Японы RIKEN Үндэсний шинжлэх ухааны хүрээлэнд дархлал судлаачаар
ажилладаг, анагаах ухааны доктор Д.Нямбаяр “Nature” сэтгүүлд тухайн
нээлтийн нэгдүгээр зохиогч буюу эрдэм шинжилгээний төслийн гол удирдагч
хэмээх нэрээр бүтээлээ хэвлүүлжээ.
Монголын шинжлэх ухааны түүхэнд анх удаа монгол хүн удирдсан төслийнхөө
судалгааг “Nature” сэтгүүлд хэвлүүлж байна. Тэрбээр дархлааны эсийн
нэгэн төрөл, байгалийн “алуурчин” Т эсийн ялгаран хөгжих арга замын
талаар нээлт хийсэн юм.
Эрдэмтэд олон улсад нэр хүндтэй шинжлэх ухааны сэтгүүлд бүтээлийнхээ
тухай хэвлүүлснээр судалгааных нь ажлын үр дүнг дэлхий нийт хүлээн
зөвшөөрдөг.
Монгол эрдэмтэний уг нээлт нь дархлааны эсийн ялгарах хөгжлийн онолыг
сууриар нь өөрчилж, шинэ түвшинд гаргаж байгаа гэдгээрээ онцлогтой нээлт
юм. Мөн харшил үрэвсэл, дархлааны тогтолцооны элдэв эмгэг, хорт хавдрыг
дархлааны эсээр эмчлэх аргад дэвшил гаргахад том түлхэц болох
магадлалтай. Тэрбээр энэ судалгааны ажлаа хийхдээ 10 гаруй жилийн
уйгагүй хөдөлмөрөө зарцуулсан байна.
Д.Нямбаяр нь 2001 онд Анагаах ухааны их сургуулийг хүний их эмч
мэргэжлээр төгсөөд Японы Хоккайдогийн үндэсний их сургуульд, 2006 онд
докторын зэрэг хамгаалсан юм.