Дөрвөн хүүхэд ээжийн хамт угаартан, нэг настай хүүхэд эмчилгээ авч чадалгүй нас барсан харамсалтай хэрэг гарчээ. Тодруулбал, дээрх хэрэг энэ сарын 17-ны өдөр Нийслэлийн Сонгинохайрхан дүүргийн нутаг дэвсгэр Орбитод гарсан байна.
Хүүхдүүдийн хамгийн бага болох нэг настай хүүхэд дүүргийнхээ эмнэлэгт хүргэгдсэн ч эмчилгээ авч амжилгүй нас барсан бол 5, 7, 12 настай гурван хүүхэд ЭХЭМҮТ-д хүргэгджээ. 5, 12 настай хүүхдүүдийн биеийн байдал гайгүй байсан учраас эмнэлгийн тусламж үзүүлэн буцааж, долоон настай хүүхэд хэвтэн эмчлүүлж байгаа аж.
Цагдаагийнхан тухайн өдөр хэргийн газраас сайжруулсан шахмал түлшний дээж авч шинжилгээнд явуулсан бөгөөд дээрх хэргийг Сонгинохайрхан дүүрэг дэх Цагдаагийн нэгдүгээр хэлтэст шалгаж байна.