Танхимаараа гаргасан Засгийн газрын тогтоолоор Ерөнхий сайд нь буруутгагддаг жишиг тогтох нь. Тодруулбал, эл өдрүүдэд үргэлжилж байгаа Хөгжлийн банкны шүүх хурлын гол асуудал бол Ерөнхий сайд асан Н.Алтанхуягийн Засгийн газрын гаргасан 299 болон 256 дугаар тогтоолтой холбоотой юм. Уг тогтоолоор Ерөнхий сайд асан Н.Алтанхуяг тэргүүтэй Засгийн газрын гишүүдийг яллах гэсэн оролдлого болж нийгэмд байна. Тэрбээр үүнийгээ ч шүүх хурлын танхимд хэлсээр байгаа юм. Тодруулбал тэрбээр “Гүйцэтгэх эрх мэдлийн дээд байгууллага бол Засгийн газар. Харин УИХ бол хууль тогтоох дээд байгууллага. Шүүх эрх мэдэл мөн тусдаа. Монгол Улсын Үндсэн хуулиар энэ гурван байгууллага өөр хоорондын асуудлаа хянаж үзэхгүй байх хуультай. Тодруулбал, үүнийг Үндсэн хууль болон Засгийн газрын тухай хууль, Засгийн газрын хуралдааны журамд заасан байдаг. Прокурор хэлэхдээ “Үгсэн хуйвалдсан…, Үгсэн хуйвалдаагүй хэрнээ үйлдлээрээ нэгдсэн” гэлээ. Монгол Улсын үе үеийн бүх Засгийн газар дандаа үйлдлээрээ л нэгдэж нийлдэг шүү дээ. Учир нь Засгийн газар танхимын үйл ажиллагаа явуулдаг. Танхимын үйл ажиллагааны үндсэн хэлбэр нь Засгийн газрын хуралдаан байна гэж хуулиар заачихсан. Засгийн газар хуралдаж байж шийдвэр гаргадаг. Тогтоол дээрх гурван хүний гарын үсгийг хараад тэр гурван хүн тухайн шийдвэрийг гаргасан мэтээр үзэж байна. Үгүй шүү дээ. Засгийн газрын тухай хуулиар Засгийн газрын хуралдаанаар олонхоороо шийдвэр гаргана. Хэрвээ шийдвэр гараагүй бол олонх болоогүй гэж үзнэ гэж байгаа юм. Зээл олгосныг хохирол гэж яаж үзэх юм бэ. Энд эдийн засгийн “А” ч алга. Ийм тэнцвэргүй байдалд бид яаж мэтгэлцэх юм бэ. Тиймээс энд эдийн засаг, хуулийн гээд бүх хүнийг байлгамаар байна.
Засгийн газрын гаргасан тогтоолоор Ерөнхий сайдыг буруутгадаг зүйл надаас хойш гарахгүй байгаасай. Засгийн газрын гаргасан шийдвэр УИХ дээр баталгаажна гэж ямар амьтан нь ойлгодог байна.
Монголын ард түмэн, үе үеийн Ерөнхий сайд, үе үеийн хууль тогтоогчид, прокурор, шүүгчид бүгдээрээ нэг гэр бүл. Асуудлаа ойлголцъё л доо. Яагаад мухар сохроор хүнийг яллахын тулд ажилладаг юм бэ. Дахиад хэлье. Нотлох баримтад өчнөөн олон хүний гэрчийн мэдүүлэг байна лээ. Миний уулзаж үзээгүй, тэр байтугай огт танихгүй хараагүй хүмүүсээс гэрчийн мэдүүлэг гээд мэдүүлэг аваад хийчихсэн байгаа юм. Тэнд нь “Н.Алтанхуяг шахаад байсан юм” гэсэн байна. Монгол Улсын Ерөнхий сайд хүн нэг банкны доод албан тушаалтантай харьцах уу. Ингэж хэрэг зохиож болдог юм уу? Тэр хүнийг гэрчээр дуудаад оруулаад ир гэхээр “Яллагдагч болчихсон. Одоо гэрчээр оруулах боломжгүй” гэж байгаа юм. Тийм юм бол яах гэж тэр хүнээс гэрчийн мэдүүлэг авч, түүнийгээ нотлох баримт гэж үзсэн юм бэ. Энэ мэтээр яривал зөндөө юм бий.
Би дөрвөн удаа УИХ-ын гишүүнээр, дөрвөн удаа Засгийн газарт ажиллаж үзсэн. Монгол Улсыг хөгжүүлье. Шинэчлэлийн Засгийн газрыг Засгийн газар шиг ажиллуулъя гэж үнэхээр зүтгэсэн. Н.Батбаяр сайд энд сууж байх хүн биш. Хөгжлийн банкны Шинэбаатар, Мөнхбат нар ч сэтгэл гаргаж ажилласан. Сэтгэл гаргаж ажилласан нь өнөөдөр шүүгдэж хоцордог, хулгай дээрэм хийсэн нь гадаадад зугаалж явдаг ийм нийгэм бий болж байгаа юм уу? Энд нэг зүйлийг хэлэхэд Засгийн газрын шийдвэр гэдэг бол Засгийн газрынх шүү. Хөгжлийн банкны шийдвэр гэдэг бол зээл олгох тухай шийдвэр. Засгийн газрын тогтоолын нэр нь хэзээ ч “Зээл олгох тухай” гэж гардаггүй. 299 дугаар тогтоолын нэр нь “Нүүрсний экспортыг нэмэгдүүлэх тухай” гэж байгаа. 70 ам.доллар байсан нүүрс 20 ам.доллар руу орлоо. Улс орноороо хүнд байдалд орох нь яах вэ гээд гарц гаргалгаа хай, ажлаа хий гэж гаргасан тогтоол. Хоёрдугаарх тогтоол нь “Арматур, цемент дотооддоо хийе” гэсэн шийдвэр. Учир нь байшин барихад юу ордог гээч. Арматурын төмөр, цемент хоёроо гаднаас авдаг. Тэгвэл үүнийг дотооддоо хийе гэсэн. Тиймээс 256 дугаар тогтоол төмөрлөгийн үйлдвэрийг дэмжих тухай байсан” хэмээн шүүх хурлын үеэр хэлсэн.