Өнөөдөр Баянзүрх дүүргийн Засаг даргын тамгын газарт үймээн дэгдсэн. Тус дүүргийн Засаг даргын томилгоо хууль бус болсноос үүдсэн гэх уг үймээний улмаас олон хүн гэмтсэн талаар Нийслэлийн Ардчилсан Нам, Баянзүрх дүүргийн Ардчилсан намын төлөөлөл хэвлэлийн хурал хийлээ.
Нийслэлийн Засаг дарга С.Батболд өчигдөр Баянзүрх дүүргийн Засаг даргаар тус дүүргийн МАН-ын даргын сонгуульт ажилтай Э.Бат-Амгаланг батламжилснаа албан ёсоор мэдээлсэн. Гэвч тус дүүргийн Засаг даргаар ажиллаж буй Х.Пүрэвдаваа болон дүүргийн ИТХ-ын АН-ын гишүүд “Энэ бол хууль бус үйл ажиллагаа” хэмээн үзэж, эсэргүүцлээ илэрхийлэн нөхцөл байдал ийнхүү хүндэрсэн юм.
БЗД-ИЙН ИРГЭДИЙН ХУРЛЫН ДАРГА Ш.ГАНЧИМЭГ:
Өнгөрсөн аравдугаар сард болсон орон нутгийн сонгуулиар Баянзүрх дүүргийн АН 22, МАН 19 суудал авсан. Сонгуулийн хорооны хэсэг нөхдүүд хуулийг илтэд зөрчин АН-аас зургаан хүнийг хассан. Гэхдээ СЕХ, Нийслэлийн сонгуулийн хороо шийдвэр гаргаж Баянзүрх дүүрэгт АН ялалт байгуулсныг зарласан.
.Тэр дагуу АН хурлаа хийж иргэдийн хурлын даргаа сонгосон. Ингээд батламжаа хоёр удаа Нийслэлийн Засаг дарга С.Батболдод гардуулан өгсөн. Засаг дарга үүргээ биелүүлээгүй учир бид Нийслэлийн захиргааных эргийн шүүхэд хандсан.
Захиргааны шүүхээс танайд шүүхээр явж буй асуудлууд байгаа юм байна. Тиймээс шийдвэр гартал хэлэлцэхгүй гээд түдгэлзүүлсэн. Энэ хугацаанд чоно борооноор гэгчээр гуравдугаар сарын 2-нд С.Батболд Э.Бат-Амгаланг томиллоо. Баянзүрх дүүрэгт 330 мянган иргэд байгаагаас 200 мянга гаруй нь сонгууль өгсөн. Ихэнх нь АН-г дэмжиж саналаа өгсөн. Гэтэл үүнийг үгүйсгэж байна. Бидний үйл ажиллагаа хэвийн явагдаж байсан. Гэтэл бүх зүйлийг лацдаж хөөж гаргаж байна. Э.Бат-Амгалан гэж хүн дүүргийн Засаг даргын өрөөг эвдэж ороод хээв нэг инээгээд сууж байна. Ийм хүнийг бид сонгоогүй. Маргаашнаас эхлээд бүх ИТХ-ын төлөөлөл болон хороодын Засаг дарга, хэсгийн ахлагчдыг халж эхэлнэ. Эсэргүүцлээ илэрхийлсэн иргэдийн нэлээдийг хорьсон байна. Заримыг нь зодож гэмтээсэн байна. Тиймээс эдгээр иргэдийг суллахыг шаардаж байна. Мөн тэдгээр хүмүүсээс тэмцлийн хурц хэлбэрийг сонгоход бэлэн байгаагаа мэдэгдсэн хүмүүс ч байгаа гэв.
О.ӨНӨР