Маргаашаас нэгдүгээр сарын 12-ныг хүртэлх цаг агаарын урьдчилсан төлөвөөр Хангай, Хөвсгөлийн уулсаар, 9-нд баруун болон говийн нутгийн зарим газраар, 10-нд баруун зүгийн нутгаар, 11-нд нутгийн баруун хагаст бага зэргийн цас орж, явган шуурга шуурна.
Ихэнх хугацаанд Дархадын хотгор, Идэр, Тэс, Отгон голын хөндийгөөр шөнөдөө 41-46 градус, өдөртөө 28-33 градус, Увс нуурын хотгор болон Хэнтийн уулархаг нутаг, Орхон-Сэлэнгэ, Хараа, Ерөө, Туул, Тэрэлж, Хэрлэн, Онон, Улз, Халх голын орчмоор, Дарьгангын талаар шөнөдөө 29-34 градус, өдөртөө 18-23 градус, говийн бүс нутгийн баруун хэсгээр шөнөдөө 18-23 градус, өдөртөө 9-14 градус, бусад нутгаар шөнөдөө 23-28 градус, өдөртөө 13-18 градус хүйтэн байна.
Харин Хөвсгөл аймгийн нийт нутгаар 0-26 см цастай байгаа бөгөөд он гарсаар хүйтэрч өнгөрсөн шөнө Дархадын хотгор, Бэлтэс, Тэс, Үүр, Идэрийн голуудын сав газраар 32-40 градус, бусад нутгаар 20-30 градусын хүйтэн хоножээ.
Мөн өнгөрсөн шөнө Цагааннуурт 0,0 мм цас орсон бөгөөд хамгийн их цас Цагаан-Үүрт 26 см, Эрдэнэбулганд 13 см, Цэцэрлэгт 12 см, Жаргалантад 11 см, Чандман-Өндөрт 10 см-ын цастай байна.
Одоогийн байдлаар өвөлжилт хэвийн хүндрээгүй байгаа боловч цас нэмж орж хүйтэрвэл өвөлжилт хүндрэх, нийт нутгаар хүйтний эрч чангарах төлөвтэй байгаа аж.