Монгол Улсаас Булангийн орнуудад анх удаа хонины сэврээсэн шинэ мах экспортолж эхэллээ DNN.mn

Булангийн орнуудын зах зээлд өнөөдрөөс эхлэн монгол хонины сэврээсэн мах анх удаа худалдаалж эхэлжээ. Энэ талаар Монгол Улсаас Кувейт улсад суугаа Онц бөгөөд Бүрэн эрхт Элчин сайд П.Сэргэлэнгээс тодруулахад “Өнөөдрөөс эхлэн Кувейт, Иордан, Катар улсуудын томхон сүлжээ дэлгүүрүүдээр монгол хонины сэврээсэн махыг худалдаж эхэллээ. Монгол Улсын Ерөнхийлөгч У.Хүрэлсүхийн “Хүнсний хувьсгал” үндэсний хөтөлбөр, Ерөнхийлөгчийн биечлэн өгсөн үүрэг даалгавар, Монгол Улсын Засгийн газрын экспортыг дэмжих бодлогыгудирдлага болгон Монгол Улсын Гадаад харилцааг Эдийн засагжлуулах чиглэлээр ажиллаж байна. Үндсэндээ Монгол Улс Булангийн орнууд, тэр дундаа Кувейт, Катар улстай худалдааны чиглэлд төдийлөн хамтын ажиллагаа хөгжөөгүй ирсэн хэдий ч 2022 оноос хойш идэвхтэй ажилласны үр дүнд эдгээр улсад мах, махан бүтээгдэхүүн экспортлох эрх зүйн орчин бүрдэж, экспортын ажил эхлээд байна.

Монгол бэлчээрийн малын мах экологийн цэвэр бүтээгдэхүүнд тооцогддог.Булангийн орнуудын хувьд махны хэрэглээгээрээ дэлхийд дээгүүр ордог жишээ нь 2026 он гэхэд Кувейт Улсын махны хэрэглээний зардал 2.4 тэрбум ам.долларт хүрэх төлөвтэй байгаа бөгөөд одоогийн байдлаар 2.1 тэрбум ам.доллар байна.

Тоо хэмжээний хувьд долоо хоногт доод тал нь 30 тонн, дээд тал нь 100 тонн хонины сэврээсэн мах тогтмол экспортлохоор төлөвлөж байгааг импортлогч талууд илэрхийлсэн. Мөн айлын талуудаас үхэр, тэмээны мах болон дайвар бүтээгдэхүүнүүд импортлох сорнирхолоо илэрхийлээд байгаа. Цаашлаад бид Саудын Арабын Хаант Улс, Оманы Султант Улс, Бахрейны Хаант Улс зэрэг Булангийн орнуудад Халал гэрчилгээгээ бүртргүүлж, зах зээлийг тэлэх чиглэлээр ажиллахаар төлөвлөж байна. Манай аж ахуй нэгжүүд махны экспортыг тогтмол хийж эхэлснээр эхний ээлжид жилд 30-40 сая ам.доллар цаашлаад манай аж ахуйн нэгжүүдийн бэлтгэл нийлүүлэлтийн хүчин чадал, бусад Булангийн орнуудад экспортолж эхлэх зэргээс шалтгаалан хангалттай хэмжээгээр өсөх боломжтой бөгөөд энэ нь Монгол Улсын Эдийн засагт тодорхой хэмжээний хувь нэмэр оруулна гэдэгт итгэлтэй байна.

Тээврийн асуудлыг экспортлогч болон импортлогч аж ахуйн нэгжүүд харилцан тохиролцож, хамтран ажиллан шийдэж байгаа тул хүндрэл ихээхэн гарахгүй боловуу гэж бодож байна. Онгоцны хувьд буцахдаа Булангийн орнуудаас жимс, жимсгэн тээвэрлэн буцах боломжтой бөгөөд мах экспортлогч болон импортлогч талууд харилцан тохиролцсон тохиолдолд ЭСЯ-наас дэмжлэг, туслалцаа үзүүлэхэд бүрэн нээлттэй” гэлээ.

Д.ТУЯА