БНХАУ-ын дарга Си Зиньпиний өнөөдөр Өмнөд Африк улсад айлчилж байна. Хятадын даргын Африкийн орнуудад хийж буй айлчлал тус тивийн орнуудтай хамтын ажиллагаагаа тэлэх шинэ санаачлага гаргах, Африкийн ард түмний амьжиргааны түвшинг сайжруулах, ядуурлыг бууруулах, хөрөнгө оруулалтыг нэмэгдүүлэх зэрэг олон зорилгыг агуулжээ.
Өнөөдөр Өмнөд Африкт эхэлж буй Хятад-Африкийн дээд хэмжээний уулзалтад Хятадын төр засгийн өндөр албан тушаалтнууд болон Африк тивийн орнуудын эрх баригчид оролцож, цаашид аль салбарт түлхүү хамтрах, Хятад ямар салбаруудад нь хөрөнгө оруулалт хийхээ тодорхойлох юм байна.
Африкийн хувьд аж үйлдвэржилт, хоол хүнсний аюулгүй байдал, олон нийтийн эрүүл мэнд, халдварт өвчнөөс урьдчилэн сэргийлэх зэрэг тулгамдсан асуудлаа шийдэхэд Хятадын хөрөнгө оруулалтыг ихээр авах сонирхолтой байдаг аж. Хятадын хувьд Африкийн дэд бүтэц, тээвэр, эрчим хүчний нийлүүлэлт, барилга бүтээн босголтын салбарт хөрөнгө оруулалт хийхээр зорьж буй юм байна.