“Бид бүгд жирийн хүмүүс. Зорилгодоо хэр их цаг хугацаа зарцуулж чадсан бэ гэдгээрээ л ялгаатай.
Өглөө бүр таван цагт босож, 12 цаг хүнд хүчир ажилд нухлуулсны эцэст гар бадайрч, хөл сулартлаа ядарсан би Дублины өнөөх хүйтэн харанхуй гудмаар алхан хөлс царцам бэлтгэлийнхээ өрөөнд очдог байлаа” хэмээх Макгрегорын чин сэтгэлийн үгс. Сайн найзтайгаа хамт уушийн газарт суугаад халуун яриа өрнүүлж, хэнд ч хэлээгүй сэтгэлийн дотоодоо уудалж буй мэт мэдрэмжийг төрүүлэх ном аж.
Өмнө нь мэддэг мэт дүрүүд, үргэлж л амжилт аз жаргалын дунд байсан гэж боддог олон түүхийн эзэдтэй шинээр танилцуулжээ. Чин сэтгэлээ дэлгэж буй Эд Шийрантай хамт метроны буудал дээр дуулж, арваад хэлээр ярьдаг Салик хүүтэй хамт гудамжинд бараа заран хэл сурах урам авч, айлын хажуу өрөөнд толгой хоргодон гэрийн эздийн доромжлолыг нь сонсох АиЮу охинтой хамт хөнжил дотроо уйлж ч мэдэх юм.
Энэ номыг “Өглөөний уншлага” хөтөлбөр онцлох номоор сонгосон байх бөгөөд стресстэж шантарсан, юу хийхээ мэдэхээ больж эргэлзсэн, урам зориг эрч хүчээр дутаж буй хүнд хамгийн тохиромжтой сонголт болох биз.
Зүгээр л хичээ, амжилтад хүр, баяж, зүтгэ гэх хувь хүний хөгжлийн ямар ч номноос илүүтэй хүнд хүчрийг, шантармаар өдрүүдийн дундуур туучин гарсан нэгний чин сэтгэлийн үгс илүү хүнд хүрдэг байж мэдэх юм. Мэдээж түүх бүр ялалтаар төгсдөггүй амьдралын гашуун үнэн бий. Номонд ч мөн ялагдлыг хэрхэн хүлээн авч буй тухай, амжилт гэх ойлголтыг өөрөөр харах, гарцаагүй асуудлын үед амьдралаас аз жаргалыг мэдрэх тухай нулимстай мэдрэмжийг ч багтааж.
Энэ номыг бүтээгчид хүнд хэцүүтэй нүүр тулан явж буй залууст урам зориг өгөх зорилготойгоор асуудалд шантран бууж өгөх замыг сонгох гэж буй уншигчдад санал болгох ном хэрэгтэй хэмээн гурван жилийн хугацаанд олон зуун цагийн дүрс бичлэг, илтгэлүүдийг орчуулан эмхэтгэн бүтээсэн байна.
Хамгийн хүнд хэцүү, асуудал тулгарсан үедээ ганцаараа биш гэдгээ мэдрэх, одоо тулгараад буй асуудлыг хэн нэгэн өмнө нь туулаад гараад ирсэн юм шүү гэдгийг мэдэх нь бидэнд ялан дийлэх хүч өгдөг.
Тэгвэл энэхүү номыг уншсанаар бидний мэддэг гэж боддог, үргэлж аз жаргалтай амжилттай явж буй хэмээн боддог нэгний туулсан амьдралын хамгийн хүнд хэцүү цаг үеийнхээ тухай дэлгэж буй түүхүүд “Надад ч бас ийм боломж бий, гуниглаж болно, бууж өгч болно, гагцхүү итгэлээ алдахгүй юм шүү” гэсэн тайтгарал өгөх юм.
Энэхүү номыг уншсан нэгэн охин “Хэцүү үед ээж тэврээд, урмын үг хэлээд намайг тайтгаруулж байгаа юм шиг мэдрэмж төрүүлсэнд баярлалаа” хэмээн сэтгэгдлээ илэрхийлсэн байх аж.