Монголын ZEUS ESPORTS баг PUBG Mobile-ын дэлхийн аварга шалгаруулах тэмцээний гуравдугаар байранд орж цом, 100 мянган ам.доллар (284 сая төгрөг)-аар шагнуулсан талаар бид мэдээлсэн.
Тэд шагналынхаа 40 мянган ам.долларыг улсдаа хандивлах болсон гэх мэдээлэл цахим орчинд тархсан юм. Үүний талаар багийн ахлагч С.Ундрахаас тодруулахад тус мэдээллийг худал хэмээн үгүйсгэж “Монголын нэрийг өндөрт гаргаад, И-Спортын түүхэнд шинэ түүх бичиж байхад ХХОАТ/Хувь хүний орлогын албан татвар/-аас чөлөөлөх байх гэж найдаж байна “гэсэн хариуг өгсөн юм.
Харин үүнд Монголын татварын албанаас хариу тайлбарыг албан ёсны цахим хаягнаа нийтэлжээ.
Үүнд “ZEUS ESPORTS багийн орлогын 40 хувийг татварт суутгаж авах тухай ташаа мэдээлэл цахимд гарсан байна.
Хувь хүний орлогын албан татварын тухай хуулийн 19.1.1. урлаг, спортын тэмцээний шагнал, наадмын бай шагнал болон тэдгээртэй адилтгах бусад орлогод албан татвар ногдуулах орлогыг тухайн орлогын дүнд 5 хувиар татвар төлнө гэж заасан байдаг.
Тухайн шагнал авч байгаа улстай манай улс давхар татварын гэрээтэй бол давхардуулан татвар ногдуулахгүй байх зохицуулалт бий. АНЭУ-тай Монгол Улс давхар татварын гэрээгүй юм.
Хүүхэд, залуучууд та бүхэн уралдаан тэмцээнд амжилттай оролцож шагналын орлого олсон бол тухайн орлогын 5 хувийг татвар болгон өгч улс орныхоо хөгжил цэцэглэлтэд хувь нэмрээ оруулдаг юм шүү. Эх орныхоо нэрийг өндөрт өргөсөн залуустаа баяр хүргэе” хэмээн бичжээ.