Байрны хижээл насны ах “Миний дүү сайн байна уу, ах нь чамаас нэг зүйл асууя” гэлээ. Тэрээр “Ахад нь мөнгөний хэрэг гараад. Фэйсбүүкээр хүүгүй, барьцаагүй зээл олгоно гэсэн зарын дагуу хандсан. Улмаар надаас регистр, овог нэр, утасны дугаар зэрэг хувийн мэдээллийг авсан. Удалгүй таны нэр дээрх дансанд 450 мянган төгрөг байна. Бид танд 10 сая төгрөгийн зээл гаргах боломжтой. Гэхдээ эхлээд урьдчилгаа 450 мянган төгрөг шилжүүлэх ёстой. Урьдчилгаа чинь баталгаажчихвал бид 10 минутын дотор танд 10 сая төгрөг шилжүүлчихнэ гэсэн. Ах нь урьдчилгааг нь хийчихвэл надад 10 сая төгрөг өгөх болов уу” гэж байна. Би болохгүй шүү, таныг залилж байна гэдгийг онцгой анхааруулж хэлсэн.
Гэхдээ мань ах аль хэдийнэ залилуулчихаж. Дансан дахь үлдэгдлийг нь төвөггүй хэлж байна гэдэг банкны нэвтрэх нууц үгээ алдчихсан гэсэн үг. Улмаар дансан дахь 450 мянган төгрөг нь ч өөр данс руу шилжчихсэн байлаа. Энэ мэт залилуулж, эд хөрөнгөөрөө хохирч байгаа иргэд цөөнгүй байна. Тиймээс сошиалаар явж буй барьцаагүй, хурдан шуурхай зээл олгоно гэсэн агуулгатай мэдээлэлд битгий итгээрэй. Нөгөөтэйгүүр та 10 сая төгрөг танихгүй хүнд ямар ч барьцаа, баталгаагүй зээлэх үү гэдгээ бодож үзэх хэрэгтэй.
Огт танихгүй хүнтэй утсаар яриад л 10 сая төгрөгийн зээл битгий хэл 10 мянган төгрөг ч өгөхгүй шүү дээ. Тиймээс залилуулахаасаа өмнө эхлээд би байсан бол ийм нөхцөлөөр хүнд мөнгө зээлэх байсан уу. Би байсан бол…” гэж бодож үзээрэй.