МАХН-ын дэд дарга С.Ганбаатартай ярилцлаа.
-Өнгөрсөн бямба гаригт О.Баасанхүү гишүүн 1000 төлөөлөгчтэй намынхаа их хурлыг хийлээ. Энэ их хурлаар түүнийг МаХн-ын даргаар сонгосон гэх юм. Энэ ямар учиртай юм бэ?
-Энэ бол тоглоомын жүжиг байлаа. О.Баасанхүү өнөөдөр МАХН дарга болсон гэж өөрийгөө цоллолоо. Маргааш Ардын нам, Ардчилсан намын даргаар өөрийгөө бас цоллоод явхад хэн ч гайхахгүй боллоо. Энэ бол улс төрийн хувьд инээдмийн жүжиг болчихлоо. О.Баасанхүү ийм гунигтай байдалд өөрийгөө оруулсанд харамсаж байна. Хууль бус энэ цуглаанд хууртагдаж хүрэлцэн ирсэн хүмүүст би зөв мэдээлэл өгөх гэж орж уулзсан. Олон хүмүүст ухуулж тэр хурлаас нь гаргасан. Ийм зүйл Монголын улс төрд болон бусад намуудад бүү тохиолдоосой.
-Энэ үйл ажиллагааны урилга МаХн-ын удирдла-гуудад ирсэн үү?
-Урилга огт ирээгүй. Харин урилга өгөөч ээ гэж манай шударга гишүүд, намын удирдлагууд хүссэн. Ц.Оюунбаатар дарга, З.Баянсэлэнгэ, Б.Шаравдорж дарга нар маань төрийн ордонд нэвтрэн орох үнэмлэхтэй байсаар байтал оруулаагүй. Төрийн ордонд цагдаа хүчний байгууллагаар өндөржүүлсэн хамгаалалт гаргуулсан байсан. Ингээд тэд манай намын удирдлагуудын биед нь хүч хэрэглэн ордонд нэвтрүүлээгүй. Ингэж хуралдсан хурал ч гэж юу байхав дээ.
-Танай нам ингэхэд хэдэн гишүүнтэй вэ. О.Баасанхүү гишүүнийг намаасаа хөөсөн гэхээр тэр хурал МАХН-ын албан ёсны хурал биш гэж та хэлж байна уу. Тэдгээр төлөөлөгчдийн шийдвэр хүчин төгөлдөр биш гэж ойлгож болох уу?
-Монгол Улсын ерөнхийлөгчийн сонгуульд миний бие нэр дэвшиж байхад 410 мянган сонгогч санал өгсөн. Тиймээс МАХН 410 мянган гишүүд дэмжигчидтэй гэж боддог. Төрийн ордонд цугларсан 1000 хүн бол манай намын төлөөлөгчид биш. Ардын нам, Ардчилсан нам, исүст итгэгчид байгаа. Цөөн хэд нь МАХН-ын гишүүн байх. Хаа хамаагүй хүмүүс цуглуулж МАХН-ын нэрийн дор хурал зохион байгуулсан. Тэдэнд ямар ч тамгагүй, хууль ёсны эрх бүхий төлөөлөл байхгүй. Энэ бол хүчин төгөлдөр шийдвэр гэхээсээ илүү О.Баасанхүү, Бямбасүрэн гэсэн хоёр хүн МАНАН-гийн олигархиудад захиалгаар төлбөртэйгөөр хийж байгаа жүжиг гэж ойлгож байна
-МАХН-ын албан ёсны дарга нь Н.Энхбаяр хэвээр гэсэн үг үү?
-Тэгэлгүй яахав. МАХН-ын дарга Монгол Улсын гурав дахь Ерөнхийлөгч Н.Энхбаяр байгаа. Манай МАХН хүчирхэг удирдагчтай хүчтэй манлайлагчтай социалдемократ үзэлтэй нам. МАНАН-гийн арга барсан энэ үйлдэл нь хүчтэй удирдагч руу дайрахаар илэрч байна. Тэдэнд ийм хүчтэй удирдагч байхгүй. Харин бид Монгол орныхоо ирээдүй, ард түмнийхээ төлөө олон зүйлийг хийж чадна.
-Ер нь мянган хүнийг хотод авчруулж, зочид буудал, замын унаа, хоол ундаар нь даагаад хурал зохион байгуулна гэдэг зардал өндөртэй. Тэгэхээр О.Баасанхүүгийн цаана хэн нэгэн мөнгөтэй хүн байх талтай гэж нийгэм хараад байх шиг байна. Энэ тал дээр юу хэлэх вэ?
-Ихэнх нь Баянгол зочид буудалд байрласан. Тэнд 160 мянган төгрөг, үнэтэй өрөөнд 200-гаад хүн байрлуулсан. Маш бийлэгжүү төрийн өндөр хамгаалалтанд хийж байгаа явдал нь МАНАН-гийн дээрээс шидсэн олигархийн чулуу гэж ойлгож байна Энэ зэргийн саад бэрхшээлийг даваад гарах тэнхээтэй хэрсүүжсэн нам. ХҮН-ыг тэд өлгийн дотор нь үгүй хийсэн. Харин МАХН бол хүчирхэг гишүүд дэмжигчидтэй лидертэй хүчтэй нам.
-МАХН яагаад ингээд хоёр хуваагдчихав аа. Юунаас болов?
-Энэ бол МАНАН-гийн амьдрах хугацаа нь дуусаж байна гэсэн үг. Тэдний амьдрах арга бол ард түмний итгэлийг авч байгаа МАХН–ыг хуваах хүчгүйдүүлэх явдал тэд нарын амьд гарах гарц боломж гэж харж байна. Гэвч энэ нь талаар болно. Тэдний хүслээр болохгүй.
-О.Баасанхүүг намаасаа хөөчихөөр танай нам Их хуралд суудалгүй болчихож байгаа юм биш үү?
-Одоо бид УИХ-д суудалтай байгаад ямар ашигтай байна. Суудалтай байлаа гээд тэр намаа төлөөлж буй ганц нөхөр нь намынхаа эсрэг, Эрдэнэтийн 49 хувийн эсрэг кноп дараад байж байна шүү дээ. Ийм увайгүй байдлыг таслан зогсоох ёстой. О.Баасанхүү Ерөнхийлөгчийн сонгуулиар 100 хувь миний эсрэг ажилласан. Өнөөдөр МАХН түүнтэй түүнгүй Монголын томоохон нам. Дараагийн сонгуульд бид ялалт байгуулах ард түмнийхээ, иргэдийнхээ итгэлийг даах нам гэж үздэг.
-Дотроо талцаж, намаа ингэж муухай харагдуулж байхаар учир зүйгээ олцгоож болдоггүй юм уу?
-Дотроо талцаж муухай харагдуулахыг МАНАН-гийн бүлэглэлүүдээс захиалгаар О.Баасанхүү, Бямбасүрэн хоёр хийсэн.Үүнийг бид хийгээгүй.Тэдэнтэй ойлголцох боломжгүй. Учир нь тэр хоёр захиалагчдынхаа захиалгыг авсан болохоор өөрийн гэсэн мэдэл толгой байхгүй болсон. Монголын ард түмэн ойлгож байгаа.
-Улс төрийн хүрээнийхэн таныг өмнө “ХҮН-ыг үгүй хийсэн. Одоо МАХН-ыг үгүй хийх гэж байна” гээд байх юм?
-Намайг хаана байна МАНАН-гийнхан дандаа айж байдаг. Тийм учраас ХҮН -ыг бас хүчтэй болно гэж тэд үгүй хийсэн. Одоо МАХН-ыг үгүй хийхээр санаархаж байгаа ч энэ бол хүчтэй тэнхээтэй том нам. Тэд бол биднийг улам хүчирхэг болгож дэмчигчдийг маань улам нягтруулж Монголын ард түмэн ойлгоход анхаарлын төвд оруулж байгаагаа өөрсдөө мэдэхгүй л байна. Муу юмнаас сайн юм үүсдэг гэдэг. Бас сайн юманд садаа мундахгүй ч гэж хэлдэг. Бид сайн зүйл сайхан монголынхоо төлөө тэмцэж байгаа учраас ийм садаа байлгүй яахав. Энэ садааг давах тэнхэл МАХН-ын гишүүд дэмжигч бидэнд бүрэн дүүрэн байгаа гэдэгт итгэлтэй байж болно. Харин 2018 ондоо ямар ч чадамжгүй хүчгүй болсон энэ УИХ-ыг тараахын төлөө бид хүчтэй ажиллана. Одоо бас ямар ч чадамжгүй Засгийн газар байгуулагдчихлаа. Тиймээс бид Засгийн газар болон, УИХ-ыг тараахын төлөө хүчээ төвлөрүүлж ажиллана.