DNN

Дархан цаазат Богдхан уулаас хууль бусаар тарвага агнасан этгээдийг тогтоосон байна.

Тодруулбал, Экологийн цагдаагийн албанаас энэ оны 09 дүгээр сарын 12-ны өдөр дархан цаазат газрын ойн сангийн бүсэд Хуш модны самрыг болц гүйцээгүй үед нь түүж байгаа хууль бус үйл ажиллагааг таслан зогсоох чиглэлээр хийгдсэн хяналт шалгалтын үеэр Налайх дүүргийн иргэн Б нь Тоз-8 маркийн галт зэвсэг ашиглан нэг тарвага агнасан хэргийг илрүүлсэн байна.

Экологийн цагдаагийн албанаас тарваган тахал өвчнөөс урьдчилан сэргийлэх чиглэлээр холбогдох мэргэжлийн байгууллагуудтай хамтран энэ оны наймдугаар сарын 7-ны өдрөөс Улаанбаатар хотыг тойрсон шалган нэвтрүүлэх товчоодод 24 цагаар хяналт шалгалт хийж байна. Өнгөрсөн хугацаанд 30 мянга гаруй тээврийн хэрэгсэлд үзлэг шалгалт хийж 84 зөрчил илрүүлснээс орон нутгийн зорчигч болон ачаа тээврийн үйлчилгээ үзүүлдэг аж ахуй нэгж байгууллагын 10 автобуснаас хууль бусаар агнагдсан байж болзошгүй 33 ширхэг тарваганы эд эрхтнийг Улаанбаатар хот руу нэвтрүүлэхийг завдсан үйлдлийг илрүүлж, холбогдох шалгалтын ажиллагааг явуулж байна.

Хяналт шалгалтаар илэрсэн зөрчлийг дахин давтан гаргуулахгүй байх, иргэдийн амь нас эрүүл мэндийг хамгаалах зорилгоор Авто тээврийн үндэсний төв төрийн өмчит үйлдвэрийн газарт болон гэрээгээр зорчигч тээврийн үйлчилгээ үзүүлдэг Өвөрхангай, Увс, Ховд аймгуудын авто тээврийн төвд гэмт хэрэг, зөрчлийн шалтгаан нөхцөлийг арилгуулах чиглэлээр албан мэдэгдэл өгч, цаашид хууль бусаар агнасан зэрлэг ан амьтан агнасан, барьсан, тэдгээрийн гаралтай түүхий эд зүйлийг хот хоорондын зорчигч тээврийн автобусанд тээвэрлэхгүй байх, удаа дараа зөрчил гаргасан аж ахуй нэгжийн үйл ажиллагааг цуцлуулах хүртэл арга хэмжээ тооцуулахаар ажиллаж байна.

Нийтийн тээврийн үйлчилгээнд явж буй 1100 автобусанд теле камер байршуулсан.

Теле камерын тусламжтай 06:00-22:00 цагийн хооронд авто замын нэгдүгээр эгнээгээр зорчиж буй автомашин болон автобусны буудал дээр түр буюу удаан хугацаагаар зогсож хөдөлгөөнд саад болж буй жолооч нарын зөрчлийг баримтжуулж байна.

Зөрчлийг Замын хөдөлгөөний Удирдлагын Төвөөс Тээврийн цагдаагийн албанд илгээж баталгаажуулснаас зөрчил гаргасан жолоочид хариуцлага тооцож буй. Өнөөдрийн байдлаар зөрчил гаргасан 100 гаруй тээврийн хэрэгсэлд торгууль ногдуулжээ.

Энэ талаар ЗХУТ-ийн Зөрчил бүртгэлийн хэлтсийн дарга Ш.Гантөмөр “Автозамын нэгдүгээр эгнээг чөлөөтэй зорчуулах зорилгоор автобусанд теле камер байршуулж нэгдүгээр эгнээгээр зорчсон тээврийн хэрэгсэлд торгууль ногдуулж байгаа. Есдүгээр сарын 1-ний өдрөөс теле камераар зураг дарж торгууль ногдуулж эхэлсэн. Өнөөдрийн байдлаар нотлох баримт, зургийн шаардлага хангасан 100 гаруй зөрчилд торгуулийн арга хэмжээ аваад байна” гэв.

Багшлах эрхийн гэрчилгээ олгох болон үүнтэй холбогдох үйл ажиллагааны журмыг Хууль зүй, дотоод хэргийн яам Захиргааны хэм хэмжээний актад бүртгэж, эцэслэн батлагдлаа. Энэхүү журам батлагдсанаар гадаад, дотоодын их, дээд сургуулийг амжилттай төгссөн залуусыг богино хугацааны сургалтад хамруулан багшлах эрх олгох замаар чадварлаг боловсон хүчин, хүний нөөц боловсролын салбарт ажиллах боломжийг бүрдүүлж, багшийн хомсдолыг шийдэх боломжтой.

• Математик болон байгалийн шинжлэх ухаан, анагаах ухаан, мэдээлэл харилцаа, технологи, хууль, бизнес, эдийн засаг, урлаг, англи хэлний чиглэлээр дээд боловсролын сургалтын байгууллагыг 2.7-оос доошгүй голч дүнтэй төгссөн, бакалавраас доошгүй зэрэгтэй иргэн;
• Дээрх чиглэлүүдээр магадлан итгэмжлэгдсэн дээд боловсролын сургалтын байгууллагад 2.7-оос доошгүй голч оноотой суралцаж байгаа 3, 4-р түвшний оюутнууд та бүхнийг багшлах эрх олгох сургалтад хамрагдахыг урьж байна.

Цэцэрлэг болон ЕБС-д ажиллах хүсэлтэй иргэнд зориулсан багшлах эрх олгох сургалтыг багш бэлтгэдэг их, дээд сургуульд түшиглэн, мэргэжлийн байгууллагатай хамтарч зохион байгуулна. Мэргэжлийн боловсролын сургууль, политехник коллежид багшлах хүсэлтэй иргэний хувьд чадамжид суурилсан сургалтад хамрагдаж, амжилттай төгссөнөөр багшлах эрхийн гэрчилгээ авна.

Багшлах эрх олгох сургалтын багш нь журамд заасны дагуу боловсролын сургалтын байгууллагад 10-аас доошгүй жил ажилласан туршлагатай, багш мэргэжилтэй байна.

Хөдөлмөрийн баатар, паралимпын аварга У.Сүрэнжавт “Наран” авто худалдааны төвөөс “Toyota Sientra” загварын автомашин бэлэглэж байгаагаа өнгөрсөн сард зарласан.

Тэгвэл өнөөдөр тус байгууллагын зүгээс У.Сүрэнжавт автомашинаа гардуулжээ. Мөн таеквондогийн Үндэсний шигшээ багийн дасгалжуулагч, шинэхэн гавьяат Н.Эрдэнэбаатарт гурван сая төгрөгөөр урамшуулсан байна.

Тус байгууллагын төлөөлөл “Манай худалдааны төв байгуулагдаад гурван жил болж буй. Хамт олны маань 90 орчим хувь нь залуучууд байдаг тул тэдэнд сайн үлгэр дуурайлал үзүүлсэн У.Сүрэнжавтаа машин бэлэглэх шийдвэр гаргасан юм” гэж онцоллоо.

Энэ үеэр дасгалжуулагч Н.Эрдэнэбаатараас сэтгэгдлийг нь сонсоход “Өчигдөрхөн манай тамирчдын амжилтыг төр засаг маань өндрөөр үнэлж, шавь маань Хөдөлмөрийн баатар цол хүртсэн. Мөн би гавьяат дасгалжуулагч боллоо. Манай тамирчдад сэтгэлийн урам өгч, тамирчдын маань хөлс, хөдөлмөрийг өндрөөр үнэлж байгаад баяртай байна” гэв.

Улсын нийт гадаад өр 2024 оны эхний хагас жилд 34.9 тэрбум ам.доллар болж, өмнөх оны мөн үеэс 1.8 (5.4%) тэрбум ам.доллароор өсөж, өмнөх улирлаас 135.6 (0.4%) сая ам.доллароор буурсан байна.

2024 оны эхний хагас жилд Улсын нийт гадаад өр өмнөх оны мөн үеэс өсөхөд шууд хөрөнгө оруулалт, компани хоорондын зээллэг 2.4 (17.5%) тэрбум ам.доллароор өссөн нь нөлөөлсөн байна.

Харин Төв банкны гадаад өр 868.6 (43.9%) сая ам.доллароор буурчээ. Нийт гадаад өрийн 16.3(46.7%) тэрбум ам.доллар нь шууд хөрөнгө оруулалт, компани хоорондын зээллэг, 7.6 (21.8%) тэрбум ам.доллар нь Засгийн газрынх, 1.8 (5.3%) тэрбум ам.доллар нь Төв банкнаас бусад хадгаламжийн байгууллагынх, 1.1 (3.2%) тэрбум ам.доллар нь Төв банкных, 8.0 (23.0%) тэрбум ам.доллар нь бусад салбарынх байна.