Чингисийн талбайн урд талын зам дээр өчигдөр өглөө Приус маркийн машин онхолдож, замын хашлага эвдсэн юм. Энэ машины осолд цахим ертөнцийнхөн машин ачигчдыг буруутгаж байв. Мөн хулгайлж яваад осолдуулсан гэх мэдээлэл ч цацагдаад байсан юм.
Нийслэлийн цагдаагийн газраас уг машиныг хулгайнх байгаагүй гэж мэдэгдэв. Мөн машин ачилтын компаниуд ч уг осолд хамаагүй гэнэ. Харин гэнэтийн осол болсон юм байна. Ослын үеэр хүн бэртэж, гэмтээгүй ажээ.
МУГЖ Г.Ариунбаатар Мариинский театрын уран бүтээлийн 233 дахь улирлын нээлтийн тоглолтод оролцохоор болжээ. Тоглолт ирэх есдүгээр сарын 27-нд ОХУ-ын Санкт-Петербург хотын Мариинский театрт болох аж. МУГЖ Г.Ариунбаатар тус театрын гоцлол дуучин Юлия Маточкинатай хамтарсан тоглолт хийхээр болжээ. Тоглолтын хөтөлбөрт сонгодог ари, романсуудын зэрэгцээ Монгол, Буриад дуунууд багтжээ.
Олон улсын хүүхдийн VI наадам ОХУ-ын Буриад улсын Кабаны районы “Энхалук” спортын зуслангийн Биеийн тамир, спортын цогцолборт үргэлжилж байгаа билээ.
Наадмын чөлөөт бөхийн охидын 44 кг-ын жинд Архангай аймгийн бөх Ш.Шүрэнцэцэг алт, 62 кг-д Б.Сарнай хүрэл медаль хүртсэн юм. Тэмцээний 48 кг-ын жинд барилдсан “Алдар” спорт хорооны тамирчин Б.Мөнхнаран аваргалсан таатай мэдээ байна. Мөн жинд Орхон аймгийн “Ирээдүйн одод” спортын дунд сургуулийн тамирчин Б.Сэлэнгэ хүрэл медаль хүртжээ.
Охидын 57 кг-ын жинд хүч үзсэн Налайх дүүргийн тамирчин Г.Энхсувд жиндээ аваргалсан аж. Мөн жинд барилдсан Өмнөговь аймгийн тамирчин Н.Энхтуяа хүрэл медалийн эзэн болсон байна. Хөвгүүдийн 46 кг-д Өвөрхангай аймгийн тамирчин Г.Сүхбаатар мөнгөн медаль хүртжээ. 50 кг-ын жинд Дархан-уул аймгийн тамирчин Д.Жамсранжав мөн хүрэл медалийн эзэн болжээ. 58 кг-д А.Дөлгөөн хүрэл медаль хүртсэн бол 63 кг-ын жинд н.Оюундалай мөнгө, Орхоны Б.Бат-Эрдэнэ хүрэл медалийн эзэн болжээ.
Дотоодын зах зээлд
гурил, гурилан бүтээгдэхүүний нийлүүлэлтийг тогтворжуулах, үнийн өсөлтийг
хязгаарлах, хомсдол үүсгэхгүй байх зорилтын хүрээнд ХХААЯ, гурил, гурилан
бүтээгдэхүүн үйлдвэрлэгч “Талх чихэр” компани
нэг жилийн хугацаатай хамтран ажиллах санамж бичиг байгууллаа.
Санамж бичигт
ХХААЯ Тариалан эрхлэлтийг дэмжих сангаар дамжуулан гурилын үйлдвэрт стандартын
шаардлагад нийцсэн хүнсний улаанбуудайг тогтвортой нийлүүлэх харин үйлдвэрлэгч
“Талх чихэр” компани нь “Атар” талхны зах зээлийн бөөний худалдааны үнийг 1100
төгрөгөөс хэтрүүлэхгүй байхаар тусгажээ. Түүнчлэн үйлдвэрлэгчийн зүгээс “Атар”
талхны үйлдвэрлэлийн талаархи болон зах зээлд нийлүүлсэн талхны үнэ, хэмжээний
талаарх мэдээллийг сар бүр нэгтгэн салбарын яаманд мэдээллэх аж.
Архангай аймгийн Хотонт сумын Бургалтай багийн “Талын хар балгас” гэдэг газар энэ сарын 21-нд 13 настай, эрэгтэй Ө “Орхон” голын усанд живжээ. Тухайн өдрийн 21:10 цагт аймгийн Онцгой байдлын газарт дуудлага өгсөн аж. Тус газраас 8 албан хаагч, 1 автомашин, 1 завьтайгаар эрэн хайх ажиллагааг зохион байгуулсан ч хүүг хайх ажиллагаа үр дүнд хүрээгүй байна. Ар гэрийнхэнтэй нь зөвшилцөж өчигдрөөс эрлийг зогсоожээ.
“Газрын тос, байгалийн хийн олборлолтоороо БНХАУ-д тэргүүлэгч “PetroChina” компанийн ашиг энэ оны эхний хагаст 63 хувиар буурлаа” гэж “Блүүмбэрг” мэдээлэв. Тус компанийн цэвэр ашиг 25.4 тэрбум юаниар хэмжигдэж байгаа нь шинжээчдийн таамгаас доошилжээ.
Дэлхийн газрын тосны зах зээлд нийлүүлэлтийн илүүдэл үүсч, БНХАУ дахь эрэлтийн өсөлт удааширсан зэрэг нь газрын тосны үнэ унах шалтгаан болсон. Үүнийг дагаад хайгуул, олборлолтоос орлого нь хамааралтай “PetroChina” компанийн санхүүгийн үзүүлэлт ч мөн буурсан үзүүлэлттэй байгаа юм. Тус компанийн тайланд дурдсанаар тайлант хугацаанд “PetroChina” -ийн борлуулалт 24 хувиар буурч, 878 тэрбум юань болж агшжээ. Мөн хөрөнгийн зардал нь 33 хувиар мөн буурчээ.
Монгол Улсын Ерөнхийлөгчийн зарлигаар зарим хүнийг анхан болон давж заалдах шатны шүүхийн шүүгчийн албан тушаалд томиллоо. Чадраагийн Энхтөрийг Говь-Алтай, Завхан аймгийн Эрүүгийн хэргийн давж заалдах шатны шүүхийн шүүгчийн, Нямдоогийн Баярмаа, Замбалын Баярмаа нарыг Баянзүрх, Сүхбаатар, Чингэлтэй дүүргийн Иргэний хэргийн анхан шатны шүүхийн шүүгчийн, Мянганы Оюунцэцэгийг Дархан-Уул аймаг дахь сум дундын иргэний хэргийн анхан шатны шүүхийн шүүгчийн, Ганболдын Дэлгэрсайханыг Сэлэнгэ аймгийн Сайхан сум дахь сум дундын шүүхийн шүүгчийн албан тушаалд тус тус томилов.
Хоёр настай хүү нүхэнд унаж гэмтснийг гаргажээ. Нийслэлийн Баянзүрх дүүргийн 20 дугаар хорооны “Баян төхөм”-ийн 24 дүгээр гудамжийн .. тоотод ухсан нүхэнд хүн унасан дуудлага онцгой байдлын газарт ирсэн байна. Дуудлагын дагуу нийслэлийн Онцгой байдлын газрын Аврах ангийн долоон албан хаагч, Т /2 настай, эрэгтэй/ нүхэнд унаж гэмтсэн байсныг гаргаж Эх, хүүхдийн эрүүл мэндийн үндэсний төвд хүлээлгэн өгсөн байна.
“Олон улсын цөмийн
туршилтын эсрэг цэмцлийн өдөр” өнөөдөр тохиож байгаатай холбогдуулан Казахстан
улсаас Монгол Улсад суугаа Элчин сайдын яамнаас Зүүн хүрээ Дашчойлон хийдэд
хүндэтгэлийн арга хэмжээ зохион байгуулж, Энхтайвны хонх цохилоо.
БНКазУ-ын Ерөнхийлөгчийн
санаачлагаар НҮБ-аас жил бүрийн 8 дугаар сарын 29-ийг “Олон улсын цөмийн
туршилтын эсрэг тэмцлийн өдөр” болгон тэмдэглэх болсон. Уг өдрийг тохиолдуулан
БНКазУ-аас Монгол Улсад суугаа элчин сайдын яамнаас цөмийн зэвсгийн туршилтын
улмаас ам нас, эрүүл мэнд, эд хөрөнгөөрөө хохирсон хүмүүсийн дурсгалыг
хүндэтгэх арга хэмжээг 3 дахь жилдээ зохион байгуулав.
Энэ үеэр тус
улсаас Монгол Улсад суугаа Онц бөгөөд Бүрэн Эрхт Элчин сайд К. И. Кобландин,
“2006 онд манай улс цөмийн чадамжаараа дэлхийд 4 дүгээр байрт ордог байлаа.
Тухайн үед манай улс дэлхий нийтийн өмнө хүлээсэн хариуцлагаа ухамсарлаж,
өөрийн санаачилгаар Төв Ази дахь цөмийн зэвсгээс ангид бүсийн тухай гэрээнд
гарын үсэг зурсан. Одоогоос 66 жилийн өмнө Зөвлөлтийн Холбоо Казахстан Улсын
Семейн нутагт хийсэн 456 цөмийн туршилтын анхны туршилтыг хийсэн. Үүний хор
уршиг 40 гаруй жилийн турш үргэлжилсэн. Тиймээс манай улсад дэлхий нийтийг
цөмийн зэвсгээс ангид байхыг уриалах ёс суртахууны болон түүхэн эрх байгаа юм
хэмээн онцлон тэмдэглэв.
Тэрбээр, “Өнгөрснийг
буцаах боломжгүй. Гэвч бид ирээдүйг өөрчлөх боломжтой. Казахстан улс «АТОМ”
буюу туршилтуудыг устгах бидний эрхэм зорилго олон улсын төслийг санаачлан,
цөмийн зэвсгээс ангид ирээдүйг бүрдүүлэхийн төлөө ажиллаж байна. Энэ төсөл
цөмийн зэвсгийн туршилтыг зогсооход чиглэсэн иргэдийн дуу хоолойг нэгтгэх
зорилготой юм. Үй олноор хөнөөх
зэвсгээс ангид Антрактид, Латин Америк, Номхон далайн өмнө зүг, Зүүн-Өмнөд Ази,
Төв Ази, Африк, Шинэ Зеланд зэрэг нийт 100 гаруй улс орон бий. Тэдний эгнээнд
Монгол Улс ч мөн багтдаг. Энэ нь тус дэлхийн энхтайвны төлөө бодлого явуулдаг
гэдгийг харуулж байна. Энхтайван
ертөнц байгуулах зорилгоор цөмийн зэвсгийг устгаж, ирээдүйн үр хүүхдүүдийн
аюулгүй байдлыг баталгаажуулахын төлөө хамтран зүтгэх нь бидний нийтлэг зорилго
гэдгийг мартаж болохгүй” гэлээ.
Хүндэтгэлийн үйл
ажилагаанд БНКазУ, Чех, Беларусь, Вьетнам, зэрэг улсын Элчин сайдын яамдын
төлөөлөл болон Зүүн хүрээ Дашчойлон хийдийн лам хуваргууд, сүсэгтэн олон
оролцлоо.
Энхтайвны хонх цохисны
дараа цөмийн туршилтын улмаас хохирсон иргэдийн дурсгалыг хүндэтгэж нэг минут
чимээгүй зогсов.
Энэ оны II улиралд АНУ-ын дотоодын нийт бүтээгдэхүүн өмнөх оны мөн үеэс 3.7 хувиар өсч, шинжээчдийн таамгаас давлаа хэмээн “Блүүмбэрг” мэдээлэв. Шинжээчид америкчуудын ажил эрхлэлт нэмэгдэж, шатахууны үнэ буурсан тул энэ оны хоёрдугаар хагаст ч тогтвортой өсөлт үргэлжилнэ гэж үзжээ. Холбооны Нөөцийн банкны удирдлагууд бодлогын хүүгээ есдүгээр сард нэмэх эсэхийг хэлэлцэж байгаа гэнэ. Хөдөлмөрийн зах зээл хурдацтай өсч байгаа ч инфляци Төв банкны зорилтот түвшнээс хавьгүй доогуур байгаа аж. Түүнчлэн олон улсын хувьцааны зах зээлийн уналт шийдвэрийг хойшлуулж болзошгүй байгаа юм байна. Өнгөрсөн долоо хоногт АНУ-ын ажилгүйдлийн тэтгэмж хүсэгчдын тоо 6000-аар буурсан байна.