Уул уурхайн сайд Р.Жигжид тус салбарын эрх зүйн орчны шинэчлэл, болон хийж хэрэгжүүлж байгаа томоохон ажлууд, цаашид хийх ажлынхаа талаар мэдээлэл хийж сэтгүүлчдийн асуултад хариуллаа.
Эрх зүйн шинэчлэлийн хүрээнд Хөрөнгө оруулалтын тухай, Түгээмэл тархацтай ашигт малтмалын тухай, Гааль, НӨАТ-аас чөлөөлөх тухай, Газрын тосны тухай, Ашигт малтмалын тухай хуульд нэмэлт өөрчлөлт оруулах тухай зэрэг хуулиудыг УИХ-аар батлуулан мөрдөж байна гэж Уул уурхайн сайд Р.Жигжид хэллээ.
Тодорхой хугацаанд олгогдоогүй байсан хайгуулын тусгай зөвшөөрлийг олгож эхэллээ. Монгол Улсын нутаг дэвсгэрийн 19,9 хувь буюу 31 сая га талбайд ашигт малтмалын тусгай зөвшөөрөл олгохоор шийдвэрлэснээс 20,9 сая га талбайд өргөдлийн журмаар, 10,2 сая га талбайд сонгон шалгаруулалтын журмаар тусгай зөвшөөрөл олгоно. Ашигт малтмалын газар хайгуулын тусгай зөвшөөрөл авах хүсэлтээ ирүүлсэн 956 аж ахуйн нэгжийн өргөдлийг хянан шийдвэрлэсэн байна. Кадастрын хэлтэс энэ оны 1 дүгээр сарын 26-аас эхлэн 16 удаа цахим хэлбэрээр 1686 дугаар олгож, 234 тусгай зөвшөөрлийг олгохоор шийдвэрлэжээ. Энэ оны нэгдүгээр сарын 1-ээс өнөөдрийг хүртэл тусгай зөвшөөрлийн төлбөр 13,2 тэрбум төгрөг, үйлчилгээний хөлсний төлбөр 510 сая төгрөг, хайгуулын тусгай зөвшөөрлийн эрх олгох үйлчилгээний хөлс 531 сая төгрөг, өргөдлийн дугаар олгох цахим системд нэвтрэх эрхийн төлбөр 748 сая төгрөгийг улсын төсөвт төвлөрүүлжээ. Шүүхийн шийдвэрээр тусгай зөвшөөрөл нь хүчингүй болсон ашигт малтмалын хайгуулын болон ашиглалтын 106 талбайд тусгай зөвшөөрөл олгох журмын дагуу 6 удаа 50 талбайд сонгон шалгаруулалт зохион байгуулсан байна.
Оюутолгой төслийн хөрөнгө оруулагч талтай хэлэлцээ хийх эрх бүхий ажлын хэсэг сүүлийн саруудад эрчимтэй ажилласны үр дүнд энэ сарын 18-ны өдөр Оюутолгойн далд уурхайн бүтээн байгуулалт, санхүүжилтийн төлөвлөгөөнд гарын үсэг зурлаа. Ингэснээр төслийн санхүүжилт болон татварын талаарх санал зөрөлдөөнтэй байсан асуудлууд нэгдсэн ойлголтод хүрч, хөрөнгө оруулалтын гэрээний тодорхой бус байсан зарим зүйл заалт тодорхой, ойлгомжтой боллоо. Үүний үр дүнд далд уурхайн бүтээн байгуулалтын ажил цаашид үргэлжлэх нөхцөл бүрдэж, Монгол улсын эдийн засаг дахь гадаад валютын урсгалыг нэмэгдүүлж, хөрөнгө оруулалтыг татах эерэг дохио боллоо гэж Уул уурхайн сайд Р.Жигжид хэллээ гэж Засгийн газрын Хэвлэл мэдээлэл, олон нийттэй харилцах албанаас мэдээллээ.