Хар дарах, нойргүйдэх, ирээдүйдээ итгэлгүй болох, юмнаас айж цочих, огцом уурлах зэрэг шинж тэмдэг хүчтэй илэрвэл та өөрийгөө сэтгэлзүйн хувьд тэнцвэрээ алдаж байгаа юм байна гэж ойлгож болно. Бас зоогийн газар, олон нийтийн газарт ганцаараа хооллохдоо биеэ барих нь сэтгэлзүйн бас нэг эмгэг.
Манайхан цайны газар, зоогийн газар зэрэгт ер нь л бол ганцаараа ордоггүй шүү дээ. Хэрэв хэн нэгэн ганцаараа хооллож байвал “Ээ хөөрхий, зожиг зантай амьтан байх нь. Найз нөхөд ч үгүй. Хүн амьтнаас нуугдаж идээд. Хоол нь хоолойгоор нь давдаг л байгаа” гэх зэргээр гоочилж бүр “Ганцаараа идсэн гахай таргалдаггүй” гэнэ. Ажлынх нь хэн нэгэн ресторанд ганцаараа сууж таарвал “Муу булагнуур” гэж ирээд үг хаяна.
Гэтэл цайны газар, зоогийн газарт ганцаараа хооллож байгаа хүнийг сэтгэлзүйн хувьд хэвийн, ямар нэг дарамтад ороогүй эрүүл гэж дүгнэж болдог гэнэ. Яагаад гэвэл тэр хүн бусадтай л адил хооллож, цагийг өөртөө зориулж чадаж байна. Харин ч хэн нэгэн танилаа дагуулж, хань бараа болгож зууралдахгүй ганцаараа сууж, хоолоо өөрийнхөөрөө тамшаалан амтархан идэж суугаа хүчирхэг сэтгэлзүйтэйн шинж л дээ. Тийм болохоор ганцаараа өдрийн цайгаа ууж байгаа хэн нэгнийг нэг их гайхаж хараад байх шаардлагагүй.
Харин ч та өөрөө түүн шиг ганцаараа хооллоод сурчихвал аливаад өөрийнхөө хүчийг гаргаж, өөртөө итгэдэг болох дадал сууж мэдэх юм. Иймээс та зоогийн газарт хааяа ч гэсэн ганцаараа сууж хооллож сур.