Month: August 2014

“Монгол наадам цогцолбор” ОНАТҮГ-аас “Эрүүл иргэн-Эко хөгжил” сэдэвт хөтөлбөрийг хэрэгжүүлж эхэллээ. Энэхүү хөтөлбөр нь хоёр үе шаттай хэрэгжинэ. Нэгдүгээр шат нь өнөөдрөөс ирэх сарын 28-ны өдрүүдэд дугуйн аялал, амралт, зугаалга, хоёрдугаар үе шат нь 12 дугаар сарын нэгнээс гуравдугаар сарын 13-ны өдрүүдэд цас, мөсний баяр, өвлийн амралт, зугаалга, цанын баазын үйлчилгээ гэсэн төрлүүдээр явагдана.

“Эрүүл иргэн-Эко хөгжил” хөтөлбөрийн нээлт өнөөдөр 11.00 цагт Хүй долоо худаг дахь Монгол наадам цогцолборт болно. Дугуйн аялал, зугаалгаар эхэлж буй хөтөлбөр долоо хоног бүрийн амралтын өдрүүдэд хэрэгжих юм. Энэ өдрүүдэд дугуйн зориулалтын зам, аяллын маршрут, төрөл бүрийн унадаг дугуйн худалдаа, түрээсийн үйлчилгээ, дугуйн дагалдах хэрэгслийн  худалдаа, дугуй засварын үйлчилгээ, X-tream спортын талбай, гудамжны сагсан бөмбөгийн талбай, элсний волейболийн талбай, хүүхдийн хөгжөөнт тоглоомын мини парк зэрэг цэвэр агаарт амралтын өдрүүдээ өнгөрүүлэх таатай боломжийг нийслэлчүүддээ санал болгож байгаа юм.

Үүнтэй холбогдуулан өнөөдрөөс ирэх сарын 28-ны ням гаригийг дуустал бямба, ням гарагуудад өглөө 10.00  цагаас оройн 20.oo цаг хүртэл Улсын драмын эрдмийн театрын гаднаас 2 цаг тутамд автобус явж, иргэдэд үнэ төлбөргүй үйлчилнэ.

УИХ-ын дарга З.Энхболд жил бүрийн 09
дүгээр сарын 01-ний өдөр шинэ хичээлийн жилийн нээлтэнд оролцдог
уламжлалтай. Тэрбээр энэ жил Барилгын Политехник коллежийн “Эрдмийн
баяр”-ын нээлтэнд оролцох бөгөөд тус сургуулийн шинэ хичээлийн жилийн
нээлт ирэх даваа гаригийн 09.00 цагт Эрдмийн өргөөндөө болох юм.

УИХ-ын даргын зочлон очих Барилгын
Политехник коллежийн хувьд анх 1954 онд Аж үйлдвэрийн техникумын дэргэд
22 оюутантай Барилгын салбар байгуулж улмаар 1960 онд дөрвөн салбар 540
оюутантай Барилгын техникум болгон өргөжүүлсэн түүхтэй. Барилгын
Политехник коллеж нь ШУТИС-ийн бүрэлдэхүүн хэсэг болж байгаа бөгөөд
мэргэжлийн анхан шатны 10 мэргэжил, техникчийн таван мэргэжлээр сургалт
явуулдаг юм. Байгуулагдсан цагаасаа хойш 50 гаруй жилийн хугацаанд нийт
8500 гаруй тусгай дунд боловсролтой техникч, 20,000 гаруй барилгын
нарийн мэргэжилтэй ажилчин дипломын дээд боловсролтой инженер бэлтгэн
гаргасан нь өнөөдөр эх орны барилгын болон бусад салбаруудад үр
бүтээлтэй ажиллаж байна хэмээн УИХ-ын Тамгын газрын Хэвлэл мэдээлэл, олон нийттэй харилцах хэлтэс мэдээлэв.

Хууль сахиулахын их сургуулийн албан хаагчид жил бүр Богд хан уулын оргил буюу “Цэцээ гүн”, “Хийморийн овоо”, Манзуширын хийд  орчмын хогийг цэвэрлэдэг байна.

Энэхүү уламжлалын дагуу их сургуулийн бүрэлдэхүүн сургуулиудын 150 орчим сонсогч, албан хаагч өчигдөр Богд хан уулын “Цэцээ гүн”-ий орчмын хогийг цэвэрлэжээ. Энэ удаагийн цэвэрлэгээгээр 120 орчим шуудай хогийг цэвэрлэсэн ба энэ нь өнгөрсөн жилүүдээс харьцангуй бага хог гарсан гэж тус сургуулийн албан хаагч ярив.

Тус сургуулийн сонсогчид “Цэцээ гүн” орчмын хогийг цэвэрлэсний дараагаар олс татах, уулын оргил булаалдах, хээрийн цай чанах, хөгжөөнт буухиа гэсэн дөрвөн төрлийн тэмцээнээр уралджээ.

Нийслэлийн Цагдаагийн газар, НИТХ, нийслэлийн Аялал жуулчлалын газар, Монголын Оюутны холбоотой хамтран “Оюутан цагдаа” хөтөлбөрийг өнгөрөгч долоодугаар сарын 1-ний өдрөөс энэ сарын 25-ныг хүртэл хэрэгжүүллээ.

Өнөөдөр ЦЕГ-ын Цагдаа, олон нийтийн төвд “Оюутан цагдаа” хөтөлбөрийн хаалтын үйл ажиллагаа болж, дээрх байгууллагын удирдлагууд болон нийслэлийн төвийн зургаан дүүргийн 44 чиглэлд  үүрэг гүйцэтгэсэн 88 оюутан цагдаа нар оролцлоо.  Оюутан цагдаа нар 186 цаг ажилласан ба 600 гаруй мянган төгрөгийн цалин  урамшуулал авсан байна. Энэ жилийн “Оюутан цагдаа” хөтөлбөр амжилттай хэрэгжсэн учир тус хөтөлбөрийг ирэх жил хэрэгжүүлэхээр болжээ. Ингэхдээ цар хүрээгээ өргөжүүлэн нийт 200 оюутныг хамруулахаар төлөвлөж буй юм байна.

“Оюутан цагдаа” хөтөлбөрийг жуулчдыг гэмт халдлагад өртөхөөс урьдчилан сэргийлэх, жуулчидтай холбоотой гэмт хэрэг зөрчлийг шуурхай шийдвэрлэх, тэдэнд шаардлагатай тусламжийг үзүүлэх зорилгоор хэрэгжүүлсэн. Оюутан цагдаа нар үүрэг гүйцэтгэсэн хугацаандаа 70 гаруй гэмт хэргийг таслан зогсоожээ.  Хөтөлбөр хэрэгжихээс өмнө оюутнуудад жуулчидтай хэрхэн зөв харьцах, тэдэнд асуудал тулгарвал яаж хуулийн дагуу шийдэх тухай ойлголт өгч, англи хэл, сэтгэл судлал, бие хамгаалах урлагийн хичээлийг мэргэжлийн багш нар заасан билээ.

Нийслэлийн Тээврийн газраас зорчигч 500 төгрөгийн тасалбар худалдан авсан тохиолдолд өдрийн турш хэчнээн ч автобусаар зорчсон дахин тасалбар авахгүй байх шинэ үйлчилгээг 10 хоногийн хугацаатай туршиж байгаа юм. Тэгвэл энэ үйлчигээ билетээр зорчдоггүй ахмадууд хийгээд хөгжлийн бэрхшээлтэй иргэдэд төдийлөн нөлөөлөхгүй байгаа ч автобуснаас олон дахиж бууж, сууж дамжих асуудалд шүүмжлэлтэй байгаа юм.

Харин нийтийн тээврээр их үйлчлүүлж ажлаа амжуулдаг, угаасаа л гэр ажлынхаа хоорондоо автобус дамждаг иргэдэд энэ үйлчилгээ ихэд таалагдаад байгаа юм.

Автобусныхаа чиглэлийг л мэддэг байхад энэ үйлчилгээ иргэдэд хэрэгтэй зөв зүйл хэмээх иргэд ч олон байна.

Цаашлаад Засгийн газрын харьяа 11-11 төвд иргэдээс ирүүлсэн санал хүсэлтийг харгалзан үзэхэд ихэнх нь нийтийн тээврийн салбарт туршилтаар хэрэгжүүлж байгаа шинэ үйлчилгээг сайшааж байна гэжээ.  Түүнчлэн, Хэрэглэгчийн төлөө байгууллагууд нэгдэн 700-аад хүн хамруулсан, судалгаа хийсэн байгаа.

Судалгаагаар хэрэглэгчийн дийлэнх нь буюу 90 гаруй хувь нь өдрийн турш 500 төгрөгөөр явж байгаа нь таалагдаж байгаа ч,  чиглэл маршрутын асуудал маш хүнд, олон дамжиж хүрэх газраа хүрч байна хэмээсэн байна.

Юутай ч туршилтаар ийм үр дүнд хүрээд байгаа ч хэрхэн шийдэх нь Улаанбаатар хотын захирагч Э.Бат-үүлээс шалтгаалах юм.

Магадгүй маргааш энэ туршилтын сүүлийн өдөр болж ирэх даваа гарагаас иргэд хуучин маршрутаараа явж эхэлж ч болох юм. Эсвэл энэ туршилтаа цааш үргэлжлүүлж ч мэдэх юм.

Дашрамд хэлэхэд, автобусны жолооч, кондукторууд өөрсдийн хувийн ашиг сонирхолын үүднээс энэ туршилтад ихэд бухимдалтай хандаж байгаа. Үүнийг зарим иргэд ч онцлоод байна. Учир нь зарим автобусны жолоочид хүн авахыг бодохгүй, автобусны буудлаасаа хэтэрч зогсож барих асуудлууд гарсаар байгаа юм. Тиймээс хэрэв туршилтыг цаашид хэрэгжүүлэхээр болвол нийтийн тээврийн жолооч, кондукторуудыг ч хохироохгүй талаас нь бодолцож, тэд ч иргэдэд 100 хувь үйлчилж чаддаг байх нь чухал юм.