Таеквондогийн Дэлхийн аварга шалгаруулах тэмцээнд оролцож байгаа П.Тэмүүжин эхний тулаанаа Ирландын тамирчинтай хийн 23:13-аар илт давуу ялалт байгуулжээ.
БНСУ-ын Мужу хотноо зургадугаар сарын 24-30-нд зохион байгуулж буй эрэгтэйчүүдийн 23 дахь удаагийн, эмэгтэйчүүдийн 16 дахь удаагийн ДАШТ-д 183 орны 1700 гаруй тамирчин оролцож байна. Манай улсаас үндэсний шигшээ багийн таван тамирчин, дасгалжуулагч багш Н.Эрдэнэбаатар, Хур Инёон нарын удирдлага дор хүч, ур чадвараа сорьж байгаа юм.