Ердөө жил гаруйн дараа Бразилийн нийслэл Рио де Жанейро хотод хүн төрөлхтний эв найрамдлын бэлгэ тэмдэг зуны спортын XXXI наадам хөшгөө нээнэ.
Таван тивийн үндэстнийг спортоор дамжуулан нэгтгэдэг агуу наадмын эрх олгох тэмцээн энэ жилээс эхэлж байгаа. Тэгвэл манай улс түүхэндээ анх удаа олимпийн эрх олгох тэмцээнийг эх орондоо зохион байгуулахаар болжээ.
Тодруулбал, 2016 оны олимпийн чөлөөт бөхийн төрөлд өрсөлдөх тамирчдад эрх олгох тэмцээн Монголд болно. Монголын чөлөөт бөхийн холбооны тавьсан хүсэлтийг дэлхийн бөхийн нэгдэл хүлээн зөвшөөрч олимпийн наадмын эрх олгох тэмцээнийг манай улсад зохион байгуулах шийдвэр гаргасан байна. Тус тэмцээн ирэх оны дөрөвдүгээр сарын 22-нд эхлэх бөгөөд гурван өдөр үргэлжлэх юм.