Нийслэлийн Засаг даргын захирамжаар хүүхдийн аюулгүй орчныг бүрдүүлэх зорилгоор тоглоомын талбайн стандартын хэрэгжилтийг хангуулах үүрэг бүхий ажлын хэсгийг байгуулсан. Нийслэлийн Засаг даргын Нийгмийн салбар, ногоон хөгжил болон агаар орчны бохирдлын асуудал хариуцсан орлогч О.Номинчимэгээр ахлуулсан тус ажлын хэсэг өнөөдөр хуралдаж, тоглоомын талбайн стандартын хэрэгжилтийн талаар санал солилцов.
Нийслэлийн хэмжээнд 1452 хүүхдийн тоглоомын талбай байдаг. Эдгээр тоглоомын талбайд стандарт, аюулгүй байдлын судалгаа хийхэд талбайн гадаргуу болон тоглоом нь ашиглалтын шаардлага хангахгүй, бүрэн бүтэн байдал алдагдсан зэрэг зөрчил илэрсэн. Илэрч буй зөрчил дутагдлыг арилгах, стандартын шаардлагад нийцүүлэхээр холбогдох байгууллага, нутгийн захиргааны байгууллагууд болон СӨХ-д зөвлөмж хүргүүлсэн гэдгийг нийслэлийн Засаг даргын Нийгмийн салбар, ногоон хөгжил болон агаар орчны бохирдлын асуудал хариуцсан орлогч О.Номинчимэг хэлж байв.
Мөн нийслэлийн Засаг даргын Нийгмийн салбар, ногоон хөгжил болон агаар орчны бохирдлын асуудал хариуцсан орлогч О.Номинчимэг тоглоомын талбайн стандартыг хангуулах ажлыг эрчимжүүлэх, дүүргүүд дэд ажлын хэсэг байгуулж зөрчил, дутагдлыг хурдан шуурхай арилгахыг ажлын хэсгийн гишүүдэд үүрэг болгов.