“IEM Taipei” тэмцээнд түрүүлж “Азийн аварга” болсон Монголын кибер спортын мэргэжлийн баг “Тhe MongolZ” ESL-с зохион байгуулж байгаа “Katowice 2016” дэлхийн аваргын тэмцээнд оролцохоор болсон. Тэд тэмцээнд оролцохоор Польш улсыг зорьсон бөгөөр тэмцээн маргааш өдрийн 12:20 цагаас /Монголын цагаар 19:20 цаг/ “Fnatic” болон “NaVi” багуудын тулаанаар эхлэх юм. Харин манай баг Монголын цагаар 20:40 цагаас ХБНГУ-ын “Mousesports” багтай тоглох юм байна.
Тэмцээнд оролцох багуудыг хоёр хэсэгт хуваасан бөгөөд хэсэг тус бүр зургаан багтай аж. Нэг хэсгээс гурван баг шалгарч, тэмцээнийг үргэлжлүүлнэ. Манай багийн хувьд Шведийн “Ninjas in Pyjamas”, “Fnatic”, Бразилын “Luminosity Gaming” ХБНГУ-ын “Mousesports”, Украйны “NatusVincere” багуудтай нэг хэсэгт багтжээ. Өөрөөр хэлбэл, эдгээр багууд нь дэлхийн чансааг тэргүүлж байгаа найман багийн тав нь юм байна. Харин “TheMongolZ” баг дэлхийд чансаагаараа 23 дугаарт бичигдэж байгаа. Мөн манай багийн хувьд “IEM Katowice” нь дэлхийн хэмжээний анхны томоохон тэмцээн гэдгээрээ онцлог юм.