АНУ-ын Агаарын нислэг, сансрын уудмыг шинжлэн судлах үндэсний төвийн цахим хуудаст Челябинскийн солироос 10 метрээр том, 30 орчим метр голчтой “2013 TX68” солир гуравдугаар сарын 5-нд дэлхийн хажуугаар маш ойрхон зайтай нисч өнгөрнө гэж мэдээлжээ.
Оросын Шинжлэх ухааны академийн Сансар судалгааны хүрээлэнгийн эрдэм шинжилгээний ажилтан Натан Эйсмонт мэдээлснээр, дэлхий тэрхүү солиртой мөргөлдөх магадлал бараг тэг хувьтай аж. 2013 оны 10 дугаар сард уг солирыг илрүүлсний дараа эрдэмтдэд судалгаа хийхэд ердөө гурван өдөр байсан бөгөөд үүний дараа солирыг ажиглах боломжгүй болжээ. Одон орончид солирын нисч өнгөрөх замыг тодорхойлохоор ажиллаж буй юм байна. Тэнгэрийн биет болон манай гарагийн хоорондох зай 17 мянгаас 14 сая км байх аж.
“Челябинск” солир дэлхийн агаар мандалд 2013 оны хоёрдугаар сарын 15-нд орж, агаар мандалд 30-50 км-ын өндөрт хүчтэй дэлбэрч, солирын хэлтэрхийнүүд Оросын Челябинск мужийн томоохон газар нутагт унажээ. Солирын дэлбэрэлт Урал болон Казахстаны хойд нутагт хэдэн зуун мянган хүнд харагдсан аж. Солирын хамгийн том хэлтэрхий Чебаркуль нуур орчимд унасан байна.