“Тогтвортой хөгжил-түншлэл” төслийн хүрээнд орон нутгийн хөгжилд Төр, иргэний нийгмийн байгууллага, уул уурхай, жижиг дунд үйлдвэрлэл эрхлэгчдийн төлөөллийн тэгш оролцоог хангасан, түншлэлийн уялдаа холбоо, хамтын ажиллагааг хангах үүрэг бүхий аймгийн “Тогтвортой хөгжил-түншлэл” хамтын ажиллагааны зөвлөлийг 15 хүний бүрэлдэхүүнтэйгээр аймгийн иргэдийн Төлөөлөгчдийн Хурлын дэргэд байгууллаа.
Зөвлөл нь Сэлэнгэ нутгийн тогтвортой хөгжил, дэвшлийн төлөө нийгмийн бүлгүүдийн бүтээлч оролцоог хангах, хамтран ажиллах, иргэдийн амьдралын чанарыг сайжруулахад бодитой хувь нэмэр оруулах зорилготой аж.
Цаашлаад төрийн захиргааны байгууллагын шийдвэр гаргах үйл явц, түүний хэрэгжилтийг хангах, салбар бүрийн бүтээлч санал, санаачлагыг дэмжих, иргэдийн эрх ашгийг хамгаалах, сум бүрт салбартай байх зэрэг алсын хараа дэвшүүлжээ.
Зөвлөлийн үйл ажиллагаа нь нээлттэй, ил тод, хамтын ажиллагаа, харилцан хяналтын тогтолцоонд тулгуурлах бөгөөд төр, иргэний нийгмийн байгууллага, жижиг дунд үйлдвэрлэл эрхлэгч, томоохон аж ахуйн нэгж, хэвлэл мэдээллийн түншлэлийн тэгш оролцоог хангаж ажиллана.