Улаанбаатар хотын хатуу хаягдлыг боловсруулах байгууламжийг шинэчлэх төсөл”-ийг хэлэлцэн шийдвэрлэв

Монгол Улсын Засгийн газар, Европын сэргээн босголт, хөгжлийн банк хооронд байгуулах “Улаанбаатар хотын хатуу хог хаягдлыг боловсруулах байгууламжийг шинэчлэх төсөл”-ийн нийт өртөг 16.7 сая ам доллар байхаас тус банкнаас 2.0 сая ам, долларын техник туслалцаа, 5 сая ам долларын буцалтгүй тусламж, 9.7 сая ам долларын зээлийн хөрөнгийг Монгол Улсын Засгийн газарт олгохоор тохиролцоод байна. Зээлийн хугацаа 15 жил, зээлийн үндсэн төлбөрөөс чөлөөлөгдөх хугацаа 3 жил, жилийн хүү (хувьсагч хүү) LIBOR+1 байна гэж Эрчим хүчний сайд Ц.Даваасүрэнтанилцуулгадаа дурдав.

Төслийг хэрэгжүүлснээр хог хаягдал цуглуулах, тээвэрлэх, дахин боловсруулах, устгах үйлчилгээг шинэчлэн, хог хаях цэгүүдийн хүчин чадлыг дөрвөн сая тонноор нэмэгдүүлнэ. Мөн Улаанбаатар хотод ялгарч буй хүлэмжийн хий (CO2)-н хэмжээг 18.000 тонноор бууруулж, 100.000 тонн гаруй барилгын хог хаягдлыг боловсруулж дахин ашиглах боломжийг бүрдүүлэх аж.

Хэлэлцэж байгаа асуудалтай холбогдуулан Улсын Их Хурлын гишүүн Ч.Улаан, Б.Баттөмөр нар Ажлын хэсгээс асуулт асууж, санал хэлж, байр сууриа илэрхийлсэн. Гишүүдийн зүгээс жилд хэчнээн тонн барилгын хог хаягдал гарч байгааг тодруулахын зэрэгцээ энэхүү байгууламжийг хаана барихаар төлөвлөсөн болон эдийн засгийн үр ашгийн тооцоог ньилүүтэй тодрууллаа.

Нийслэлийн Засаг Даргын Дэд бүтцийн хөгжлийн асуудал хариуцсан орлогч П.Баярхүү, нийслэлийн хэмжээнд жилд 1 сая гаруй тонн, өдөрт 1000 тонн хог хаягдлыг хогийн дөрвөн цэгт тээвэрлэж буулгадаг. Мөн жилдээ барилгын хог хаягдал 120.000 тонн гардаг бөгөөд төсөл хэрэгжиж, хогны үйлдвэр барьснаар 100.000 тонн барилгын хог хаягдлыг боловсруулан явган хүний зам барих барилгын материал хийх зэргээр дахин ашиглах юм. Төслийн хүрээнд стандарт шаардлагыг хангах, хатуу хог хаягдлыг булшлах цэг болон барилгын хог хаягдлыг дахин боловсруулах байгууламжийг Морингийн даваанд байгуулахаар төлөвлөөд байна гэж хариуллаа.

Улсын Их Хурлын гишүүн Б.Баттөмөр хатуу хог хаягдлыг булшлах цэг болон барилгын хог хаягдлыг дахин боловсруулах байгууламжийг барих эдийн засгийн үр ашгийн тооцоог тодорхой болгохыг, Улсын Их Хурлын гишүүн Ч.Улаанзээлийн хөнгөлөлтийн түвшин 43.06 хувь байгаа нь нэн хөнгөлөлттэй зээлийн ангилалд хамаарахгүй учир үүнийг эргэн нягтлахыг Ажлын хэсгийнхэнд анхааруулж байлаа. Ингээд “Улаанбаатар хотын хатуу хаягдлыг боловсруулах байгууламжийг шинэчлэх төсөл”-ийн Зээлийн хэлэлцээрийн төслийг зөвшилцөхийг дэмжье гэсэн саналын томъёоллоор санал хураахад, хуралдаанд оролцсон гишүүд 100 дэмжлээ. Төсвийн Байнгын хороо, санал, дүгнэлтээ Аюулгүй байдал, гадаад бодлогын байнгын хороонд хүргүүлэхээр болов гэж УИХ-ын Хэвлэл мэдээлэл, олон нийттэй харилцах хэлтсээс мэдээллээ.