Хотын захиргаа “Улаанбаатар төмөр зам” нийгэмлэгтэй хамтран төмөр замын RAILBUS-ыг Амгалан-Толгойтын чиглэлд ирэх сарын 6-наас эхлэн үйлчилгээнд оруулахаар төлөвлөөд байгаа. Энэ “Railbus” нь 136 хүний суудалтай, 150-200 хүн зорчих боломжтой, нэг замтай үед өдөрт гурван удаа, хос замтай үед өдөрт зургаан удаа 100 км/цагийн хурдтай Толгойт-Амгалангийн чиглэлд 47 минут, Амгалан-Толгойтын чиглэлд 45 минут зорчих юм. Төлөвлөж байгаагаар өглөө, өдөр, орой нийт 5 удаагийн тээвэрлэлт хийж Толгойтоос Амгалан хүрэхдээ Таваншар, Барс-2 захын зүүн тал, Вокзал, Дундгол, Нарантуул, Улаанхуран гэсэн байршлуудад зогсоно. Зорчигчдын аюулгүй байдлыг хангах үүднээс Railbuss-ийн шинээр байгуулж байгаа зогсоолуудад явган зам, гэрэлтүүлэг, тэмдэг тэмдэглэлээ тохижилтын ажлыг цогцоор нь хийж эхлээд байгаа юм. Мөн Улаанбаатар төмөр зам өөрсдийн зардлаар Толгойт Амгалан хоорондын төмөр замын аюултай бүсийг хашаажуулж, төмөр зам орчмын хорооллыг дуу чимээнээс тусгаарлах ажлыг хийх аж.
Хөгжлийн банк гурван жилийн ойгоо тэмдэглэж байгаа билээ. Одоогийн байдлаар “Чингис” бонд болон банкны өөрийн эх үүсвэрээс аймгийн төвүүдийг автозамтай холбох төсөл, нийслэлийн инженерийн шугам, дэд бүтцийн төсөл, “Гудамж”, “Шинэ төмөр зам” “Тавантолгойн цахилгаан станц”, Байшин үйлдвэрлэх комбинат, Эгийн голын усан цахилгаан станц, ноос, ноолуур, сүү, оёмол бүтээгдэхүүн, хүлэмжийн аж ахуй зэрэг хөдөө аж ахуй, хөнгөн үйлдвэрийн салбарыг дэмжих, дулааны цахилгаан станцуудын хүчин чадлыг дээшлүүлэх, “Яармагийн орон сууцны хороолол”, Хөтөлийн цемент, шохойн үйлдвэрийн өргөтгөл, “Эрдэнэс Тавантолгой” ХК-ийн эргэлтийн хөрөнгийн зээл, Сайншандын аж үйлдвэрийн парк зэрэг улс орны эдийн засагт ач холбогдолтой томоохон төслүүдэд санхүүжилт олгожээ. Харин “Самурай” бондын хөрөнгө болон “Чингис” бондын эх үүсвэрээс хуваарилагдаагүй үлдсэн хөрөнгөөр Монгол Улсын Засгийн газраас зарлан шалгаруулаад буй “Үйлдвэржилтийг дэмжих 888” төслийг санхүүжүүлэхээр бэлтгэл хангаж байгаа аж. Хөгжлийн банк нь 2011 оны арванхоёрдугаар сарын 31-ний байдлаар ердөө 0.08 их наяд төгрөгийн хөрөнгөтэй байсан бол өдгөө нийт хөрөнгө нь 4.51 их наяд төгрөгөөр хэмжигдэх болжээ. Үүнээс зээлийн үлдэгдэл 2.56 их наяд төгрөг байгаа аж.Тус банк анх байгуулагдсан жилдээ 0.7 тэрбум төгрөг, 2012 онд 4.9 тэрбум төгрөгийн алдагдалтай ажилласан бол 2013 онд 35.2 тэрбум төгрөг, 2014 оны эхний дөрвөн сарын байдлаар 20.8 тэрбум төгрөгийн татварын өмнөх ашигтай ажиллаж эхэлсэн аж. 
Монгол банк өнөөдөр хуваарь ёсоороо гадаад валютын дуудлага худалдаа зохион байгууллаа. Дуудлага худалдаагаар банкууд ам.доллар, юань худалдан авах санал ирүүлжээ. Монгол банк 20 сая ам.долларыг 1820.15 төгрөгийн хаалтын ханшаар, 46.5 сая юанийг 292 төгрөгийн хаалтын ханшаар тус тус худалдаалсан байна. Мөн өдрийн ээлжит гадаад валютын своп, форвард хэлцлээр банкууд 63 сая ам.доллар худалдан авах төгрөгийн своп хэлцэл байгуулах санал ирүүлж, Монголбанк саналыг 100 хувь биелүүлэн, гадаад валютын дотоодын захад 63 сая ам.доллар нийлүүлсэн байна.
Алтанбулагийн чөлөөт бүсэд ОХУ-ын иргэд визгүй, бусад орны иргэд 10 хоногийн хугацаатай дамжин өнгөрөх визтэйгээр зорчих болжээ. Ирэх зургадугаар сарын 22-нд худалдааны бүс нээлтээ хийхээр болсон байна. Чөлөөт бүс ашиглалтад орсноор 2015 он гэхэд 100 тэрбум ам.доллар манай улсын эдийн засагт эргэлтэд орох боломж бүрдэх аж. Энэ мөнгөний таван хувийг эх орондоо авч үлдэхэд л валютын нөөцөд эерэгээр нөлөөлөх аж. 
“Монголын сурагчдын дүрэмт хувцас үйлдвэрлэгчдийн холбоо”-ноос Ерөнхий сайд Н.Алтанхуягт ханджээ. Тус холбоо сурагчдын дүрэмт хувцсыг хэчнээн компани оёж байгаа, хэдэн ширхэгийг үйлдвэрлэж нийлүүлсэн, өртөг зардал, үнийн бүтцийг ил болгохыг гүйцэтгэх засаглалын тэргүүнээс хүссэн байна. Уг ил захидалд “Шинэчлэлийн тодотголтой Засгийн газар байгуулагдсаныг “Монголын сурагчдын дүрэмт хувцасны оёдлын холбоо” анхнаас нь дэмжсээр ирсэн, цаашид ч дэмжихэд бэлэн байна. Гэхдээ өнгөрсөн оноос эхлэн сурагчийн дүрэмт хувцасны үйлдвэрлэлд төр оролцож ихээхэн хэмжээний херөнгө зарсан нь өнөөдөр ямар үр дүн өгснийг асуух эрх бидэнд бий.
АН-ын бүлгээс мэдээлэл хийлээ. Тус бүлэг хуралдаанаараа гурван асуудлыг хэлэлцжээ. Бүлгийн зүгээс Ерөнхий сайдаас мэдээлэл сонсож, цаашид хийх ажлуудад нь чиг үүрэг өгсөн байна. Мөн “Монгол банк”-ны мэдээллийг сонссон байна.