Нийслэлийн Аялал жуулчлалын газраас Монгол үндэсний хоол, хүнс болон олон үндэсний хоолны соёлыг гадаад, дотоодын иргэд, жуулчдад сурталчлан таниулах зорилгоор “UB FOOD FESTIVAL” арга хэмжээг жил бүр уламжлал болгон зохион байгуулдаг.
Энэ жилийн “UB FOOD FESTIVAL” 2024 оны наймдугаар сарын 23, 24, 25-ны өдрүүдэд жанжин Д.Сүхбаатарын талбайд болно.
Өнөөдөр 17:00 цагаас эх орноо төлөөлөн Олимпийн чөлөөт бөхийн дэвжээнд авхаалж самбаа, хурд хүчээ сорин өрсөлдөх П.Орхон, М.Лхагвагэрэл нарын тэмцээн эхэлнэ.
П.Орхоны эхний учраа Украины тамирчин Ирина Колиаденко, М.Лхагвагэрэлийн эхний учраа НУ-ын тамирчин Паррис Масон Марк юм.
Монгол Улсын Их Хурлын Тамгын газраас шинээр сонгогдсон Улсын Их Хурлын гишүүдэд зориулсан мэдээлэл, сургалт зохион байгууллаа.
Энэ удаагийн парламент нь Улсын Их Хурлын ес дэх удаагийн сонгуульд төрийн эрх барих дээд байгууллагад ард түмнээ төлөөлөхөөр улс төрийн таван нам, эвсэл суудал авч, мэргэжлийн хуульч, эдийн засагч, инженер, багш, эрдэмтэд зэрэг нийгмийн олон бүлгийн төлөөллөөс бүрдсэн анхны 126 гишүүнтэй гэдгээрээ онцлогтой юм.
Шинэ гишүүдэд зориулсан сургалтад Монгол Улсын Их Хурлын дарга Д.Амарбаясгалан үг хэлэв. Тэрбээр, “Улсын Их Хурал олон нийтийн төлөөллийг бүрэн хангадаг, олон нийт нь хүлээн зөвшөөрдөг, гишүүд нь олон нийтийнхээ төлөө ажиллаж чаддаг парламент байх ёстой. Парламентын засаглалыг бүрдүүлж байгаа улс төрийн намууд өөрөө институц болж чадсан үед улс төрийн намуудыг дэмжих, цаашдаа төрийн бодлогод өөрсдийн хүч оролцоо, бодлого, хөтөлбөрийг оруулж чаддаг тогтолцоог бий болгох нь чухал” гэв.
Мөн тэрбээр “1992 оны Үндсэн хуулиар тунхагласан зарчим, үзэл санааны дагуу хууль тогтоомжийг шинэ Үндсэн хуульд нийцүүлэх, боловсронгуй болгох үйл явц үргэлжилж, өнөөдрийн байдлаар Монгол Улсад Улсын Их Хурлаас баталсан 880 хууль хүчин төгөлдөр үйлчилж байна. Эдгээрийн 437 нь нийгмийн олон талт харилцааг зохицуулдаг, заавал биелэгдэх шинжтэй, байнгын үйлчлэлтэй байгаа бол бусад 443 хууль нь тодорхой хугацаанд үйлчлэхээр заасан, нэг удаагийн шинжтэй байна. Нөгөөтээгүүр, зарим хуулийг батлахдаа дагаж мөрдөх журмын тухай хуулиар зохицуулалт хийх, хуулийг ерөнхий байдлаар баталж, албан тушаалтны өнгө үзэмжээр боловсруулан батлан мөрдүүлдгээс үүдэн хүнд суртал, давхардал, хийдэл, чирэгдэл бий болох, авлига, албан тушаал, ашиг сонирхлын зөрчил ч гарах нөхцөлийг бүрдүүлээд байна. Өнөөдрийн байдлаар захиргааны хэм хэмжээний актын бүртгэлд бүртгэлтэй 2500 орчим журмаар төр-иргэний харилцааг зохицуулж байна. Хуулиас давсан журам нь иргэдэд хүндрэл чирэгдэл үүсдэг” гэдгийг онцлон тэмдэглэлээ.
Цаашид улс төрийн намуудын үзэл баримтлал, суудлын тооноос үл хамаарч, эв нэгдлийг хангаж, эн тэргүүнд эх орон, ард түмнийхээ язгуур эрх ашгийг дээдэлж, Үндсэн хуулийг сахиж, хуулийн болон цаг хугацааны хоцрогдолд нэн шаардлагатай шинэчлэл хийхэд гишүүн бүр өөрийн мэргэжил, мэргэшсэн салбартаа хуулийн шинэчлэл хийж, гар бие оролцохыг уриалаад ирэх дөрвөн жилд төрийн эрх барих их үйлсэд нь амжилт хүслээ.
Тус сургалтаар Улсын Их Хурлын Ерөнхий нарийн бичгийн дарга Б.Баасандорж “Монгол Улсын Их Хурлын тухай хууль, Улсын Их Хурлын гишүүний бүрэн эрх, ёс зүйн хэм хэмжээ”, Улсын Их Хурлын Тамгын газрын Тэргүүн дэд дарга Ч.Ариунхур “Монгол Улсын Их Хурлын чуулганы хуралдааны дэгийн тухай хууль”, Улсын Их Хурлын Тамгын газрын Эрх зүйн дүн шинжилгээний хэлтсийн ахлах зөвлөх Ж.Бямбадулам “Монгол Улсын Их Хурлын хяналт шалгалтын тухай хууль”, Санхүү, хангамж үйлчилгээний хэлтсийн дарга Б.Лхагвасүрэн “Улсын Их Хурлын гишүүний төсөв, хангамж”, МУИС-ийн профессор, доктор Д.Бумдарь “Парламентын мөн чанар, лобби”, Төрийн ордны хамгаалалтын хэлтсийн орлогч дарга Т.Тамир “Төрийн ордны хамгаалалт, эрх зүйн байдал” сэдвээр тус тус мэдээлэл, танилцуулга хийж, гишүүдийн асуултад хариулав.
Түүнчлэн Үндэсний аюулгүй байдал, Авлигатай тэмцэх газар, Тагнуулын ерөнхий газар, Гадаад харилцааны яамны албан тушаалтнууд холбогдох мэдээллийг өглөө хэмээн Улсын Их Хурлын Хэвлэл мэдээлэл, олон нийттэй харилцах газраас мэдээлэв.
Сонгинохайрхан дүүргийн 20 дугаар хороонд орон сууцны хороолол дунд болон өрхийн хэрэглээний 0,07 га газраа зориулалтын бусаар ашиглаж, хоёрдогч түүхий эд цуглуулан, машины сэлбэг борлуулж буй иргэдэд шаардлага хүргүүлэн, зөрчлийг арилгуулахаар нийслэлийн Засаг дарга бөгөөд Улаанбаатар хотын Захирагч Х.Нямбаатар холбогдох албаныхантай хамт тухайн байршилд ажиллалаа.
Тодруулбал, орон сууцны хороолол дунд иргэн Д.Батсайхан худалдаа, нийтийн үйлчилгээний зориулалтаар анх газраа өмчилж байсан. Гэвч 2003 оноос хойш газраа зориулалтын бусаар ашиглаж, хоёрдогч түүхий эд цуглуулан, машины сэлбэг борлуулсаар өдийг хүржээ. Иймд тухайн иргэнд шаардлага хүргүүлж, зөрчлөө арилгах 30 хоногийн хугацаа өгөв.
Мөн Нарангийн энгэрийн төвлөрсөн хогийн цэг явах зам дагуу өрхийн хэрэглээний газар дээрээ буюу суурьшлын бүсэд хоёрдогч түүхий эд худалдан авдаг хэд хэдэн цэг бий. Эдгээр байршилд 2024 оны дөрөвдүгээр сарын 19-ний өдөр Байгаль орчны хяналтын Улсын байцаагч нөлөөллийн үнэлгээ, шинжилгээ хийсэн. Шинжилгээгээр хөрсөнд агуулагдах бохирдуулах бодисын зөвшөөрөгдөх хэмжээнээс давсан, стандартын шаардлага хангахгүй байна гэсэн дүгнэлт гарсан юм. Иймээс бусад оршин суугчдын эрүүл, аюулгүй орчинд амьдрах эрхийг хангах үүднээс газраа зориулалтын бусаар ашиглан, хоёрдогч түүхий эд худалдан авах цэг байгуулж, байгаль орчинд сөрөг нөлөө үзүүлж буй иргэдтэй зөвшилцөн, байршлыг шилжүүлэх ажлыг зохион байгуулахаар боллоо.
Энэ үеэр хотын дарга Х.Нямбаатар “Өмчилсөн газраа зориулалтын дагуу ашиглах хэрэгтэй. Нийтийн орон сууцны хороолол дунд бусдын амгалан тайван байдлыг алдагдуулж, мөн гэр хороололд байгаль орчинд сөрөг нөлөө үзүүлсэн энэ мэт зүй бус үйл ажиллагаа явуулж болохгүй. Иймд Сонгинохайрхан дүүрэгт энэ чиглэлийн үйл ажиллагаа явуулж буй иргэд, аж ахуйн нэгжүүдийг Нарангийн энгэрийн төвлөрсөн хогийн цэгийн хашаанд, Баянзүрх дүүрэгт үйл ажиллагаа явуулж буй иргэд, аж ахуйн нэгжүүдийг Цагаан давааны хогийн цэгийн хашаанд төвлөрүүлэх ажлыг зохион байгуулна. Цаашид суурьшлын бүсэд энэ мэт газраа зориулалтын бусаар ашиглаж, бусад оршин суугчид болон, байгаль орчинд сөрөг нөлөө үзүүлдэг байдлыг зогсооно” гэв.
Ардчилсан намаас ерөнхийлөгчийн сонгуульд нэр дэвшигч, АНУ-ын дэд ерөнхийлөгч Камала Харрис өөрийн хамтрагчаар сонгосон, дэд ерөнхийлөгчид нэр дэвшээд буй Миннесота мужийн амбан захирагч Тимоти Уолз анх удаа сонгуулийн сурталчилгааны цуглаан дээр гарч ирэн олон нийтэд хандан үг хэлэв. Ерөөс АНУ-ын ерөнхийлөгчийн сонгуульд дэд ерөнхийлөгчид нэр дэвшигч нь эсрэг талын ерөнхийлөгчид нэр дэвшигч рүү дайрах “зуудаг нохой”-ны үүрэг гүйцэтгэдэг бичигдээгүй хууль үйлчилдэг байсан билээ. Гэтэл Дональд Трамп өөрөө “зуудаг нохой”-ны үүрэг гүйцэтгэх болсон юм. Харин энэ үүргийг Тимоти Уолз чадварлагаар буцаан авчирч буй нь тодорхой болов.
Уолз Пенсильвани мужийн Филадельфи хотод сонгуулийн сурталчилгааны цуглаан дээр хэлсэн үгэндээ Бүгд найрамдах намаас ерөнхийлөгчийн албан тушаалд нэр дэвшигч Дональд Трампыг хатуу шүүмжилж, түүнийг манай улсад эмх замбараагүй байдал, хуваагдал бий болгож байна гэж мэдэгджээ. Тэрээр мөн “Трамп өөртөө үйлчлэхэд хэтэрхий их цаг зарцуулан завгүй байдаг тул үндэстэнд үйлчлэх гэж яг юу гэсэн үг болохыг огт мэддэггүй. Тэр ааваасаа бэлэн хөрөнгө өвлөж авсан учир шударгаар хөдөлмөрлөж сайн сайхан амьдрах гэж юу болохыг огт ойлгодоггүй. Тэр цэрэгт алба хааж байгаагүй учир батлан хамгаалах гэж юу байдаг талаар ямар ч мэдлэггүй байдаг. Иймээс Трамп Цагаан ордны тэргүүнээр ажиллаж байх хугацаандаа манай улсыг эдийн засаг, гадаад бодлого гээд бүх талаар сүйрэлд хүргэсэн. Тэр Америкийн хөдөө нутгийг сүйтгэж, ард түмнийг хоёр хувааж талцуулсан” гэж хэлжээ. Ардчилсан намын дэд ерөнхийлөгчид нэр дэвшигч нэмж, “Бүгд найрамдах намаас ерөнхийлөгч болсон Дональд Трампын үед АНУ-д хүчирхийллийн гэмт хэрэг нэмэгдсэн бөгөөд үүнд Трампын өөрийнх нь үйлдсэн гэмт хэрэг ч нэмэр болсон” гэж хэлсэн нь олон нийтийн сүлжээнд шуугиан тариад байна.
Тимоти Уолз мөн Ардчилсан намын сонгуулийн кампанит ажил нь Дональд Трампын эсрэг тэмцэл биш гэдгийг онцолж “Бидний энэхүү сонгуулийн кампанит ажил бол АНУ-ын иргэдийн ирээдүйн төлөөх тэмцэл” гээд “Харрис болон түүний хамтрагчид үндэсний эрх чөлөө, иргэд, бүрэн хамгаалагдсан тэдний ирээдүйн төлөө тэмцэж байна” гэж үгээ дуусгажээ.
Америкийн Миннесота мужийн захирагч Тимоти Уолз 1964 оны дөрөвдүгээр сарын 6-нд Небраска мужийн Вест Пойнт гэх жижиг хотод төрсөн. Тэрээр 1989 онд Небраска мужийн Чадрон коллежийг нийгмийн ухааны багш мэргэжлээр төгссөний дараа 2001 онд Миннесота мужийн их сургуулийг төгсөж, шинжлэх ухааны магистрын зэрэг хамгаалсан. Бас Миннесота дахь Гэгээн Мэригийн их сургуульд мэргэжил дээшлүүлсэн байна. Уолз 1982 оноос АНУ-ын армийн үндэсний гвардид нэгдэн, 1989-1990 онд АНУ-ын Харвардын их сургуулийн анхны америк багш нарын бүрэлдэхүүнд багтаж, Хятадын ахлах сургуульд багшилжээ. Хятадаас буцаж ирээд Небраскагийн ахлах сургуульд дахин багшилсан байна. 1996 онд тэрээр ирээдүйн эхнэр Гвенийн хамт Миннесота мужийн төвд суурьшжээ. Дараагийн 10 жилийн хугацаанд Тимоти Уолз ахлах сургуульд багш, хөлбөмбөгийн дасгалжуулагч хийж байв. Уолз АНУ-ын Төлөөлөгчдийн танхимын сонгуульд 2006 онд анх ялалт байгуулжээ. Дараа нь дахин таван удаа сонгогдсон байна. Тэрээр хөдөө аж ахуй, зэвсэгт хүчин, ахмад дайчдын асуудал эрхэлсэн хорооны гишүүнээр ажиллажээ. Харин 2018 онд тэрээр Миннесота мужийн 41 дэх амбан захирагчаар сонгогдож, 2022 онд дахин сонгогдсон. Энэ хугацаанд сурагчдыг сургуульд нь үнэ төлбөргүй хооллох, иргэний нөхөн үржихүйн эрх чөлөөг хамгаалах, сонгох эрхийг бэхжүүлэх, Миннесота мужийг 2040 он гэхэд 100 хувь цэвэр “ногоон” цахилгаанд шилжүүлэх үндэс суурийг тавих, дундаж давхаргын татварыг бууруулах, муж улсдаа ажилчдын цалинтай амралтыг өргөжүүлэх зэрэг ажлыг хэрэгжүүлжээ.
Тимоти Уолз 2022 онд “Орос Украинд дайн явуулж байна” гэж удаа дараа Путиныг шүүмжилж 2022 оны гуравдугаар сард засгийн газрын байгууллагууд Оросын хуулийн этгээдтэй байгуулсан гэрээг цуцлах захиргааны тогтоолд гарын үсэг зурж, цаашид гэрээ байгуулахаас татгалзахыг шаардан үүнээс нэг сарын дараа Оросын засгийн газрын хөрөнгө оруулалтыг зогсоох тухай хуульд гарын үсэг зурав. Мөн тэрээр тус муж болон Украины Чернигов мужийн хооронд түншлэлийн харилцаа тогтоож, 2023 онд Зеленскийтэй цахимаар ярилцахад оролцож, “Украиныг эргэж буцахгүй дэмжих болно” гэж мэдэгдэж байв.
Миннесота муж нь сонгуулийн төлөөлөгчдийн 10-хан саналтай байдаг учир сонгуульд нэг их нөлөө үзүүлэхгүй. Гэвч Ардчилсан нам Тимоти Уолзыг өөрийн мужаасаа гадна бусад мужийн хөдөө орон нутгийн сонгогчдыг татаж чадна гэж үзэн дэд ерөнхийлөгчид нэр дэвшүүлээд байгаа юм. Тэрээр Америкийн “MSNBC” телевизийн сувагт ярилцлага өгөхдөө Бүгд найрамдахчуудаас сонгогдсон Трамп, Вэнс хоёрыг “хачирхалтай хос” гэж нэрлэсэн нь олны анхааралд орж, түүний энэ шинэ нэршил интернэтэд тун хурдан тарж, Харрисын сурталчилгааны багийнхан үүнийг олон нийтэд зориулсан хэвлэлийн мэдээ, мэдээлэлд өргөнөөр ашиглах болжээ. Хамгийн гол нь энэ нэршилийнхээ ачаар Тимоти Уолз маш хурдан хугацаанд олон нийтэд танил болж, сонгогчид намтрыг нь сонирхож эхэлсэн байна. Тиймээс Пенсильванийн Хуулийн Их Сургуулийн улс төрийн шинжлэх ухааны профессор Кэри Коглианез “Тимоти Уолз бол АНУ-ын ерөнхийлөгчийн сонгуульд нэр дэвшигч Камала Харрисын хамгийн аюулгүй, ухаалаг хамтрагч мөн бөгөөд тэрээр цэргийн болон хөдөөгийн амьдралыг сайн мэдэх учир Ардчилсан намд ирэх сонгогчдын саналыг нэмэгдүүлж чадна” гэж хэлсэн биз ээ. Мөн Ардчилсан намаас дэд ерөнхийлөгчид нэр дэвшсэн Тимоти Уолзыг сонгуулийн сурталчилгааны цуглаан дээр анх удаа үг хэлсний дараа Америкийн судалгааны компаниуд бүх нийтийн буюу бүх мужийг хамарсан 18 санал асуулга явуулахад 17-д нь Камала Харрис ялж, нэгд нь Харрис, Трамп хоёр тэнцсэн дүн гарчээ.
Цэцэрлэгийн бүртгэлийг энэ сарын 1-нээс эхлэн E-Mongolia системээр дамжуулан хүлээж авч эхэлсэн.
Одоогоор нийслэлийн хэмжээнд 142,150 хүүхэд цэцэрлэгт хамрагдахаас 59 хувь нь хүсэлтээ амжилттай илгээжээ. Бүртгэлийн эхний шат наймдугаар сарын 18-нд дуусна.
Иймд эцэг эхчүүдийг хүүхдийнхээ бүртгэлийг амжиж хийлгэхийг албаныхан анхаарууллаа.
Улсын их дэлгүүрийн зүүн талын явган хүний гарцын ус зайлуулах хуванцар хоолойг тасалж, эвдэлсний улмаас лаг хагшаасаар дүүрч, борооны ус тогтоод байсан юм. Тэгвэл эвдэрсэн хуванцар хоолойг ган хоолойгоор солилоо.
Засгийн газрын 2024 оны 188 дугаар тогтоолоор импортын цементийн гаалийн албан татварыг 20 хувиас таван хувь болгож бууруулсантай холбогдуулж импортын албаны чанар, аюулгүй байдалд шалгалт хийжээ. Энэ талаар өчигдөр Хот байгуулалт барилга орон сууцжуулалтын яамны Барилгын материалын хэлтсийн дарга Б.Батзориг сэтгүүлчдэд мэдээлэл өглөө.
Тэрээр “Шалгалтын ажлын хэсэг барилгын материалын “44” зах дээр худалдаалагдаж буй БНХАУ-ын импортын цементэд таван аж ахуйн нэгжийн зургаан дээжийг “Намнан индастри” ХХК-ийн сорилтын лабораторид физик механик үзүүлэлтийг тодорхойлуулах шинжилгээнд хамруулсан. Дээжүүдээс гурван дээжийн шахалтын бат бэх нь 42.5 МПа байхаас 42 МПа, 39.9 МПа, 41.5 МПа гарч байгаа нь холбогдох стандартад заасны дагуу хүлцэх алдаа буюу (бага зэргийн согог, стандартын шаардлагаас байж болох хэлбэлзэл)-ийн дагуу 40 МПа байж болохоор заасан бөгөөд 39.9 МПа гарсан нэг дээж шаардлага хангаагүй байна.Орон сууц, олон нийт, үйлдвэрийн зориулалттай барилгын үндсэн бүтэц, бетон зам, хучилт, өргийн ажил, заслын ажил, суурь, далан суваг, усны хоолой, хамгаалалтын түшиц хана, бетон ба төмөр бетон эдлэл, бетон зуурмаг үйлдвэрлэхэд цементийг орц нормын дагуу хэрэглэдэг бөгөөд чанарын шаардлага хангаагүй цементийг ашиглах нь газар хөдлөлтийн идэвхжил их байгаа энэ үед олон эрсдэл дагуулдаг гэдгийг онцгой анхаарах хэрэгтэй” гэв.
Хүмүүс ихэвчлэн үнэ харж сонголт хийдэг. Цемент нь таван төрлийн тэмдэглэгээтэй байдгаас PS 42.5, PS 52.5, OPC 42.5 портланд цементийг түлхүү ашигладаг. PS 42.5 нь бетон зуурмаг, эдлэл, угсармал хийц эдлэлүүдэд, PS 52.5 төмөр замын дэр бетон, цахилгаан шонгийн тулгуур гэх мэт томоохон эдлэлүүдэд, OPC 42.5 хамгийн өргөн хэрэглэгддэг юм байна. Нэг шуудай цемент 50 кг байх ёстой. Стандартад 50 кг тутамд нэг кг-ын хүлцэх алдаа байж болно гэсэн заалттай ажээ.
Энэ тухай Хот байгуулалт барилга орон сууцжуулалтын яамны Барилгын материалын хэлтсийн дарга Б.Батзориг “Бодит байдал дээр 27,28 кг байх нь элбэг тохиолддог тул иргэд худалдан авалт хийхдээ анхаарах хэрэгтэй. Тус стандартад цементийг хураахдаа өөр төрлийн цементүүдийг холихыг хориглоно, газраас хөндийрүүлсэн подонтой түүнээс дээш 1,8 метрт давхарлаж хураана гэж заасан байдаг. Гэсэн хэдий ч худалдаалж буй аж ахуйн нэгжүүд цементийн төрлүүдийг хольж, хоёр дахин өндөртэй хурааж стандартыг зөрчиж байна. Гурвалжингийн гүүрний барилгын зах дээр гэхэд хадгалалтын горимыг зөрчсөн байдалтай байна. Энэ бол ноцтой асуудал. Тиймээс Хот байгуулалт, барилга, орон сууцжуулалтын яам, Нийслэлийн хяналт шалгалтын газар, Барилгын хөгжлийн төв болон холбогдох мэргэжлийн ТББ хамтраад хяналт, шалгалтын ажлыг тогтмол явуулж байгаа. Цаашлаад импортын цементээс гадна дотоодын аж ахуйн нэгж, байгууллагын чанар, стандартыг шалгах тал руу илүү чиглэж ажиллана” хэмээв.
Түүнчлэн гаалийн татварыг таван хувь болгож бууруулсан талаар тэрбээр “Засгийн газрын тогтоолоор албан татварын хөнгөлөлт аравдугаар сарын 31 хүртэлх хугацаанд үйлчлээд арваннэгдүгээр сарын 1-нээс эхлээд буцаад 20 хувь болж хэрэгжинэ. Энэ нь дотоодынхоо үйлдвэрлэлийг хамгаалах, дэмжих бодлого юм” гэсэн юм.
Энэ үеэр Нийслэлийн хяналт шалгалтын газрын Барилгын техникийн хяналтын улсын байцаагч С.Мөнхцэлмэг “Хяналт шалгалтаар илэрсэн дутагдлуудыг дурдъя. Импортоор оруулж ирсэн цементүүд гарал үүслийн гэрчилгээ, лабораторийн шинжилгээний бичиг, чанарын гэрчилгээнүүд байхгүй тохиолдол илэрсэн. Тухайн аж ахуйн нэгжүүдээс асуухад гаалийн бүрдүүлэлт хийхэд нэг хүн дээр төвлөрсөн гээд зөвхөн гарал үүслийн гэрчилгээ гаалийн бүрдүүлэлт хийхэд ашигладаг гэж ойлгогдож байгаа.Импортоор ирж буй ямарваа нэгэн барилгын материалыг дагалдан ирж буй чанарын гэрчилгээ болон чанарын паспорт дээр цемент хэзээ үйлдвэрлэсэн, ямар маркийн цемент байгаа нь, он сар, хэзээ ачигдсан бэ гэх зэрэг маш чухал мэдээллүүд агуулагдаж байдаг. Гэтэл тэр мэдээллүүдийг зөвхөн гаалийн бүрдүүлэлтэд ашиглаж байгаа бол харамсалтай. Цемент нь үйлдвэрлэснээс хойш гурван сарын дараа тодорхой бат бэхээ алддаг. Тийм учраас чухал мэдээллүүд чанарын паспорт, гарал үүслийн гэрчилгээн дээр заавал бичигдсэн байх ёстой. Түүнийг худалдан борлуулж буй цэг дээр аж ахуйн нэгжүүд өөрсдөө иргэдэд ил тод өгч байх. Мөн худалдан авч буй хүмүүс шаардаж байх ёстой” гэв.
Нэмж дурдахад, манай улс 2020 онд импортоор 157.9 мян.тн цемент авч байсан бол 2023 онд 255 мян.тн болж нэмэгджээ. Харин 2024 оны наймдугаар сарын байдлаар 146 мян.тн цемент импортоор оруулж ирээд байна.
“Нүүдэлчин” дэлхийн соёлын фестивалийг 2024 оны наймдугаар сарын 16-18-ны өдрүүдэд Улаанбаатар хотын Налайх дүүргийн нутаг дэвсгэрт орших “Тайж хайрхан”-ы бэлд зохион байгуулна.
Фестивалийн үеэр Сүхбаатарын талбай-“Тайж хайрхан”-ы бэл гэсэн чиглэлд нийтийн тээвэр үйлчлэх юм.
Эрүүл мэндийн яамнаас улаанбурхан өвчний нөхцөл байдал, Монгол Улсад тохиолдол бүртгэгдсэнтэй холбогдуулан авч хэрэгжүүлж буй болон цаашид шаардлагатай хариу арга хэмжээний талаар мэдээлэл өгөх цахим сургалтыг өнөөдөр /2024-08-08/ зохион байгууллаа.
Улаанбурхан өвчний эхний тохиолдол энэ оны долдугаар сарын 31-ны өдөр батлагдсанаас хойш өнөөдрийн байдлаар зөөвөрлөгдсөн 2, дотоодын 2 тохиолдол бүртгэгдээд байна. Иймд ЭМЯ-наас яаралтай хариу арга хэмжээг бүх шатанд авч хэрэгжүүлж байгаа юм.
Улаанбурхан өвчний сэжигтэй тохиолдол илэрсэн үед өрх, сумын эмч нарын нэн даруй авах арга хэмжээний талаар ХӨСҮТ-ийн тархвар судлаач Б.Соёлмаа, жирэмсэн эмэгтэйд А витамин урьдчилан сэргийлэх тунгаар өгөх зөвлөмжийг Эх барих, эмэгтэйчүүд судлалын мэргэжлийн салбар зөвлөлийн Ерөнхий мэргэжилтэн Д.Мөнхцэцэг, хүүхдэд А витамин урьдчилан сэргийлэх тунгаар өгөх зөвлөмжийг ЭХЭМҮТ-ийн Чанарын албаны дарга А.Оюунчимэг өгөв.