Month: April 2016

Өнөөдөр “Монгол тулгатны зуун эрхэм” нэвтрүүлгийн хөтлөгч П.Анужин хэвлэлийн хурал хийж, тус нэвтрүүлгийн санаачлагч үүсгэн байгуулагчийн хувьд нэвтрүүлгээ түр зогсоож байгаагаа мэдэгдсэн. Түүний энэхүү мэдэгдлийн дараа “Hero Entertainment” студийн хамт олон бүрэн бүрэлдэхүүнээрээ “Монгол ньюс” мэдээллийн төвд ирж хариу мэдээлэл хийв.

Тэд “Манай хамт олон үүсээд байгаа нөхцөл байдлын талаар мэдээлэл өгөхөөр хэвлэлийн хурал зарлалаа. Энэ хэрэг 2016 оны нэгдүгээр сарын 11-ний өдөр болсон. Нэвтрүүлгийн бичлэг алдагдаж, алдагдсан даруйд бид Оюуны өмчийн газарт мэдэгдсэн. Харин тус газраас энэхүү нэвтрүүлгээ өөрсдийн оюуны өмч гэдгээ батал гэсэн. Ингээд холбогдох баримтуудыг өгсөн боловч ”Монгол тулгатны зуун эрхэм” нэвтрүүлгийг “Hero Entertainment”-ийн оюуны өмч гэдгийг нотлох хууль зүйн үндэслэл алга гэх албан бичиг хүргүүлсэн юм. Тиймээс бид цагдаад албан ёсоор хандаж шалгуулах хүсэлт гаргасан. Хэргийг шалгаж “Hero Entertainment”-ийн Б.Баатарыг хохирогч гэж тогтоосон байгаа. Гэтэл өнгөрсөн баасан гаригт зарим мэдээллийн хэрэгслээр энэ хэргийг хэрэгсэхгүй болгосон гэж мэдээлэл цацсан. Бидэнд Прокурорын газраас хэрэг хаагдсан тухай албан ёсны мэдэгдэл өнөөдрийг хүртэл ирээгүй байна. Тиймээс прокурорын шийдвэр хүчин төгөлдөр эсэхэд эргэлзэж байна” гэв.

Мөн “Монгол тулгатны зуун эрхэм” нэвтрүүлэг бол хэн нэг хүний дан ганц өмч биш. Тиймээс нэг хүний хүсэлтээр нэвтрүүлгийг зогсооно гэх асуудал байхгүй. Цаашид нэвтрүүлгийн бичлэг хийгдсээр байх болно” гэлээ.

Гэрэл зургийг Ц.МЯГМАРСҮРЭН

Улаанбурхан өвчний байдал, хэрэгжүүлж байгаа арга хэмжээний талаар Монгол Улсын Шадар сайд, Эрүүл мэнд спортын сайдын үүрэг гүйцэтгэгч Ц.Оюунбаатар Засгийн газрын гишүүдэд танилцууллаа. Энэ оны дөрөвдүгээр сарын 25-ны байдлаар улсын хэмжээнд улаанбурхан өвчний нийт 17357 тохиолдол бүртгэгдсэн бөгөөд 4 дүгээр сарын 15-21-ний долоо хоногт 1366 сэжигтэй тохиолдол мэдээлэгдсэн нь өмнөх долоо хоногийн үзүүлэлтээс 30 орчим хувиар буурчээ. Гэсэн ч энэ өвчин Говь-Алтай, Баянхонгор, Архангай, Өвөрхангай, Орхон, Дархан-Уул аймаг, Улаанбаатар хотод тархалт өндөр байна. Өвчлөл 0-8 сартай болон 15-29 насны хүүхэд, залуучуудын дунд өндөр хэвээр байна.

Өнгөрсөн долоо хоногийн хугацаанд Халдварт өвчин судлалын үндэсний төвд нийт 2208 өвчтөн хандсаны 77 хувь нь улаанбурхан өвчний эмнэлзүйн шинж тэмдэгтэй, 18 хувь нь хэвтэн эмчлүүлсэн бөгөөд 0-9 сартай 21 хүүхэд эрчимт эмчилгээний тасагт эмчүүлж байна. Монгол Улсын Шадар сайд, Улсын онцгой комиссын даргын тушаалаар байгуулагдсан Шуурхай ажлын хэсэг Эрүүл мэнд, спортын яамны Төрийн нарийн бичгийн даргаар ахлуулан ажиллаж байна.

Цэргийн госпитал, ЭХЭМҮТ, Нэгдүгээр төв эмнэлгээс амьсгалын 3 аппаратыг ХӨСҮТ-ийн Эрчимт эмчилгээний тасагт шилжүүлэн ажиллуулж байна. Улаанбурхан өвчнөөр өвчлөгсдийн ойрын хавьтлын судалгааг хийж, 160 хүнийг голомтын дархлуужуулалтад хамруулсан байна.

Олон улсын монголч эрдэмтдийн XI их хурлыг ”Монгол судлал ба тогтвортой хөгжил” сэдвээр энэ оны наймдугаар сарын 15-18-нд Улаанбаатар хотноо зохион байгуулна. Хурлыг зохион байгуулах бүрэлдэхүүнийг БСШУ-ы сайд Л.Гантөмөрөөр ахлуулан байгуулж, бэлтгэл ажлын төлөвлөгөөг батлан хэрэгжүүлж үр дүнг Засгийн газарт танилцуулан ажиллахыг үүрэг болголоо.

Олон улсын Монгол судлалын холбооны дүрмийн дагуу таван жил тутамд зохин байгуулагддаг монголч эрдэмтдийн олон улсын их хурлыг Монгол Улсын Ерөнхийлөгчийн ивээл дор зохион байгуулдаг байна. Хурлаар сүүлийн таван жилд монгол судлалын салбарт бий болсон ололт, амжилтыг хэлэлцэхийн зэрэгцээ дэлхийн Монгол судлалын төв манай улсад байдгийн баталгаа болсоор иржээ. Өмнөх хурлуудад гадаадын 25 орны 250 гаруй, дотоодын 100 гаруй эрдэмтэд оролцож байсан бөгөөд энэ удаагийнхад мөн тэр жишгээр гадаад, дотоодын 400 орчим эрдэмтэн, судлаач оролцохоор тооцож байна.

Нийслэлээс аль болох хотын А зэрэглэлийн
бүсэд барилга барих зориулалтаар газар олгохоос татгалзаж, гэр хорооллын
газрыг дахин төлөвлөх барилгажуулах ажилд хувийн хэвшил болон хөрөнгө
оруулагчдыг татан оролцуулах бодлого баримтлан ажиллаж байгаа юм.
Нийслэлийн Ерөнхий төлөвлөгөөний газраас өгсөн мэдээллээр сүүлийн 2
жилийн хугацаанд Энхтайваны өргөн чөлөө, Их тойруу, Бага тойруу гээд хэд
хэдэн газарт шинээр барилга барих 69 зөвшөөрөл олгосоноос 30 орчим хувь
нь баригдаад дуусах шатандаа явж байгаа юм байна.

Харин гэр хороолллын дахин төлөвлөлтийн
хүрээнд Нийслэлийн Иргэдийн Төлөөлөгчдийн Хурлын тогтоолоор баталсан
байршлуудаас 22 байршлын 58 хэсэгчилсэн талбайд төсөл хэрэгжүүлэгч
шалгаран үйл ажиллагаа явуулж байгаагаас 21 хэсэгчилсэн талбайд барилга
угсралтын ажил эхлээд байна. Өнгөрсөн 2 жилийн хугацаанд нийт 7374
айлын орон сууцны барилга угсралтын ажлыг эхлүүлснээс 2014 онд 588
айлын орон сууц, 2015 онд 1656 айлын орон сууцыг барьж, ашиглалтад
оруулжээ.

Энэ ажлын үр дүнд гэр хорооллын дахин
төлөвлөлтийн төсөлд хамрагдсан 500 өрхийн 2100 иргэн хашаагаа орон
сууцаар сольжээ. 2016 онд нийт 4044 айлын орон сууцны барилгыг
ашиглалтад оруулах төлөвлөгөөтэй бөгөөд эхний хагас жилд 1104 айлын орон
сууцыг ашиглалтад оруулж, дахин төлөвлөлтөд хамрагдсан 4000 гаруй
иргэдийг орон сууцаар хангахаар ажиллаж байна. Энэ оны эхний улирлын
байдлаар Баянзүрх дүүргийн 13, 14 дүгээр хороонд төсөл хэрэгжүүлэгч
Зургаан талт ХХК 150 айлын орон сууц, мөн дүүргийн 8, 16 дугаар хороонд
төсөл хэрэгжүүлэгч Гангар инвест ХХК 168 айлын орон сууцны барилгыг тус
тус ашиглалтад оруулж, дахин төлөвлөлтөд хамрагдсан 167 айл өрх шинэ
байрандаа оржээ гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.

Гэр хорооллын дахин төлөвлөлтийн төслийн хүрээнд 2016 онд ашиглалтад
орох орон сууцны барилгын мэдээлэл

Их Монгол
Улсын гудамжны 2.1 км авто замын өргөтгөл шинэчлэлтийн ажлын хүрээнд
Замын Цагдаагийн баруун урд уулзвараас Баянмонгол хорооллын уулзвар
хүртэлх замын хөдөлгөөнийг түр хугацаагаар хааж хучилтын ажил хийнэ.

Тодруулбал,
Замын Цагдаагийн баруун урд уулзвараас Баянмонгол хорооллын уулзвар
хүртэлх хэсгийн хөдөлгөөнийг 04 сарын 29-ний 00:00 цагаас 05 сарын
01-ний 23:00 цагийн хооронд, Замын Цагдаагийн баруун урд уулзварыг 04
сарын 29-ний 22:00 цагаас 04 сарын 30-ны 10:00 цагийн хооронд тус тус
хэсэгчлэн хаах тул дээрх хугацаанд Та бүхэн өөр замыг сонгон зорчино уу.

Энэхүү хязгаарлалтай холбогдуулан нийтийн тээврийн үйлчилгээний нийт 4
чиглэл буюу Ч:10 “Ганц худаг-Сансар-Баянмонгол хороолол-Мишээл экспо”,
Ч:28 “Сэлх-7 буудал-Ард кино театр-Ривер гарден хороолол”, Ч:32
“Улиастай-Баянмонгол хороолол-ТЭЦ3”, Ч:44 “Нарангийн
гол-ТЭЦ3-Дүнжингарав худалдааны төв” чиглэлүүдийн замналд өөрчлөлт ороод
байна. Дээрх чиглэлүүдийн нийт 39 тээврийн хэрэгсэл Үндэсний цэцэрлэгт
хүрээлэнгийн замаар үйлчилнэ гэж Нийслэлийн ЗДТГ-ын Хэвлэл мэдээлэл,
олон нийттэй харилцах хэлтсээс мэдээллээ.

Монгол Тулгатны 100 эрхэм нэвтрүүлгээрээ олонд танигдсан хөтлөгч
П.Анужин яг одоо Монгол Ньюс мэдээллийн төвд хэвлэлийн бага хурал хийж
байна.

П.Анужин “”Монгол
тулгатны 100 эрхэм” эхлээд таван жилд 50 нэвтрүүлэг үзэгчиддээ хүргэсэн
байна. Юуны түрүүнд энэ нэвтрүүлэгт оролцож байсан хүмүүстээ баярлалаа.

Нэвтрүүлгийг надтай хамт хөтөлж ирсэн Ардын уран зохиолч Б.Лхагвасүрэн ахдаа гүн талархаж явдгаа илэрхийлмээр байна.

Миний хувьд хөтлөгч Анужин нэрээр танигдсан. Гэхдээ миний мэргэжил
олон улсын хуульч. Энэ оны нэгдүгээр сард “Hero Entertainment” студиэс
“Монгол тулгатны 100 эрхэм” нэвтрүүлгийн дүрс алдагдсан. Энэ үеэр”Hero
Entertainment” студийн захирал, найруулагч Б.Баатар бичлэгүүдийг маш том
бүлэглэл хулгайлсан гэж албан ёсоор мэдэгдсэн. Өнгөрсөн гуравдугаар
сард цагдаа энэ хэргийг шалгаж эцсийн дүгнэлт гаргажээ.

Цагдаагийн байгууллагын
мэдэгдэлд “Монгол тулгатны 100 эрхэм” нэвтрүүлгийн бичлэг
алдагдахад гадны том бүлэглэл ороогүй гэдэг нь тодорхой болсон. Тийм учраас энэ нэвтрүүлгийг санаачлагчийн хувьд энэ асуудал эцэслэн шийдэгдтэл түр хугацаагаар түдгэлзүүлэх гэж байна.

Бид анх энэ нэвтрүүлгийг бүтээхдээ сайхан түүхийг бичих гэсэн
зорилготой байсан учраас энэ зорилгыг алдагдуулахгүйн тулд түр
хугацаагаар зогсоож байна.” гэв.

Гэрэл зургийг Ц.МЯГМАРСҮРЭН