Гар утсаараа зураг авах гэж байгаад амь үрэгдсэн хүний тоо аварга загасанд бариулснаас даруй тав дахин их байдаг тухай Энэтхэгийн “Journal of Family Medicine and Primary Care” сэтгүүлд бичжээ. 2011 оны аравдугаар сараас 2017 оны арваннэгдүгээр сарын хооронд 259 хүн селфидэж байгаад амь үрэгдсэн талаар сэтгүүлд онцолжээ. Гэтэл яг энэ хугацаанд 50 хүн аварга загасны дайралтаас үүдэн амь үрэгдсэн байх жишээтэй.
Эмэгтэйчүүд эрчүүдтэй харьцуулахад селфидэх илүү дуртай ч эмгэнэлтэй статистикаас харах юм бол эрчүүд амь үрэгдэх нь илүү байдаг аж. Тэд живж, өндрөөс унаж, осолд өртөх гэх мэтээр амь насаа алддаг байна. Тиймээс Энэтхэгийн Мумбаи хотноо селфи хийхийг хориглосон 16 бүстэй болжээ. Мөн төмөр замын удирдлага ч аюулын талаар анхааруулгыг байнга гаргадаг гэнэ.