Онцгой байдлын ерөнхий газраас гаргасан мэдээгээр улсын хэмжээнд 10 гаруй түймэр асаж байна. Эдгээр түймэр нь Сэлэнгэ, Төв аймагт гарчээ. Зөвхөн Ерөө суманд гурван газар түймэр асаж буй аж. Тодруулбал, Сэлэнгэ аймгийн Ерөө сум Хэрийн гол гэдэг газар энэ сарын 5-нд түймэр гарч, Онцгой байдлын газрын 17 алба хаагч, орон нутгийн 6 иргэн, нийт 23 хүн, 2 техник хэрэгсэлтэйгээр унтраахаар ажиллаж байгаа гэв.
Ерөө сум, Буурагчин багийн Өлөнт гэдэг газар энэ сарын 8-нд ойн түймэр гарч, 19:30 цагт дуудлага хүлээн авчээ. Хүн хүч муу байгаа тул тус аймгийн Онцгойоос 1 алба хаагч, Орхон аймгийн Онцгой байдлын газрын 30 алба хаагч, орон нутгийн 19 иргэн, 3 автомашин, нийт 50 хүн, 5 техник хэрэгсэлтэйгээр түймрийг унтраахаар ажиллаж буй аж.
Ерөө сум, Бугант багийн Майнт өндөр-Уул гэдэг газар энэ сарын 9-нд түймэр гарсан тухай дуудлагыг тус аймгийн Онцгой байдлын газарт ирж, 25 алба хаагч, 2 техник хэрэгсэлтэйгээр унтраахаар ажиллаж байна. Сэлэнгэ аймгийн Мандал сум, Эрээн дэв гэдэг газар аянга буусны улмаас ойн түймэр гарсан тухай дуудлагыг энэ сарын 8-нд 13:45 цагт ирж, тус аймгийн Онцгой байдлын газрын 7 алба хаагч, Дархан-Уул аймгийн Онцгой байдлын газрын 10 алба хаагч, орон нутгийн 31 иргэн, нийт 48 хүн 5 техник хэрэгсэлтэйгээр унтраахаар ажиллаж байгаа гэнэ.
Сэлэнгэ аймгийн Мандал сум, Хуст гэдэг газар энэ сарын11-ний 22:00 цагт ойн түймэр гарсан тухай дуудлага ирж, аймгийн Онцгой байдлын газрын 6 алба хаагч, орон нутгийн 55 иргэн, нийт 61 хүн, 1 техник хэрэгсэлтэйгээр унтраахаар түймрийн голомтод ажиллаж буй ажээ. Сэлэнгэ аймгийн Хүдэр сум, Харанхуйн-Ам гэдэг газар мөн өдөр 11:00 цагт ойн түймэр гарсан тухай дуудлага хүлээн авч тус аймгийн Онцгой байдлын газрын 1 алба хаагч, Аврах тусгай ангийн 24 алба хаагч, орон нутгийн 24 иргэн, нийт 49 хүн, 3 техник хэрэгсэлтэйгээр унтраахаар ажиллаж байгаа гэв. Төв аймгийн Батсүмбэр сум, Хөх чулуут гэдэг газар ойн түймэр гарсан тухай дуудлага энэ сарын 9-ний өдрийн 14:40 цагт хүлээн авчээ. Дуудлагын дагуу тус аймгийн Онцгой байдлын газрын 12 алба хаагч, НОБГ-ын 13 алба хаагч, орон нутгийн 15 иргэн, нийт 40 хүн, 4 техник хэрэгсэлтэйгээр унтраахаар ажиллаж байна. Батсүмбэр сум, Цацралтын-Ам гэдэг газар мөн өдөр түймэр гарч, тус аймгийн Онцгой байдлын газрын 25 алба хаагч, орон нутгийн 47 иргэн, нийт 72 хүн, 7 техник хэрэгсэлтэйгээр ажиллаж маргааш нь түймрийг цурманд оруулжээ. Одоо бүрэн унтраахаар ажиллаж байна. Батсүмбэр сум, Мухар гэдэг газар ойн түймэр гарсан тухай дуудлагыг энэ сарын 11-ний өдрийн 12:20 цагт хүлээн авч орон нутгийн 20 иргэн, 2 техник хэрэгсэлтэйгээр ажиллаж 17:35 цагт цурманд оруулжээ. Батсүмбэр сум, Харуул толгой гэдэг газар мөн энэ сарын 11-ний өдрийн 19:10 цагт түймэр гарсан тухай дуудлага хүлээн авч орон нутгийн 60 иргэн, 6 техник хэрэгсэлтэйгээр ажиллаж маргааш нь 15:00 цагт цурманд оруулжээ. Одоо бүрэн унтраахаар ажиллаж байна. Батсүмбэр сум, Өлгийн таван толгой гэдэг газар энэ сарын 13-ны өдрийн 10:25 цагтойн түймэр гарсан тухай дуудлага хүлээн авч НОБГ-ын 13 алба хаагч, орон нутгийн 20 иргэн, нийт 33 хүн, 4 техник хэрэгсэлтэйгээр бүрэн унтраахаар ажиллаж гэнэ.
Нийслэлийн Сүхбаатар дүүрэг, 19 дүгээр хороо, Дүүрэн уул гэдэг газар ойн түймэр гарсан тухай дуудлага энэ сарын 11-ний өдрийн 15:24 цагт хүлээн авч НОБГ-ын 57 алба хаагч, 6 техник хэрэгсэлтэйгээр ажиллаж тухайн өдөр 20:10 цагт цурманд оруулжээ. Одоо бүрэн унтраахаар ажиллаж байгаа гэв.