Хилийн цэргийн 0198 дугаар ангийн хариуцсан хэсгээр хадлан хадах зорилгоор БНХАУ-ын харъяат найман иргэн орж ирснийг манай хилчид саатуулжээ.
Тэднийг баривчлан захиргааны арга хэмжээний дагуу хуулийн хариуцлага хүлээлгэж, холбогдох хүмүүст нь хариуцуулан өгсөн байна.
Мөн Дорнод аймгийн Хилийн 0275 дугаар ангийн хариуцсан хэсгээр иргэн Д-ийн 66 толгой адуу улсын хилд тулсныг хилийн манаа илрүүлэн, малын эзэнд холбогдох хууль дүрмийг танилцуулан баталгаа гаргуулж, зүсмийн бүртгэлийн дагуу адууг хүлээлгэн өгчээ.
“Баян газар” компаниас өнөөдөр хэвлэлийн бага хурал хийлээ. Тэд “Өнгөрсөн баасан гаригт нэг тендерийн сонгон шалгаруулалт болсон байгаа. Энэхүү шалгаруулалтын урилга дээр ирүүлсэн саналыг “АМГ –ын даргын тушаалаар батлагдсан комисс нь Уул уурхай сайдын 2015 оны аравдугаар тушаалаар батлагдсан тусгай зөвшөөрөл олгох сонгон шалгаруулалтын журмын дагуу үнэлнэ” гэж заасан байгаа. Гэтэл үнэлгээ хийхдээ Уурхайн сайдын 2015 оны зургадугаар сарын 29-ны өдрийн 126 дугаар тушаалаар нэмэлт өөрчлөлт орсон журмын дагуу үнэлгээ хийж, зарим компаниудыг үндэслэлгүйгээр сонгон шалгаруулалтаас шууд хассан. Үүнийг хууль бус үйлдэл гэж байгаа. Материалыг 17 цаг хүртэл хүлээж авна гэж зарласан байсан. Гэвч цагтаа аваагүй, ахлах мэргэжилтэн Г.Пүрэвжав “Та нар хүлээж бай гэж хэлчихээд өрөөнийхөө хаалгыг хаачихаад гадаа гараад тамхи татаад зогсож байна.Төрийн ажлыг ингэж хууль бусаар хиймээргүй байна. Сонгон шалгаруулалтыг хууль бус явуулах байсал бол ил тод зарлах шаардлагагүй шүү дээ. Ашигт малтмалын газрын дарга хууль бус үйлдэлээ зогсоох хэрэгтэй. Бусад компаниудад шударга өрсөлдөх боломжоор нь хангах хэрэгтэй байна. Энэхүү зөрүүтэй үнэлгээнээс болж арав гаруй компани материалаа үнэлүүлж чадаагүй” гэлээ. Улмаар энэ асуудлыг АТГ-т шалгуулахаар болсноо мэдэгдлээ. 
ШӨХТГ-ын даргын удирдамжийн дагуу зарим их дээд сургуулиудын төлбөр, хураамж тогтоосон шийдвэр, суралцагчидтай байгуулсан гэрээ болон холбогдох дүрэм журам, тогтоол, тушаал гэх мэт шийдвэрүүд нь Өрсөлдөөний тухай хууль, Хэрэглэгчийн эрхийг хамгаалах тухай хууль болон холбогдох бусад хууль тогтоомжид нийцэж байгаа эсэхийг шалгасан дүнгийн талаар хэвлэлийн бага хурал хийж олон нийтэд мэдээлсэн.
Төрийн өмчийн тухай хуулийн төслийг хэлэлцээд Засгийн газрын гишүүдээс гаргасан саналыг тусган УИХ-д өргөн мэдүүлэхээр тогтлоо.
Монгол-Оросын хамтарсан Улаанбаатар төмөр зам хувь нийлүүлсэн нийгэмлэг олон улсын билетийн касс, олон улсын тээвэр зуучлалын төвийн байраа суллан 450 хүүхдийн багтаамжтай цэцэрлэг байгуулах шийдвэрийг энэ оны зургадугаар сарын 1-нд гаргасан. 
Налайх дүүргийн III хорооны “Ногоон толгой” гэдэг газар иргэн Ц-ийн бичил уурхайд нэг хүн унаж нас баржээ. Энэ тухай дуудлагыг өчигдөр онцгойгийнхон хүлээн өвч, Уул уурхайн аврах ангийн 6 албан хаагч, 1 автомашинтай ажиллаж, иргэн А /26 настай, эрэгтэй/ 47 метрийн босоо аманд унаж осолдсон цогцсыг гарган цагдаагийн байгууллагад тус хүлээлгэн өгсөн байна. 
Завхан аймгийн Идэр сумын Загастайн даваанд их хэмжээний цас орж, халтиргаа гулгаа үүсчээ. Ингэснээр давааны арын замд ачаатай шланз загварын автомашин зам хөндөлсөж зогссоноос 30 автомашин түгжирсэн байна. гэсэн дуудлагыг онцгойгийнхон 2015.09.28-ны өдрийн 23:45 цагт хүлээн авч тус аймгийн Онцгой байдлын газрын 6 албан хаагч, 2 автомашинтай ажиллаж, замын зорчих хэсгийг чөлөөлж, хэвийн үйл ажиллагаанд оруулсан байна.
Монголын газар тариалан эрхлэгчдийн холбооны ерөнхийлөгч Л.Цандэлэгийг хүн гүтгэсэн хэрэгт яллагдагчаар татжээ. Тэрбээр сонинд ярилцлага өгөхдөө Хүнс, хөдөө аж ахуйн сайд Р.Бурмаа импортын буудайнаас ашиг олох гэж байгаа гэдэг утгаар ярьжээ. Тиймээс салбарын сайд нь өөрөө гүтгүүлсэн гэж үзээд цагдаагийн байгуулагад хандсан юм. Хэргийг Сүхбаатар дүүргийн цагдаагийн хэлтэст шалгаж буй. 
Худалдаа, хөгжлийн банк 500 сая ам.долларын бонд гаргахаар болжээ. Эх сурвалжийн мэдээлснээр энэ мөнгө өнөөдөр шийдэгдэх аж. Өмнө нь тус банк бас ийм бонд гаргаж байсан юм. Тодруулбал, Худалдаа хөгжлийн банк 500 сая ам.долларын таван жилийн хугацаатай бондыг өнгөрсөн тавдугаар сард худалджээ. Зах зээлийн тааламжгүй нөхцөл байдлаас шалтгаалан өнгөрсөн долдугаар сард бонд гаргах хугацааг хойшлуулаад байсан юм. Худалдаа хөгжлийн банкны гаргасан бондын хүү 9.375 хувь байгаа аж. “Standard & Poor’s” олон улсын рейтингийн байгуулллага бондыг B+ гэж үнэлжээ. Худалдаа хөгжлийн банк 2012 оны 9-р сард 300 сая ам.долларын бондыг олон улсын бондын зах зээлд гаргаж байсан юм.
Нийслэлийн Иргэдийн төлөөлөгчдийн хурлын тэргүүлэгчдийн ээлжит 29-р хуралдаан өнөөдөр Хангарьд ордны 14 давхарын хуралдааны танхимд өглөөний 9:50 цагаас эхэлсэн юм. Өнгөрсөн долоо хоногийн пүрэв гаригт иргэдийн төлөөлөгчид хуралдаж, “Нийслэл хотын албан татвар”-ын хувь хэмжээг тогтоож, ажлын хэсгээс боловсруулсан хууль хэрэгжүүлэх журмыг батлах ёстой байсан. Гэвч Монгол ардын намын бүлгээс тав хоногийн завсарлага аваад байсан билээ. Харин өнөөдөр 09.50 цагийн орчимд төлөөлөгчдийн ирц бүрдэж, хурал эхэллээ. Тэд “Нийслэлийн албан татвар”-ын хувь хэмжээ тогтоох, албан татвар суутгагчийг бүртгэх, бүртгэлээс хасах, мэдээлэл солилцох журам батлах зэрэг асуудлыг хэлэлцэнэ.