Жил бүр уламжлал болгон зохиогддог
“Тэмээний баяр” арга хэмжээ ирэх гуравдугаар сарын 6,7-ны өдрүүдэд
Өмнөговь аймгийн Даланзадгад хотноо зохион байгуулагдах гэж байна. Энэ
жил “Тэмээний баяр”-ыг “Монгол Тэмээ-999” өвлийн наадам болгон өргөтгөж
Дэлхийн дээд амжилт гиннесийн номонд бүртгүүлэх зорилгоор мянган тэмээ
уралдуулахаар болжээ.
19 дахь жилдээ болох гэж буй “Монгол
тэмээ-999” өвлийн наадмыг Монголын Залуучуудын Холбоо хоёрдахь жилдээ
хамтран зохион байгуулахаар болсон аж.
Говийн хаан хэмээн нэрлэгддэг тэмээний
ач тус болоод нүүдэлчин Монголчуудын соёл уламжлалыг залуучууддаа
таниулах зорилгоор “Монгол тэмээ-999” наадмын сонирхолтой аяллыг
залуустаа бэлджээ. Энэхүү аялал нь Улаанбаатар – Мандалговь –
Даланзадгад гэсэн маршрутаар нийт 1000 орчим км аялах бөгөөд замдаа
аймаг бүрийн түүхийн дурсгалт газруудыг үзэж сонирхох боломжтой юм
байна.
Аяллын хөтөлбөрт Торомны уралдаан,
Тэмээний музей үзэх, байгалийн үзэсгэлэнт газруудаар аялах, орон нутгийн
иргэдийн гар урлалын зүйл, сүү цагаан идээний үзэсгэлэн худалдаа үзэж
сонирхох гэхчилэн олон арга хэмжээ багтсан байгаа аж.