн татаасгүйгээр олон нийтийн дэмжлэгт тулгуурлан бүтээн байгуулалт хийхээр болсон юм. Тэрхүү бүтээн байгуулалтын ажлын эхлэл болж өнөөдөр БГД-ийн 21 дүгээр хорооны Горькийн 22 дугаар гудамжинд “Сэтгэлийн үндэс” цэцэрлэгийн шав тавих ёслолын арга хэмжээ болж өндөрлөлөө.

Олон улсын хүүхдийн эрхийг хамгаалах өдөртэй давхцаж буй энэхүү бүтээн байгуулалт ирэх есдүгээр сарын 1-ний өдөр дуусч, цэцэрлэгт хамрагдах боломжгүй гэртээ цоожлуулан үлддэг бяцхан хүүхдүүд маань шинэхэн цэцэрлэгтэй болох юм.

Энэхүү бүтээн байгуулалтын аян төрөөс ямар нэгэн дэмжлэг аваагүй, олон нийтийн сэтгэлийн өглөгөөр бүтэж байгаа гэдгээрээ онцлогтой. Энэ удаагийн бүтээн байгуулалтад 300 мянган гаруй иргэн, 200 гаруй аж ахуйн нэгж оролцож, бяцхан хүүхдүүдийг шинэ цэцэрлэгтэй болгох бүтээн байгуулалтад гар бие, сэтгэл зүрхээ зориулсан байна. Цэцэрлэгийн бүтээн байгуулалтад нийтдээ 870 сая төгрөг зарцуулагдана гэх судалгааг “MNB Сэтгэлийн үндэс” аяныхан гаргасан бөгөөд өнөөдөр тус мөнгөний 70 гаруй хувийг нь олон нийтийн дэмжлэгтэйгээр цуглуулж чадаад байгаа ажээ.

“Сэтгэлийн үндэс” цэцэрлэгийн шав тавих ёслолын үеэр МҮОНРТ-ийн Ерөнхий захирал Ц.Оюундарь “Яг нэг жилийн өмнө санаачлан хэрэгжүүлж эхэлсэн ажил минь өнөөдөр олон нийтийн дэмжлэгтэйгээр биелэлээ олж байгааг харах сайхан байна. Бид сүүлийн гурван сарын хугацаанд аяныхаа хүрээнд шаардагдах мөнгийг олохоор идэвхтэй ажиллаж, аянаа идэвхжүүлсэн. Энэ хугацаанд олон нийт, иргэд маань хэрхэн нэгдэж, хүүхдүүдийнхээ ирээдүйд хэрхэн санаа тавьдагаа харуулж маш их сэтгэлийн үрийг бидэнд өглөө. Өнөөдөр тэрхүү үрийг ургуулах бүтээн байгуулалтын шавыг тавьж байна. Энэхүү бүтээн байгуулалт гурван сар үргэлжлэх болно. Бидний энэхүү бүтээн байгуулалтад гар бие оролцсон иргэд, байгууллагуудад талархлаа илэрхийлье” гэж онцолсон юм.

Олон улсын хүүхдийн эрхийг хамгаалах өдрийн баярын нэгдсэн арга хэмжээ Чингис хааны нэрэмжит талбайд 11:00 цагт эхэлнэ. Энэхүү үйл ажиллагаатай холбоотойгоор хотын захын, харъцангуй хүн амын төвлөрөл ихтэй 18 чиглэлээс Чингисийн талбай хүртэл нийтийн тээврийн үйлчилгээг хүүхэд багачууддаа зориулж үнэгүй явуулахаар боллоо. Тодруулбал , Шархад, Улиастай, Сэлбэ, Жанжин клуб, Баянхошуу, Улаан чулуут, Орбит, Толгойт, Зүүн салаа, Зайсан, Нисэх, Яармаг, Баруунсалаа, Хайлааст, Чингэлтэй, 3,4-р хороолол, 5 шар, Офицеруудын ордон гэсэн чиглэлүүдээс нийтийн тээврийн тусгай чиглэлийн автобусууд өглөөний 08:00 цагт хөдөлж Чингисийн талбайд ирэх юм.

Мөн оройн хаалтын ажиллагааны дараа буюу 17:00 цагаас иргэдийг буцааж хүргэх үйлчилгээг зохион байгуулна. Уг арга хэмжээний үеэр Чингисийн талбайн урд талын “Санктпетрбург”-ийн зогсоолоор хотын зүүн талын Шархад, Улиастай, Сэлбэ, Жанжин клуб, Офицеруудын ордон чиглэлийн 5 автобус, “Нийслэлийн Засаг даргын тамгын газрын байр”-ны өмнөх зогсоолоор урд болон баруун талын Зайсан, Нисэх, Яармаг, Баянхошуу, Улаан чулуут, Орбит, Толгойт, Зүүн салаа, 5 шар чиглэлийн 9 автобус, зүүн талын “Соёлын төв өргөө”-ний зогсоолоор хойд талын Хайлааст, Чингэлтэй, 3, 4-р хороолол, Баруун салаа чиглэлийн 4 автобус тус тус үйлчилэх юм байна.

Ойрын өдрүүдэд ихэнх нутгаар халуун, хуурай байх тул болзошгүй гал түймэрийн аюулаас сэрэмжтэй байхыг анхааруулж байна. 2016 оны зургадугаар сарын 1-нд баруун зүгийн нутгийн хойд хэсгээр, 2-нд баруун, говийн нутгийн зарим хэсгээр, 3-4-нд баруун, төв, говийн нутгийн зарим газраар түр зуурын бороо орно. Салхи 3-4-нд зарим газраар секундэд 14-16 метр хүрч ширүүснэ. Хангай, Хөвсгөл, Хэнтийн уулархаг нутгаар шөнөдөө 4-9 градус, өдөртөө 18-23 градус, Алтайн өвөр говь болон Орхон-Сэлэнгийн сав газраар шөнөдөө 11-16 градус, өдөртөө 27-32 градус, бусад нутгаар шөнөдөө 8-13 градус, өдөртөө 24-29 градус дулаан байна. 3-нд баруун зүгийн нутгийн хойд, 4-нд нутгийн баруун хагаст сэрүүснэ.