Өнөөдөр болох Нийслэлийн ИТХ-ын ээлжит 32 дугаар хуралдаанаар нийслэлийн 2016 оны төсвийг хэлэлцэх юм.
НИТХ-ын дэгийн дагуу нэгдсэн хуралдаанаар хэлэлцэх асуудлыг намын бүлгүүд болон НИТХ-ын хороодоор хэлэлцүүлэн санал, дүгнэлт гаргадаг.
НИТХ-ын Санхүү эдийн засгийн хороо бямба гарагт энэхүү асуудлаар хуралдсан ч тодорхой шийдэлд хүрээгүй учраас өнөөдөр 10:30 цагаас дахин хуралдахаар болсон.
Тиймээс НИТХ-ын ээлжит хуралдаан өнөөдрийн 12:30 цагаас хуралдахаар боллоо Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
Өнгөрсөн оны хоёрдугаар сард ашиглалтад орж байсан ЦЕГ-ын харьяа Түр хамгаалах байраар энэ оны эхний арван сарын байдлаар 580 орчим иргэн үйлчлүүлээд байгаа аж. Цагдаагийн байгууллага, 107 дугаарын утсан дахь мэдээллийн дагуу хүчирхийлэлд өртсөн, орох оронгүй болсон иргэдийг хамгаалалтдаа авдаг тус байгууллага нэг хүнийг 30 хоногийн хугацаанд байрлуулж, хооллож, сэтгэл зүйн болон эрүүл мэндийн тусламж үйлчилгээ үзүүлдэг. Харин очих газаргүй, асуудал нь шийдэгдээгүй иргэдийг заасан хугацаанаас ч давуулан байршуулдаг байна. 
Экс Ерөнхийлөгч Н.Энхбаяр хууль бусаар хувьчилж авсан гэх “Улаанбаатар таймс” сонины газрыг өнөөдөр дуудлага худалдаанд орууллаа. Тус газрыг долоон тэрбум 155 саяас эхэлж дуудсан бөгөөд 24 тэрбумаар Абдул Кран гэх гадаад иргэн худалдан авчээ.
Энэ амралтын өдрүүдэд АНУ-ын өмнөд ба төвийн мужуудад хүчтэй салхи хүйтэн бороо орж гол мөрөн үерлэсний улмаас есөн хүн амиа алдсан тухай хэвлэл мэдээллээр дамжуулж байна. Орон нутгийн хэвлэлд өгүүлснээр, Техас мужид дөрвөн хүн амиа алдсан байв. Тэднийг машинтай нь үерийн урсгал угаан авч явсан гэнэ. Зарим нутагт хэдэн арван байр байшин усанд автжээ. Гуу жалга усаар дүүрсэн байлаа.
БНХАУ-ын Шаньдун мужид байх далайн эрэгт өнгөрөгч бямба гарагт 3.7 тонн жинтэй 8.5 метр урт үхсэн халим гарч ирсэн байна. Халимыг харсан орон нутгийн иргэд далайн загасны аж ахуйн товчоонд мэдээлж, тэд шуурхай ажиллан халимыг шинжилгээнд оруулахаар авч явжээ.
Монголын үндэсний сагсан бөмбөгийн холбооноос зохион байгуулдаг “Үндэсний супер лиг”-ийн 2015-2016 оны улирлын тоглолт эхэллээ. Хандгайт дахь сагсан бөмбөгийн ордонд өнгөрөгч бямба гаригт нээлтээ хийсэн Супер лигт энэ жил найман баг оролцож байна. Нээлтийн өдөр “SBL Хасын хүлэгүүд” – “Их өргөө авартууд” багийн тоглолт болсон. Энэ тоглолтод 104-90 онооны харьцаагаар “SBL Хасын хүлэгүүд” хожжээ. Мөн хоёр дахь тоглолт болох “Танан гарьд”- “Альянс Тех харцага” багуудын тоглолт өчигдөр Спортын төв ордонд боллоо. “Танан гарьд” өрсөлдөгчөө 87:77-оор хожиж, улирлын анхны хожлоо авсан юм.
Энэ сарын 22-25-ны өдрүүдэд БНХАУ-ын Бээжин хотноо зохион байгуулагдсан “Залуу зохион бүтээгчдийн олон улсын тэмцээн”-ээс манай улсын баг хоёр шагналыг хүртсэн байна.
МАХН-ын Гүйцэтгэх товчоо өчигдөр буюу ням гаригт хуралдаж ЭМС-ын сайдад Л.Жамбалжавыг нэр дэвшүүлэхээр болжээ. Харин АН-ын зарим гишүүн энэ удаад Эрүүл мэнд, спортын сайдаар МАХН-аас хүн томилох ёсгүй гэсэн байр суурийг илэрхийлэх болсон байна. Учир нь өнгөрсөн гурван жилийн турш тус яамыг МАХН-аас томилогдсон хүмүүс удирдсан боловч, эрүүл мэндийн салбарыг унагасан гэж үзэж байгаа гэнэ. Тиймээс С.Ламбаа болон зарим УИХ-ын гишүүд шинээр томилогдох сайдыг АН-аас тавих саналыг Гүйцэтгэх зөвлөлдөө хүргүүлээд байгаа юм..
Нийслэлийн Засаг даргын Хөдөлмөр эрхлэлт, нийгмийн хамгааллын асуудал хариуцсан орлогч Ц.Буяндалай өнгөрсөн баасан гарагт ажлаасаа чөлөөлөгдөх өргөдлөө өгчээ. Өргөдөл өгөх болсон шалтгаан одоогоор албан ёсоор тайлбарлаагүй байгаа юм. Харин түүнийг өөрөө огцрох өргөдлөө өгсөн шалтгааныг нийслэлийн төсөвт дарамт учруулахуйц үйлдлийг дур мэдэн хийсэн гэж зарим хэвлэлээр мэдээлж байна.
Өнгөрсөн ням гаригт дэлхийн уур амьсгалын өөрчлөлтийн эсрэг чимээгүй жагсаал Францын Парис хотноо боллоо. Тус эсэргүүцлийн жагсаалын гол бэлгэ тэмдэг нь гудамжинд тайлан тавьсан мянга, мянган хос гутал бөгөөд өнөөдөр буюу арваннэгдүгээр сарын 30-ны өдөр эхэлж буй Дэлхийн уур амьсгалын эсрэг олон улсын чуулганыг угтан зохион байгуулж буй гэдгээрээ онцлог юм. Эдгээр гуталнууд энд Парис хотноо жагсаалд ирж амжаагүй эсвэл дэлхийн дулааралтыг зогсоохын төлөө чин эрмэлзлэлтэй хүмүүсийг төлөөлж байгаа гэдгийг жагсагчид хэлсэн юм. Түүнчлэн энэ сарын 13-нд Парис хотноо болсон террорист халдлагын үеэр нас барсан 130 гаруй хүний гэгээн дурсгалыг давхар хүндэтгэсэн юм.
