Засгийн газраас УИХ-ын 2015 оны 41 дүгээр тогтоолын хэрэгжилтийг хангах, бага хүүтэй, урт хугацаат гадаад валютын санхүүгийн эх үүсвэрийг бүрдүүлэх зорилгоор Төрийн банк 300 сая ам.доллар хүртэлх хэмжээний үнэт цаасыг олон улсын зах зээлд арилжаалахыг Төрийн банкны Төлөөлөн удирдах зөвлөлд зөвшөөрлөө. Энэ талаар Төрийн банкны Ерөнхий захирал Д.Батсайхан “Бидний зүгээс бонд гаргахын эхлэл болгож, хоёр үндсэн шаардлагаа биелүүлсэн. Эхнийх нь үнэлгээ тогтоолгосон. Дараагийнх нь олон улсын аудитын байгууллагаар сүүлийн дөрвөн жилийнхээ санхүүгийн тайланд аудит хийлгэсэн. Олон улсын аудитаар бид ямар нэг материаллаг зөрчилгүй, олон улсын стандартад нийцсэн байдлаар санхүүгийн тайлагналаа зөв хийсэн байна гэсэн үнэлгээ авсан” гэсэн юм.
Дээрх 300 сая ам.долларын бондыг гурван жилийн хугацаатай гаргах бөгөөд энэ оны эхний хагас жилд амжихгүй бол гуравдугаар улиралд гаргах төлөвлөгөөтэй байгаа аж.
Аливаа банкууд Монголбанкнаас тогтоосон тодорхой шалгуур үзүүлэлтүүдийг хангаж тусгай зөвшөөрөл авсан ч үндсэн дээр зээл олгох, үнэт цаас авах зэрэг үйл ажиллагаа явуулдаг. Тийм учраас Төрийн банк ч мөн ялгаагүй бондын мөнгийг дээрх зарчмын дагуу зарцуулна гэдгийг Төрийн банкны захирал хэллээ. Түүнчлэн бонд гаргаснаар валютын нийлүүлэлт нэмэгдэж, ханш нь буурна хэмээн үзэж байгаа ажээ.