Энэ жилийн наадмын нээлтийн ёслолыг Төрийн соёрхолт, Монгол Улсын гавьяат жүжигчин Д.Сосорбарам найруулсан билээ. Тэрээр наадмын өмнө “Наадмын нээлтийн үйл ажиллагааг “Босоо заяатай Монгол” агуулгаар найруулна” хэмээн ярьж байсан. Гэтэл өнөө жилийн нээлтийн ёслолд наадамчин олон тийм ч ам сайтай байсангүй. Ерөнхий агуулга муутай, авцалдаагүй үйл явдал, эмх замбараагүй бүжиг, олон тооны энхийн сахиулагчид гээд нээлтийн ёслолыг шүүмжилцгээж байлаа. “Хонхны дуу”-г эгшиглүүлсэн нь уур амьсгалтай ерөөсөө зохицсонгүй, “Харанга”-ын Лхагваагийн “Толин хул” дууг олонтаа цангинуулсан нь “Үүнээс өөр дуу байдаггүй юм уу” гэх асуултыг бие биенээсээ асуухад хүргэсэн юм.
Төрийн соёрхолтын найруулгатай наадмын нээлт зарим хүмүүст таалагдаагүй нь түүнээс хэтэрхий их зүйл хүсэн хүлээж байсантай холбоотой байж магад.
Дараа жилээс наадмын нээлтийг шинэ залуу улсуудаар найруулж, шинэ зүйл гаргаж ирэх нь зүйтэй гэж ярих хүмүүс ч байлаа.
Д.САР