Month: February 2016

2015 оны нэгдүгээр сарын 28-ны өдөр хэвлэл мэдээллийн салбарынхан Монголын Хэвлэл мэдээллийн зөвлөлийг үүсгэн байгуулах чуулганаа хийж, дүрмээ батлан, Хэвлэл мэдээллийн ёс зүйн зарчмаа тунхагласан. Энэ өдрөөс хойш Хэвлэл мэдээллийн зөвлөл үйл ажиллагаагаа амжилттай явуулж, одоогоор иргэдээс 10 гаруй гомдол хүлээн авч хэлэлцээд байна.

Тус зөвлөлөөс өнгөрсөн сарын 28-нд бүтэн жилийн хугацаанд хийсэн ажлаа тайлагнасан юм. Түүнчлэн Монголын Хэвлэл мэдээллийн зөвлөл Монголын хэвлэл мэдээллийн салбарт шинэ соёлын давалгааг эхлүүлсэн санаачлагчдаа онцлон дурдаж, батламж гарууллаа.

“Ц.Намхайнямбуу сан”-аас энэ жилийн “Малд нүдтэй хүүхэд”-ээр Өмнөговь аймгийн Сэврэй сумын Б.Батбэхийг тодруулж, өнөөдөр шагналыг нь гардууллаа. Хөдөлмөрийн баатар, аварга малчин Ц.Намхайнямбуу агсны нэрэмжит тус сангаас 2003 оноос энэхүү шагналыг олгож эхэлсэн бөгөөд өнгөрсөн хугацаанд 21 хүүхдийг “Малд нүдтэй хүүхэд”-ээр өргөмжилсөн байна.

15 настай Б.Батбэх хүү өнгөрсөн онд есдүгээр ангиа төгсөөд, малаа маллаж хөдөө амьдрах болжээ. Тэрбээр “Манайх 1200 гаруй малтайгаас 800-аад нь ямаан сүрэг бол 100 гаруй нь ямаа. 300-аад үхэр, тэмээтэй. Хар багаасаа өвөө эмээтэйгээ хөдөө, малын бэлчээрт өссөн учраас малд их элэгтэй. Ямаан сүргээ өсгөж, мянгат малчин болно оо” гэсэн юм.

“Найрсаг Улаанбаатар” хөтөлбөрийн хүрээнд “Даншиг наадам-Хүрээ цам” шашин соёлын их наадмыг хоёр дахь жилдээ зохион байгуулах гэж буй талаар НЗДТГ-аас мэдээлэл хийлээ.

Зуун жилийн өмнө Их хүрээнд тэмдэглэдэг байсан Даншиг наадмыг сэргээн Монголын бурхан шашны сүм хийдүүд, НЗДТГ-тай хамтран Улаанбаатар хотноо Хүй долоон худагт 2015 оны наймдугаар сарын 8, 9-ний өдрүүдэд Хүрээ цам- Даншиг наадмыг тэмдэглэн өнгөрүүлсэн. Харин энэ жил “Даншиг наадам-Хүрээ цам”-ыг наймдугаар сарын 6,7-ны өдрүүдэд зохион байгуулахаар болжээ.

“Найрсаг Улаанбаатар” хөтөлбөрт энэ жил олон шинэ арга хэмжээнүүд 3.2 тэрбум төгрөг төсөвлөсөн. Үүний 500 сая орчим төгрөгийг Даншиг наадам зарцуулахаар болжээ.

НЗДТГ-ын дарга Ё.Гэрэлчулуун “Өнгөрсөн жилийн ажлын үр дүнгээс харахад энэ ажлын талаар мэдээлэл, сурталчилгааг маш эрт эхлүүлэх шаардлагатай юм байна гэсэн дүгнэлтэд хүрсэн. Тиймээс өнөөдөр “Найрсаг Улаанбаатар” хөтөлбөрийн хүрээнд зохион байгуулагддаг арга хэмжээнүүдийн оргил нь болох Даншиг наадмын талаар мэдээлэл өгч байна. Эрт мэдээлэл өгснөөр хүмүүст зуны амралтаа төлөвлөх, гадна дотны найз нөхдөө Улаанбаатарт урих боломжоор хангаж байгаа юм” гэв.

Наадмын үеэр Чингисийн талбайд 500 лам сүсэгтэн олонд зориулан ном хурахаас гадна анх удаа 300 гаруй уран нугараач оролцсон “Уул усны домог” уран нугаралтын фестивалийг задгай талбайд толилуулахаар төлөвлөжээ. Түүнчлэн “Эвлэх уянга буюу ер бусын эрчим” этник мюзиклийг Чингисийн талбайд тоглох юм байна. Мөн Хүрээ жахар цам, хүчит бөхийн барилдаан, аялал жуулчлалын үзэсгэлэн, хурдан морьдын уралдаан, Өндөр гэгээн болоод соёмбот туг залах ёслол, лам нарын тэмцээн гээд уламжлал соёлоо хадгалсан олон сонирхолтой арга хэмжээнүүд болох юм.

Даншиг наадмын бөхийн барилдааныг төрийн наадмын цол, зэргийг харгалзахгүйгээр даваа бүрд барилдах бөхчүүдийг сугалаа сугалуулж, оноолтоор барилдуулах аж. Өнгөрсөн жилийн Даншиг наадмаар барилдаж цол авсан бөхчүүд эхэлж учраа бөхөө сугалах ба барилдаж цол авсан бөхчүүдийг 15-60 сая хүртэл төгрөгөөр шагнах юм байна.

Шагналын сан:

Начин-15 сая,

Чимэгтэй начин-20 сая,

Заан -25 сая,

Чимэгтэй заан-30 сая,

Арслан -50 сая төгрөгөөр шагнаж, өнгөрсөн жилийн даншигт түрүүлж арслан цол авсан бөх энэ жил дахин түрүүлбэл аварга цол, 60 сая төгрөгөөр шагнана.

Өсвөр насныхан дунд газ үнэрлэн мансуурах тохиолдол өнгөрсөн жилүүдээс 10 дахин өсчээ. Сүхбаатар дүүргийн наймдугаар хороонд байрлах “Өргөө-2” кино театрт сурагчид газ үнэрлэн мансуурч байсныг цагдаагийн байгууллагаас илрүүлсэн байна.

Тодруулбал, Чингэлтэй дүүргийн 11 дүгээр хороонд оршин суудаг 14 настай, эрэгтэй А, мөн тус дүүргийн 19 дүгээр хороонд оршин суудаг 14 настай, эрэгтэй О нар ахуйн хэрэглээний газ үнэрлэж мансуурсан байжээ. Уг хэргийг Сүхбаатар дүүргийн цагдаагийн нэгдүгээр хэлтэст шалгаж эхэлсэн аж.

Анх 1999 онд Эрдэнэт хотод хийсэн судалгаагаар мансууруулах бодис хэрэглэдэг 45 хүүхдийг илрүүлж байсан. Түүнээс хойш жил бүр өсвөр үеийнхний дунд судалгаа хийжээ. Судалгаагаар хүүхдүүд хар тамхины талаар үнэн зөв мэдээлэл авч чаддагүй, хор хөнөөлийг нь мэддэггүйгээс уруу татагддаг нь тогтоогдсон. Хүүхдүүдийн үнэрлэж хордоод байгаа газ, цавуу нь хэрэглэсэн тохиолдолд амь насанд аюултай юм байна.

Шударга өрсөлдөөн хэрэглэгчийн төлөө газраас мэдээлэл хийлээ. Мэдээллээр “Юнивишн” ХХК-ийн интернэт үйлчилгээний асуудлыг онцолсон юм. Тус газрын дарга Д.Мөнхтөр хэлэхдээ “Энэ салбарт үйл ажиллагаа явуулж байгаа компаниудаас хамгийн өндөр буюу 25.17 хувийг эзэмшдэг, олон хэрэглэгчтэй “Юнивишн” компани гэрээнд заасан үүргээ биелүүлээгүй, гэрээ хийхэд танилцуулж байсан үйлчилгээг үзүүлж чадахгүй, хэрэглэгчийг хохироож байна гэсэн мэдээлэл их ирж байгаа.

Манай шалгалтаар тус компани гурвалсан үйлчилгээний сувгийн мэдээллийг гэрээнд тусгаж өгөөгүй зөрчил илэрсэн. Мөн багцын сонголтоос шалтгаалан интернэтийн хурдыг 3-15 mbps байна гэж заасан. Гэтэл хоёрдугаар сарын 1-нээс тодорхой дата хэрэглэсний дараа интернэт хурдыг хязгаарлагдмал болгож өөрчлөх талаар мэдэгдсэн нь анх байгуулсан гэрээний нөхцөлийг дангаараа өөрчил байгаа хэрэг юм. Үүнийг хэрэглэгчийн эрхийг зөрчиж байна гэж үзсэн.

Тиймээс энэ зөрчлөө цагаан сараас өмнө арилгахыг уриалж байна. Хэрвээ зөрчлөө зогсоовол заавал торгоно гэхгүй хэмээн мэдэгдэв.

Гэрэл зургуудыг Ц.МЯГМАРСҮРЭН