“Сэтгэцийн эрүүл мэндийн тулгамдсан асуудал” хэлэлцүүлэг Шинжлэх Ухааны Академийн байранд боллоо. Уг хэлэлцүүлгийг Монголын Анагаах Ухааны Академи болон Сэтгэцийн Эрүүл Мэндийн Үндэсний Төв бусад эрүүл мэндийн байгууллагуудтай хамтран “Монголын хүн ам, өсвөр үеийн сэтгэцийн эрүүл мэндийн тулгамдсан асуудлаар хэлэлцэж, шийдвэрлэх арга замын талаар зөвлөмж боловсруулах” зорилгын дор зохион байгууллаа. Хэлэлцүүлэгт анагаах ухааны доктор, сэтгэцийн эрүүл мэндийн үндэсний төвийн дарга Л.Насанцэнгэл “Донтох эмгэгийн үеийн тусламж үйлчилгээ”, докторант, СЭМҮТ-ийн дэд захирал В.Баярмаа “Өсвөр насныхны сэтгэл хөдлөл, зан үйлийн судалгаа” гэх илтгэлүүдийг тус тус тавилаа. Илтгэлүүдэд дурдаж байгаагаар “Эрүүл мэндийн хичээлийн сургалтын хөтөлбөрт өсвөр насныхныг стрессээ зөв аргаар тайлах ур чадварт сургах талаар оруулах” гэх мэтчилэн өсвөр насныхны сэтгэцийг сургуулийн болон гэр бүлийн орчинд зохицуулах болон эрэгтэйчүүдийн эрт нас баралтыг архи, тамхины донтолттой холбож, түүний хэрэглээ болон гарах арга замын талаар зөвлөж байлаа.
М.МӨНХСАЙХАН