Монгол банк өнөөдөр хуваарь ёсоороо гадаад валютын дуудлага худалдаа зохион байгууллаа. Дуудлага худалдаагаар банкууд ам.доллар, юань худалдан авах санал ирүүлжээ. Монгол банк 20 сая ам.долларыг 1820.15 төгрөгийн хаалтын ханшаар, 46.5 сая юанийг 292 төгрөгийн хаалтын ханшаар тус тус худалдаалсан байна. Мөн өдрийн ээлжит гадаад валютын своп, форвард хэлцлээр банкууд 63 сая ам.доллар худалдан авах төгрөгийн своп хэлцэл байгуулах санал ирүүлж, Монголбанк саналыг 100 хувь биелүүлэн, гадаад валютын дотоодын захад 63 сая ам.доллар нийлүүлсэн байна.
Categories
Алтанбулагийн чөлөөт бүсэд ОХУ-ын иргэд визгүй, бусад орны иргэд 10 хоногийн хугацаатай дамжин өнгөрөх визтэйгээр зорчих болжээ. Ирэх зургадугаар сарын 22-нд худалдааны бүс нээлтээ хийхээр болсон байна. Чөлөөт бүс ашиглалтад орсноор 2015 он гэхэд 100 тэрбум ам.доллар манай улсын эдийн засагт эргэлтэд орох боломж бүрдэх аж. Энэ мөнгөний таван хувийг эх орондоо авч үлдэхэд л валютын нөөцөд эерэгээр нөлөөлөх аж. 
“Монголын сурагчдын дүрэмт хувцас үйлдвэрлэгчдийн холбоо”-ноос Ерөнхий сайд Н.Алтанхуягт ханджээ. Тус холбоо сурагчдын дүрэмт хувцсыг хэчнээн компани оёж байгаа, хэдэн ширхэгийг үйлдвэрлэж нийлүүлсэн, өртөг зардал, үнийн бүтцийг ил болгохыг гүйцэтгэх засаглалын тэргүүнээс хүссэн байна. Уг ил захидалд “Шинэчлэлийн тодотголтой Засгийн газар байгуулагдсаныг “Монголын сурагчдын дүрэмт хувцасны оёдлын холбоо” анхнаас нь дэмжсээр ирсэн, цаашид ч дэмжихэд бэлэн байна. Гэхдээ өнгөрсөн оноос эхлэн сурагчийн дүрэмт хувцасны үйлдвэрлэлд төр оролцож ихээхэн хэмжээний херөнгө зарсан нь өнөөдөр ямар үр дүн өгснийг асуух эрх бидэнд бий.
АН-ын бүлгээс мэдээлэл хийлээ. Тус бүлэг хуралдаанаараа гурван асуудлыг хэлэлцжээ. Бүлгийн зүгээс Ерөнхий сайдаас мэдээлэл сонсож, цаашид хийх ажлуудад нь чиг үүрэг өгсөн байна. Мөн “Монгол банк”-ны мэдээллийг сонссон байна. 
Эдийн засгийн байнгын хороогоор өчигдөр Компанийн тухай хуульд нэмэлт, өөрчлөлт оруулах тухай хуулийн төслийн анхны хэлэлцүүлгийг хийж дэмжлээ. Гэвч дүгнэлтийг нь нэгдсэн чуулганд танилцуулах гишүүн олдсонгүй. Байнгын хорооны дарга Б.Гарамгайбаатар Д.Зоригт гишүүн рүү “Та унших уу” гэхэд “үгүй, үгүй” хэмээн толгой сэгсэрч харагдав. Цаашлаад Г.Уянга, С.Ганбаатар, Х.Болорчулуун, Д.Батцогт, Д,Тэрбишдагва гээд олон гишүүн байвч бүгд “зугтаж” байлаа. Тиймээс нөгөө танхимд Хүний эрхийн дэд хорооны хуралдаан удирдаад ирж чадаагүй Д.Ганбат гишүүнээр дүгнэлтээ уншуулахаар болоод тарлаа. Үүнээс өмнөхөн тэд “Монгол Улсын эдийн засаг, нийгмийг 2015 онд хөгжүүлэх Үндсэн чиглэлийг батлах тухай” УИХ-ын тогтоолын төслийг хэлэлцүүлэгт бэлтгэх үүрэгтэй байнгын хорооны ажлын хэсгийн ахлагчаар ажиллах гишүүн олдоогүй тул эзгүй байсан Г.Батхүү гишүүнийг нэгэн дуугаар сонгосон билээ. 
НИТХ-ын Тэргүүлэгчдийн ээлжит хурлаар хэлэлцэх эхний асуудал хатаж ширгэхдээ тулаад буй Улиастайн голын эхийг нийслэлийн тусгай хамгаалалтад авах тухай байлаа. 
УИХ-ын Хууль зүйн байнгын хорооны хуралдаанаар өнөөдөр Гэмт хэргийн тухай хуулийн төслийг хэлэлцлээ. Хуулийн төслийн танилцуулгыг Хууль зүйн сайд Х.Тэмүүжин хийлээ. Монгол Улсын эрүүгийн хариуцлагын тогтолцоонд хорих ял дийлэнх хувийг эзэлдэг аж. Тухайлбал, Шүүхийн 2011 оны шүүн таслах ажиллагааны нэгдсэн мэдээгээр нийт ялын дотор хорих ялын эзлэх хувь 77.4 хувь, нийтэд тустай ажил хийлгэх нь 5.8 хувь, баривчлах ял 12.5 хувь, бусад ял 0.1 хувийг эзэлж байсан бол 2012 оны мэдээгээр нийт ялын дотор хорих ялын эзлэх хувь 77.6 хувь, нийтэд тустай ажил хийлгэх 5.7 хувь, баривчлах ял 11.6 хувь, бусад ял 5.1 хувийг эзэлж байна гэсэн судалгаа гарчээ. Мөн хорих ял эдлээд суллагдсан иргэдийн 47 орчим хувь нь дахин гэмт хэрэг үйлдэж, ял шийтгүүлсэн байна. Тиймээс Гэмт хэргийн тухай хуульд торгох ялыг оруулж, нэг зуугаас дөчин мянган тооцооны нэгжтэй тэнцэх хэмжээний төгрөг ногдуулахаар заажээ Ингэхдээ уг торгох ялаас хохирогчид учирсан хохирлыг төлүүлэх, ялтан торгох ялыг сайн дураараа биелүүлээгүй тохиолдолд албадан биелүүлэх, албадан биелүүлэх ажиллагаанд саад учруулсан, оргон зайлсан тохиолдолд торгох ялыг хорих ялаар солихоор төсөлд тусгажээ. Мөн хуулийн төсөлд зорчих эрхийг хязгаарлах ялыг нэг сараас таван жил хүртэл хугацаагаар оногдуулахаар заасан байна. Түүнчлэн тогтоосон замаар зорчих, хууль сахиулах байгууллагын зөвшөөрлөөр оршин суух газраа өөрчлөх, шүүхээс хүлээлгэсэн үүрэг, хоригийг зөрчвөл уг ялын нэг хоногийг хорих ялын нэг хоногоор дүйцүүлэн тооцох юм байна.Энэ нь шинэ төрлийн ял бөгөөд шүүхээс хорих ялыг оногдуулах явдлыг багасгах зорилгоор электрон гавны тусламжтайгаар цахим хяналт тавих гэнэ. Хорих ял нь хугацаатай ба бүх насаар нь хорино гэсэн ангилалтай байх нь. Тухайлбал, хугацаатай хорих ял нь нэг сараас хорин жил хүртэл байх, бүх насаар хорих ял нь хорин жилээс дээш хугацаагаар байх бөгөөд суллагдах үндэслэл нь хорин жилээс дээш хугацаагаар хорих ялыг биечлэн эдэлсний дараа үүсэх юм байна. Хуулийн төсөлд өсвөр насны иргэнд ял оногдуулах талаар ч тусгасан байна. Ял шийтгэл хүлээлгэх насны хязгаарыг 14 наснаас байхаар зааж өгчээ. 14 наснаас дээш гэмт хэрэг үйлдсэн өсвөр насны хүн бүрт ял оногдуулах зорилгогүй гэсэн тайлбарыг яамнаас хийж байна. Хүүхдийн хүмүүжил нас бие, сэтгэхүйн онцлогт тохирсон ял шийтгэл оногдуулах, хүүхдийг аль болох хорих бус хүүхдийн сургалт хүмүүжлийн тусгай сургалттай байгууллагад хүмүүжүүлэх. Хүүхдийн хууль зүйн хороо нь хүүхдийг гэмт хэрэг үйлдэхээс урьдчилан сэргийлэх, хүүхдийн эрх ашгийг хамгаалах, хүмүүжлийн чанартай албадлагын арга хэмжээнд хяналт тавих зэргээр тодорхой зохицуулалтыг тусгаж өгсөн аж. Гэмт хэргийн тухай хуулийн төсөл батлагдсаны дараа хэрэгжүүлэхэд бэлтгэл шат 1-2 жил үргэлжилж, хуулийг нэг мөр, зөв ойлгож хэрэглэх боломж бүрдэх гэнэ.